പ്രസവിച്ചയുടന്‍ മാതാപിതാക്കള്‍ തന്നില്‍ നിന്നും കുഞ്ഞിനെ തട്ടിയെടുത്തെന്ന ഉന്നയിച്ച് അനുപമ ചന്ദ്രൻ നൽകിയ പരാതിയിൽ കോടതി ഇന്ന് ഇടപെടും. കുഞ്ഞിനെ തിരിച്ച്‌ വേണമെന്ന് ആവശ്യപ്പെട്ട് അനുപമ സെക്രട്ടറിയേറ്റില്‍ കഴിഞ്ഞ ദിവസം നിരാഹാര സമരമിരുന്നു. വിഷയത്തില്‍ അനുപമയെ അനുകൂലിച്ചും വിമര്‍ശിച്ചും നിരവധിയാളുകളാണ് രംഗത്ത് വന്നിരിക്കുന്നത്. എന്നാൽ അനുപമയുടെ കുഞ്ഞിനെ കാണാതായതില്‍ കേരളം ലജ്ജിക്കുന്നത് എന്തിനാണെന്ന് ബീഗം ആശാ ഷെറിന്‍ ചോദിക്കുന്നു. അനുപമയുടെ കൈയ്യില്‍ ഉണ്ടായിരുന്ന പ്ലക്കാര്‍ഡിലെ 'കേരളമേ ലജ്ജിക്കൂ...' എന്ന വാചകത്തെ മുൻനിർത്തിയായിരുന്നു ഈ ചോദ്യം. ഇത് എന്തിനായിരുന്നു എന്നാണ് ഷെറിന്‍ ചോദിക്കുന്നത്.

'കേരളം ഇങ്ങനെ ലജ്ജിക്കാതിരിക്കാനാണ് ലക്ഷക്കണക്കിന് രൂപ ചെലവാക്കി വനിതാ മതില്‍ കെട്ടിയത്. അതിന്റെ ഭാഗമായിട്ട് നിന്ന ഒരു പെണ്‍കുട്ടിക്ക് സെക്രട്ടറിയേറ്റ് പടിക്കല്‍ അങ്ങനെ നില്‍ക്കുന്ന സാഹചര്യം വന്നതില്‍ സങ്കടമുണ്ട്. പക്ഷെ ഒരു ചോദ്യം, കേരളം എന്തിനാണ് ലജ്ജിക്കുന്നത്? അനുപമ എന്ന എസ്‌എഫ്‌ഐക്കാരിക്ക് മറ്റൊരു യുവതിയുടെ ഭര്‍ത്താവില്‍ ഉണ്ടായ (ഇപ്പോള്‍ സ്വന്തം ഭര്‍ത്താവായി) കുഞ്ഞിനെ സ്വന്തം ഇഷ്ടത്തിന് ശിശുഭവനത്തില്‍ കൊടുത്തതിനു കേരളം ലജ്ജിക്കുന്നത് എന്തിനാണ്?

അനുപമയും അനുപമയുടെ വീട്ടുകാരും ലജ്ജിച്ചാല്‍ മതി. കൂട്ടത്തില്‍ എസ്.എഫ്.ഐയും സി.പി.എമ്മും ഇരിക്കട്ടെ. അതില്‍ കേരളത്തെ ഉള്‍പ്പെടുത്തണ്ട. ഇതില്‍ കേരളത്തിന് എന്താണ് പങ്ക്? നിങ്ങടെ കുടുംബവിഷയത്തെ ഓര്‍ത്ത് കേരളം ലജ്ജിക്കേണ്ട കാര്യമില്ല.

നൊന്ത് പ്രസവിച്ച അമ്മയ്ക്ക് കുട്ടിയെ കിട്ടണം എന്ന് തന്നെയാണ്. പക്ഷെ, അനുപമ എന്ന് പറയുന്ന സ്ത്രീയ്ക്ക് കുട്ടിയെ കിട്ടണോ? ഈ കഴിഞ്ഞ മാസങ്ങളിലെല്ലാം ആ കുഞ്ഞ് നല്ലൊരു അച്ഛനും അമ്മയ്ക്കും ഒപ്പമാണ് ജീവിക്കുന്നത്. ഈ കുഞ്ഞിനെ ഇനി തിരികെ കൊടുക്കേണ്ടി വന്നാല്‍ അതെങ്ങനെ ആ മാതാപിതാക്കള്‍ സഹിക്കും. വിദ്യാസമ്ബന്നയും ധൈര്യവുമുള്ള അനുപമ ഇപ്പോള്‍ പറയുന്നത് ഭയപ്പെടുത്തിയാണ് ഒപ്പിടുവിച്ചതെന്നാണ്.

അതൊക്കെയെങ്ങനെയാണ് വിശ്വസിക്കാനാകും. അജിത്ത് അനുപമയെ സ്വീകരിക്കാന്‍ തയ്യാറാകാതിരുന്ന സമയം അവള്‍ക്ക് കുഞ്ഞിനെ വേണ്ടായിരുന്നു. ഭാര്യയെ ഉപേക്ഷിച്ച്‌ അനുപമയുടെ അടുത്ത് അയാള്‍ തിരിച്ച്‌ വന്നപ്പോള്‍ രണ്ട് പേര്‍ക്കും കുഞ്ഞിനെ വേണം', എന്നും ആശ ഷെറിന്‍ തന്റെ ഫേസ്‌ബുക്കില്‍ പങ്കുവെച്ച വീഡിയോയില്‍ ചോദിക്കുകയുണ്ടായി.