മഴയുടെ ശക്തി കുറഞ്ഞെങ്കിലും പമ്പയുടെ നീരൊഴുക്ക് കൂടുകയാണ്. കലിതുള്ളുന്ന പമ്പാ നദിയെ മറികടക്കാന്‍ തന്നെ പ്രയാസമാണ്. കനത്ത മഴയുടെ പശ്ചാത്തലത്തില്‍ തുലാമാസ പൂജാ നാളുകളിലെ ശബരിമല തീര്‍ത്ഥാടനം പൂര്‍ണമായും ഒഴിവാക്കാന്‍ മുഖ്യമന്ത്രിയുടെ അദ്ധ്യക്ഷതയില്‍ ചേര്‍ന്ന യോഗം ഇന്നലെ തീരുമാനിച്ചിരുന്നു. നിലയ്ക്കലില്‍ തങ്ങിയിരുന്ന തീര്‍ത്ഥാടകരെ സുരക്ഷിതമായി മടക്കി അയയ്ക്കാന്‍ ജില്ലാ ഭരണകൂടത്തിന് നിര്‍ദ്ദേശം നല്‍കി.

ഇതിനായി എത്തിയ പൊലീസിനു മുന്നില്‍ നിലയ്ക്കലിലുണ്ടായിരുന്ന അയ്യപ്പഭക്തര്‍ ശരണം വിളിച്ച് പ്രതിഷേധിച്ചു. ആന്ധ്ര, തമിഴ്‌നാട്, കര്‍ണാടക സംസ്ഥാനങ്ങളില്‍ നിന്നുള്ളവരാണ് പ്രതിഷേധിച്ചത്. എന്നാല്‍ പോലീസ് ശാന്തമായി കാര്യങ്ങള്‍ പറഞ്ഞ് മനസിലാക്കി. പിന്നീട് ഇവര്‍ മടങ്ങി. പ്രായമായവരും കുട്ടികളും അടക്കം നാനൂറോളം തീര്‍ത്ഥാടകര്‍ ഉണ്ടായിരുന്നു. നിലയ്ക്കല്‍, പെരുന്തേനരുവി മേഖലയില്‍ ഞായറാഴ്ച 20 സെന്റീമീറ്ററിലധികം മഴ പെയ്തു.

മാസപൂജ ദര്‍ശനം വിലക്കിയതോടെ ശബരിമല തീര്‍ഥാടകര്‍ പലസ്ഥലങ്ങളിലായി കുടുങ്ങി. തിങ്കളാഴ്ച രാവിലെ മുതല്‍ എരുമേലിയില്‍നിന്ന് തീര്‍ഥാടകരെ കടത്തിവിടുന്നത് തടഞ്ഞിരുന്നു. മണ്ണാറക്കുളഞ്ഞി ശബരിമല പാതയില്‍ പെരുനാട്ടില്‍ തീര്‍ഥാടകര്‍ വഴിയില്‍ കുടുങ്ങി. ഇതിനിടെ മൂന്നു ദിവസമായി മല കയറാന്‍ നിലക്കലില്‍ തമ്പടിച്ചിരുന്നവരാണ് പ്രതിഷേധിച്ചത്.

ഭക്തരെ സുരക്ഷിതമായി നാട്ടിലേക്ക് മടക്കി അയക്കാനാണ് മുഖ്യമന്ത്രിയുടെ നേതൃത്വത്തില്‍ നടന്ന അവലോകന യോഗത്തില്‍ വന്ന തീരുമാനമെന്ന് പൊലീസ് വിശദീകരിച്ചതോടെ കഴിഞ്ഞ ദിവസങ്ങളില്‍ എത്തിയ ഭക്തര്‍ പ്രതിഷേധവുമായി പൊലീസ് ജീപ്പ് തടയുകയായിരുന്നു. തുടര്‍ന്ന് പൊലീസ് നിലവിലെ സാഹചര്യം മനസ്സിലാക്കി ഭക്തരെ ശാന്തരാക്കി മടക്കി അയച്ചു



വീണ്ടും ശക്തമായ മഴക്ക് സാധ്യത നിലനില്‍ക്കുന്ന സാഹചര്യത്തില്‍ തുലാമാസ പൂജക്ക് ശബരിമലയിലേക്ക് തീര്‍ഥാടകര്‍ക്ക് പ്രവേശനം ഇല്ല. കാലാവസ്ഥാ വകുപ്പിന്റെ മുന്നറിയിപ്പ് പ്രകാരം 20 മുതല്‍ 24 വരെ ജില്ലയില്‍ അതിശക്തമായ മഴക്ക് സാധ്യത നിലനില്‍ക്കുന്നുണ്ട്.

കക്കി ഡാം തുറന്നതിന് പിന്നാലെ പമ്പാ ഡാമും തുറക്കാന്‍ സാധ്യത നിലനില്‍ക്കുന്നു. കക്കി തുറന്നതോടെ പമ്പ ത്രിവേണിയിലടക്കം ജലനിരപ്പ് വലിയ തോതില്‍ ഉയര്‍ന്നിട്ടുണ്ട്. അച്ചന്‍കോവില്‍ നദിയിലും ജലനിരപ്പ് ഉയരുകയാണ്. വനമേഖലകളിലെ ഇടവിട്ടുള്ള ശക്തമായ മഴ മറ്റു ദുരന്ത സാഹചര്യങ്ങള്‍ക്കും അപകടങ്ങള്‍ക്കും ഇടയാക്കാം. ഇതൊക്കെ കണക്കിലെടുത്താണ് തീര്‍ഥാടകരെ കടത്തിവിടേണ്ടതെന്ന് തീരുമാനമെടുത്തതെന്ന് റവന്യൂ മന്ത്രി കെ. രാജനും ആരോഗ്യ മന്ത്രി വീണ ജോര്‍ജും അറിയിച്ചു. നിലവില്‍ അന്തര്‍സംസ്ഥാനങ്ങളില്‍ നിന്നെത്തിയ തീര്‍ഥാടകര്‍ നിലക്കലില്‍ ക്യാമ്പ് ചെയ്യുകയാണ്. ഇവര്‍ക്ക് തിരികെപ്പോകാനുള്ള ക്രമീകരണം ഒരുക്കുമെന്നും മന്ത്രിമാര്‍ പറഞ്ഞു.

ഇതോടെയാണ് ശബരിമല ദര്‍ശനം അനുവദിക്കണമെന്ന് ആവശ്യപ്പെട്ട് നിലയ്ക്കലില്‍ ഭക്തരുടെ പ്രതിഷേധമുണ്ടായത്. തുടര്‍ന്നാണ് പ്രതിഷേധക്കാര്‍ പൊലീസ് ജീപ്പ് തടഞ്ഞത്.

തുലാമാസ പൂജകളുടെ സമയത്ത് കഴിഞ്ഞ ദിവസങ്ങളില്‍ എത്തിയ ഭക്തരാണ് പ്രതിഷേധവുമായി എത്തിയത്. ശബരിമല ദര്‍ശനം സാധ്യമല്ല എന്ന് മനസിലായതോടെയാണ് പ്രതിഷേധം. ഇനി പമ്പ കടത്തിയുള്ള ഭക്തരുടെ യാത്ര സാധ്യമല്ല എന്ന് പൊലീസ് ഭക്തരോട് വിശദികരിച്ചതോടെയാണ് പ്രതിഷേധിച്ചത്. പ്രതിഷേധവുമായി അവര്‍ പൊലീസ് ജീപ്പ് തടയുകയായിരുന്നു. തുടര്‍ന്ന് പൊലീസ് നിലവിലെ സാഹചര്യം മനസിലാക്കിക്കൊടുത്ത ഭക്തരെ മടക്കി അയക്കുകയായിരുന്നു. ശരണം വിളിച്ച് കൊണ്ട് അവര്‍ സ്വയം ശപിച്ച് നാടുകളിലേക്ക് തിരിച്ചു.