നൊമ്പരകാഴ്ചയായി......അമ്മയോടൊപ്പം ഉറങ്ങിക്കിടക്കവേയാണ് ആ പിഞ്ചുമക്കളെ മരണം തട്ടിയെടുത്തത്..... മണ്ണിടിഞ്ഞുവീണ് തകര്‍ന്ന വീടിനുള്ളില്‍പ്പെട്ട് മരിച്ച കുഞ്ഞുസഹോദരിമാര്‍ക്ക് യാത്രയയപ്പ് നല്‍കിയത് നിറകണ്ണുകളോടെ...

മണ്ണിടിഞ്ഞുവീണ് തകര്‍ന്ന വീടിനുള്ളില്‍പ്പെട്ട് അബൂബക്കര്‍ സിദ്ദിഖിന്റെയും സുമയ്യയുടെയും മക്കളായ ഏഴുവയസ്സുകാരി ലിയാന ഫാത്തിമയും സഹോദരി ആറുമാസം മാത്രം പ്രായമായ ലുബാന ഫാത്തിമയും മരിച്ചുവെന്ന വാര്‍ത്ത കേട്ട ഒരു നാടു മുഴുവന്‍ ഞെട്ടി. ഈ ദമ്പതിമാരുടെ ആകെയുള്ള രണ്ട് ഓമനകളെയാണ് മരണം തട്ടിയെടുത്തത്.

മാതാംകുളത്തെ മുണ്ടോട്ടുപുറം ചോനാരി മുഹമ്മദ്കുട്ടിയും കുടുംബവും താമസിക്കുന്ന ഓടിട്ട കൊച്ചുവീടിനു മുകളിലേക്കു തൊട്ടടുത്ത പറമ്പില്‍നിന്നു മണ്ണടര്‍ന്നുവീഴുകയായിരുന്നു. മുഹമ്മദ്കുട്ടിയുടെ മകള്‍ സുമയ്യയും കുട്ടികളും കിടന്ന മുറിക്കുമുകളിലേക്കാണ് മണ്ണുവീണത്. സുമയ്യയുടെ നിലവിളി കേട്ടെത്തിയ അയല്‍ക്കാര്‍ മണ്ണിനടിയില്‍നിന്നു കുട്ടികളെ പുറത്തെടുത്ത് പറമ്പില്‍പീടികയിലെ സ്വകാര്യാശുപത്രിയില്‍ എത്തിച്ചപ്പോഴേക്കും മരിച്ചിരുന്നു. വാര്‍ത്ത കേട്ടവരൊക്കെയും മാതാംകുളത്തേക്കോടിയെത്തി.

അപകടത്തില്‍ മരിച്ച കുട്ടികള്‍ക്കൊപ്പം കിടന്നുറങ്ങിയ മാതാവ് സുമയ്യ പരിക്കൊന്നും കൂടാതെ രക്ഷപ്പെടുകയായിരുന്നു. ഭര്‍ത്താവ് അബൂബക്കര്‍ സിദ്ദിഖ് കാസര്‍കോട് ജോലിക്കു പോയതാണ്.

സുമയ്യയുടെ പിതാവ് മുഹമ്മദ്കുട്ടി, മാതാവ് ഫാത്തിമ, സഹോദരി ഹഫ്‌സത്ത്, മാതൃസഹോദരി ജമീല എന്നിവരും ദുരന്തദിവസം വീട്ടിലുണ്ടായിരുന്നു. ഫാത്തിമ വീണ് പരിക്കുപറ്റി കിടക്കുകയാണ്.

കൊച്ചു സഹോദരിമാരായ ലിയാന ഫാത്തിമയുടെയും ലുബാന ഫാത്തിമയുടെയും ഭൗതികശരീരം കോഴിക്കോട് മെഡിക്കല്‍കോളേജില്‍ പോസ്റ്റ്‌മോര്‍ട്ടത്തിനുശേഷം ചൊവ്വാഴ്ച വൈകുന്നേരത്തോടെയാണ് മാതാംകുളത്തെത്തിച്ചത്.

വീട്ടിലേക്കു കൊണ്ടുപോകുന്നതിനുപകരം മൃതദേഹങ്ങള്‍ മാതാംകുളം റഹ്മാനിയ മദ്രസയില്‍ പൊതുദര്‍ശനത്തിനുവെച്ചു. പിന്നീട് പുന്നത്ത് ജുമാഅത്ത് പള്ളി ഖബര്‍സ്ഥാനില്‍ ഖബറടക്കി. കാടപ്പടി സ്‌കൂളിലെ രണ്ടാംക്ലാസ് വിദ്യാര്‍ഥിനിയായ ലിയാന സ്‌കൂള്‍ വീണ്ടും തുറക്കാന്‍പോകുന്നതിലുള്ള ആവേശത്തിലായിരുന്നുവെന്ന് കണ്ണീരോടെ ബന്ധുക്കള്‍ .