തൊടുപുഴ അറക്കുളം മൂന്നുങ്കവയലില്‍ ഓടിക്കൊണ്ടിരുന്ന കാര്‍ പാലത്തില്‍ നിന്നും കുത്തൊഴുക്കില്‍ പെട്ട് പുഴയില്‍ വീണ് കാറിലുണ്ടായിരുന്ന രണ്ടുപേര്‍ മരിച്ചു.അപകടമുണ്ടായ ഉടന്‍ നടത്തി തിരച്ചിലില്‍ പെണ്‍കുട്ടിയുടെ മൃതദേഹം ലഭിച്ചിരുന്നു. തുടര്‍ന്ന് നടത്തിയ തിരച്ചിലിലാണ് അല്‍പം മുന്‍പ് ആണ്‍കുട്ടിയുടെയും മൃതദേഹം ലഭിച്ചത്. ഇവര്‍ എവിടെയുള‌ളവരാണെന്ന വിവരം പൂര്‍ണമായും ലഭ്യമായിട്ടില്ല.പൊലീസും അഗ്നിരക്ഷാ സേനയും നാട്ടുകാരും സ്ഥലത്ത് നടത്തിയ പരിശോധനയിലാണ് മൃതദേഹങ്ങള്‍ കിട്ടിയത്.

തൊടുപുഴ രജിസ്‌ട്രേഷനിലുള‌ള വെള‌ള സ്വിഫ്‌റ്റ് കാറാണ് അപകടത്തില്‍ പെട്ടത്. പെണ്‍കുട്ടിയുടെ മൃതദേഹം അടുത്തുള‌ള കണിയാന്‍ തോട്ടില്‍ നിന്നാണ് ലഭിച്ചത്. സംസ്ഥാനത്തെ ആറ് ജില്ലകളില്‍ തുടരുന്ന മഴക്കെടുത്തിയെ തുടര്‍ന്ന് മുഴുവന്‍ ജില്ലകളിലും ജാഗ്രതയിലാണ്.

തൊടുപുഴയിലുള്‍പ്പടെ ഇടുക്കി ജില്ലയുടെ പലഭാഗത്തും കനത്തമഴയും ഉരുള്‍പൊട്ടല്‍ ഭീഷണിയുമുണ്ട്. പ്രദേശത്ത് ഇപ്പോഴും മഴ പെയ്യുകയാണെന്നാണ് ലഭ്യമായ വിവരം.