വിവാഹ വാഗ്ദാനം ചെയ്ത് 24 കാരിയായ യുവതിയെ പീഡിപ്പിച്ച കേസില്‍ പ്രതിക്ക് ഇരുപത് വര്‍ഷം കഠിന തടവും രൂപ മുപ്പതിനായിരം രൂപ പിഴയും തിരുവനന്തപുരം അതിവേഗ കോടതി ശിക്ഷ വിധിച്ചു.

കായംകുളം ആറാട്ടുപുഴ സ്വദേശി സരീഷ് മധു (35) വിനെയാണ് ജഡ്ജി ആര്‍. ജയകൃഷ്ണന്‍ ശിക്ഷിച്ചത്. പിഴ അടച്ചില്ലെങ്കില്‍ ഒമ്പത് മാസം അധിക തടവനുഭവിക്കണം. പിഴ തുക പീഡനത്തിനിരയായ യുവതിക്ക് നല്‍കണം.

കൂടാതെ ഭാവി നന്മക്കായി മതിയായ തുക ഇരകള്‍ക്കുള്ള നഷ്ടപരിഹാര ഫണ്ടില്‍ നിന്നും നഷ്ടപരിഹാരം നല്‍കാനും ജില്ലാ ലീഗല്‍ സര്‍വ്വീസസ് അതോറിറ്റിയോടും കോടതി നിര്‍ദ്ദേശിച്ചു.


2014 നാണ് കേസിനാസ്പദമായ സംഭവം നടന്നത്. എറണാകുളത്ത് ജോലി ചെയ്യുകയായിരുന്ന യുവതിയെ രാഹുല്‍ എന്ന പേരിലാണ് പ്രതി ആദ്യം പരിചയപ്പെട്ടത്. തുടര്‍ന്ന് നിരന്തരം ഫോണിലൂടെ ബന്ധപ്പെടുകയും നേരിട്ട് കാണുകയും ചെയ്തു. സംസാരത്തിനിടയില്‍ യുവതിയെ തിരുവനന്തപുരത്ത് വിളിച്ച് വരുത്തി വിവാഹ അഭ്യര്‍ത്ഥന നടത്തി.

പ്രതിയുടെ ഓഫീസില്‍ കൊണ്ട് പോവുകയും അവിടെ വെച്ച് പീഡനത്തിന് ശ്രമിച്ചെങ്കിലും യുവതി അനുവദിച്ചില്ല. വിവാഹം ചെയ്യുന്നതിനാല്‍ ശാരീരിക ബന്ധത്തില്‍ ഏര്‍പ്പെട്ടാല്‍ കുഴപ്പമില്ലായെന്ന് പ്രതി പല തവണ നിര്‍ബന്ധിച്ചതിനാല്‍ ഒടുവില്‍ പെണ്‍കുട്ടി. സമ്മതിക്കുകയായിരുന്നു. പീഡനത്തിന് ശേഷം യുവതി പല തവണ വിവാഹ ആലോചന നടത്താന്‍ തന്റെ വീട്ടില്‍ വരണമെന്ന് ആവശ്യപ്പെട്ടെങ്കിലും പ്രതി ആദ്യം തയ്യാറായില്ല.

സമ്മര്‍ദ്ദം കൂടിയപ്പോള്‍ പ്രതി ഒടുവില്‍ വഴങ്ങുകയായിരുന്നു. രക്ഷിതാക്കളുമായി വീട്ടില്‍ പോയ പ്രതി 101 പവന്റെ ആഭരണവും വന്‍ തുക സ്ത്രീധനവും തന്നാല്‍ മാത്രമെ വിവാഹം കഴിക്കുകയുള്ളുയെന്ന് യുവതിയോട് പറഞ്ഞു. വീട്ടുകാര്‍ക്ക് ഈ തുക നല്‍കാനുള്ള ശേഷിയില്ലായെന്ന് അറിഞ്ഞാണ് പ്രതി ഇതാവശ്യപ്പെട്ടത്.

തങ്ങളുടെ വസ്തുക്കളെല്ലാം വിറ്റിട്ട് 70 പവന്‍ തരാമെന്ന് പെണ്‍കുട്ടിയുടെ വീട്ടുകാര്‍ ഉറപ്പ് നല്‍കിയെങ്കിലും പ്രതി വഴങ്ങിയില്ല. താന്‍ കബളിപ്പിക്കപ്പെട്ടുവെന്നറിഞ്ഞപ്പോള്‍ യുവതി നല്‍കിയ പരാതിയില്‍ മെഡിക്കല്‍ കോളേജ് പൊലീസ് ആണ് കേസ് എടുത്തത്.