മൂലവട്ടത്ത് ട്രെയിനിൽ നിന്നും വീണ് പത്തുവയസുകാരൻ മരിച്ചു . മലപ്പുറം മമ്പാട് പുള്ളിപ്പാടം കുണ്ടൻതൊടിക സിദിഖിന്റെ മകൻ മുഹമ്മദ് ഇഷാനാണ് ട്രെയിനിൽ നിന്ന് വീണു മരിച്ചത് . തിങ്കളാഴ്ച രാത്രി 12.30 ഓടെ മൂലവട്ടം റെയിൽവേ മേൽപ്പാലത്തിന് സമീപമായിരുന്നു അപകടം.

തിരുവനന്തപുരത്ത് വിവാഹ ചടങ്ങിൽ പങ്കെടുത്ത ശേഷം മടങ്ങുകയായിരുന്നു കുടുംബം. തിരുവനന്തപുരം - നിലമ്പൂർ രാജ്യറാണി എക്‌സ്പ്രസിൽ മലപ്പുറത്തേക്കായിരുന്നു മടക്കം . ഇതിനിടെ മൂലേടം - മാടമ്പുകാട് ഭാഗത്ത് വച്ച് ട്രെയിനിന്റെ ബാത്ത് റൂമിൽ പോയ കുട്ടി കാൽ വഴുതി ട്രെയിനിൽ നിന്നും വീഴുകയായിരുന്നുവെന്നു സംശയിക്കുന്നു.

കുട്ടി വീഴുന്നത് കണ്ട് ബന്ധുക്കൾ ചങ്ങല വലിച്ചതോടെ മീറ്ററുകൾ മാറിയാണ് ട്രെയിൻ നിർത്തിയത്. ഒരു കുടുംബത്തിലെ 13 അംഗ സംഘം ട്രെയിനിൽ ഉണ്ടായിരുന്നു . ഇതിനിടെയാണ് അപകടം ഉണ്ടായത്. ഓടിക്കൂടിയ നാട്ടുകാർ ചേർന്ന് നടത്തിയ തിരച്ചിലിൽ പ്രദേശത്തെ കലുങ്കിനടിയിൽ നിന്നും മൃതദേഹം കണ്ടെത്തി.

തുടർന്ന് പ്രദേശവാസിയുടെ വാഹനത്തിൽ മൃതദേഹം ജില്ലാ ആശുപത്രിയിൽ എത്തിച്ചു. മൃതദേഹം മെഡിക്കൽ കോളേജ് ആശുപത്രിയിൽ പോസ്റ്റ്മോർട്ടത്തിന് ശേഷം ബന്ധുക്കൾക്ക് വിട്ടു നൽകി. പിതാവ് - സിദ്ദിഖ് , മാതാവ് - ജസ്ന. സഹോദരി - ഫാത്തിമ ലിയാന.

രക്ഷാപ്രവർത്തനം നടത്തിയവർ പറയുന്നത് ഇങ്ങനെ ; റെയിൽവേട്രാക്കിന് അരികിലായാണ് അശ്വിൻ വിനോദിന്റെയും, സിജിൻ ലാലിന്റെയും വീട്. രാത്രിയിൽ വീടിനു മുന്നിൽ നിൽക്കുമ്പോഴാണ് അപ്രതീക്ഷിതമായി ട്രെയിൻ നിർത്തിയത് കണ്ടത്.

കുറച്ച് ആളുകൾ ട്രെയിനിൽ നിന്നും പുറത്തിറങ്ങി ഓടുന്നതും കണ്ടു. ഇരുവരും ഓടിയെത്തിയപ്പോഴേയ്ക്കും പ്രദേശവാസിയായ വിജയനും മകനും സ്ഥലത്ത് എത്തി. തുടർന്ന് ഇവർ റെയിൽവേ ട്രാക്കിലൂടെ മുന്നോട്ട് നടന്നപ്പോഴാണ് കുട്ടിയെയും കയ്യിലെടുത്ത് ബന്ധുക്കൾ ട്രാക്കിലൂടെ നടന്ന് വരുന്നത് കണ്ടത്. 

ഇവർ കുട്ടിയെ കയ്യിൽ വാങ്ങിയ ശേഷം ഓടിയെത്തി. ഇവിടെ നിന്നും അയൽവാസിയുടെ കാറിൽ കുട്ടിയെയുമായി ജില്ലാ ജനറൽ ആശുപത്രിയിലേയ്ക്കു കുതിക്കുകയായിരുന്നു. ആശുപത്രിയിൽ എത്തിച്ചപ്പോഴേയ്ക്കും കുട്ടിയുടെ മരണം സംഭവിച്ചിരുന്നുവെന്നും ഇവർ പറയുന്നു.