കൂടെ താമസിച്ച നാടോടി സ്ത്രീയെ കൊലപ്പെടുത്തിയ യുവാവിനെ പോലീസ് അറസ്റ്റ് ചെയ്തു. കൊട്ടാരക്കര പള്ളിക്കല്‍ ബംഗ്ലാവ് പുത്തന്‍വീട്ടില്‍ സുനില്‍ കുമാറിനെ(40)യാണ് പോലീസ് അറസ്റ്റ് ചെയ്തത്.

കൈനോട്ടം നടത്തി വന്നിരുന്ന പെണ്ണമ്മ എന്ന മോളമ്മ(49)യെ കൊലപ്പെടുത്തിയ കേസിലാണ് സുനിൽ കുമാറിനെ അമ്പലപ്പുഴ പോലീസ് അറസ്റ്റ് ചെയ്തത്.

സുനിൽകുമാറും പെണ്ണമ്മയും ഒരു മാസമായി തോട്ടപ്പള്ളി സ്പിൽവേ കനാലിനരികിലെ താൽക്കാലിക ഷെഡിൽ താമസിച്ചുവരികയായിരുന്നു. കഴിഞ്ഞ ദിവസം വൈകിട്ടാണ് പെണ്ണമ്മ ഷെഡിനോട് ചേർന്നു മരിച്ചു കിടക്കുന്നത് കണ്ടത്.

സമീപത്ത് ഉണ്ടായിരുന്ന സുനിൽ കുമാറിനെ പോലീസ് അപ്പോൾ തന്നെ കസ്റ്റഡിയിൽ എടുത്തിരുന്നു. അടിവയറ്റിലേറ്റ ചവിട്ടും തലയ്ക്കേറ്റ അടിയുമാണ് മരണ കാരണം.

മെഡിക്കൽ കോളേജിൽ നടത്തിയ പോസ്റ്മോർട്ടത്തിലാണ് കൊലപാതകമെന്ന് തെളിഞ്ഞത്. അറസ്റ്റിലായ പ്രതിയെ ഇന്ന് കോടതിയിൽ ഹാജരാക്കും.