ആറ്റിങ്ങൽ വിദ്യാഭ്യാസ ജില്ലയിൽ ശാസ്ത്രാധ്യാപകനായ ഡോ. ആർ. പ്രസന്നകുമാർ പരവൂർ നഗരസഭയിലെ ശാസ്ത്രസാഹിത്യ പരിഷത്തിന്റെ സജീവപ്രവർത്തകനായിരുന്നു. എറണാകുളം ജില്ലാ സമ്പൂർണ സാക്ഷരതയിൽ ചില അക്കാദമിക പ്രവർത്തനങ്ങളിൽ പങ്കെടുക്കാൻ അവസരം ലഭിച്ചു. അത് കേരളമാകെ വ്യാപിപ്പിച്ചപ്പോൾ സമ്പൂർണ സാക്ഷരതയിൽ കൊല്ലം ജില്ലയിലെ റിസോഴ്സ് പേഴ്സണായി. ഇതായിരുന്നു തുടക്കം. ജനകീയാസൂത്രണജനകീയചരിത്രത്തെ കുറിച്ച് ഡോ .തോമസ് ഐസക്ക്.

ജനകീയാസൂത്രണം ആരംഭിച്ചപ്പോൾ പത്തനംതിട്ട ഡയറ്റിൽ സീനിയർ ലക്ച്ചററായിരുന്നു. ഇതേ കാലയളവിലാണ് ശിശുകേന്ദ്രീകൃത വിദ്യാഭ്യാസത്തിനും കേരളത്തിൽ തുടക്കം കുറിച്ചത്. അധികാരം ജനങ്ങളിലേയ്ക്ക് എന്ന മുദ്രാ ഗീതം മുഴങ്ങുന്ന സമയം ക്ലാസ് മുറിയിലും ശിശുകേന്ദ്രീകൃത പാഠ്യപദ്ധതിയിലൂടെ ക്ലാസു മുറികളിലെ അധികാരഘടനയിലും മാറ്റം കൊണ്ടുവരുവാൻ ശ്രമം നടക്കുകയായിരന്നു. കേരളത്തിൽ ജനകീയാസൂത്രണ പ്രസ്ഥാനവും ശിശുകേന്ദ്രീകൃത പാഠ്യപദ്ധതിയും ഒരേ സമയമാണ് പിറന്നു വീണതെന്നു പറയാം.

ശിശുകേന്ദ്രീകൃത പാഠ്യപദ്ധതിയുടെ ഭാഗമായി അധ്യാപക പരിശീലന പരിപാടിയിൽ ഏർപ്പെട്ടുകൊണ്ടിരിക്കെയാണ് സാക്ഷരതാ പ്രവർത്തനങ്ങളിലെ പ്രവർത്തനങ്ങൾ കണക്കിലെടുത്ത് കൊല്ലം ജില്ലയിലെ ജനകീയാസൂത്രണ പ്രസ്ഥാനത്തിന്റെ കീറിസോഴ്സ് പേഴ്സണായി തെരഞ്ഞെടുക്കപ്പെടുന്നത്. ജില്ലയിലെ ഡിആർപി പരിശീലനത്തോടൊപ്പം പരവൂർ നഗരസഭ, പൂതക്കുളം പഞ്ചായത്ത് എന്നിവ കേന്ദ്രീകരിച്ചുള്ള പ്രവർത്തനങ്ങളിലും മുഴുകി.

വികേന്ദ്രീകൃതാസൂത്രണം പരവൂരിനെ സംബന്ധിച്ചിടത്തോളം ഇരട്ടി മധുരമായിരുന്നു. 1964-1995 വരെ 32 വർഷക്കാലം പരവൂരിൽ പ്രാദേശിക തെരഞ്ഞെടുപ്പു നടന്നില്ല. 1983 മേയ് 1-ന് പരവൂർ നഗരസഭ ഔദ്യോഗികമായി നിലവിൽ വന്നു. 1995-ലാണ് നഗരസഭ ആയ ശേഷം ആദ്യ തെരഞ്ഞെടുപ്പു നടന്നത്. വാർഡുസഭകളിലെ ജനങ്ങളുടെ പങ്കാളിത്തം വൈകാരികമായ അനുഭവമായിരുന്നു.

ഭൂപ്രകൃതി പഠന പര്യടനം, ചരിത്ര സാംസ്ക്കാരിക വിഭവ ശേഖരണം, ഊണുമുറക്കവും ഉപേക്ഷിച്ചു ജനകീയാസൂത്രണ പ്രവർത്തകരോടൊപ്പമിരുന്നു വികസനരേഖ തയ്യാറാക്കൽ, സെമിനാർ എന്നിവയെല്ലാം ജീവിതത്തിലെ ഏറ്റവും മഹത്തരങ്ങളായ ഓർമ്മകളാണ്. പരവുരിന്റെയും പൂതക്കുളത്തിന്റെയും ചരിത്ര വസ്തുതകൾ ശേഖരിക്കാൻ വേണ്ടി മുൻമന്ത്രിയും അന്ന് ചാത്തന്നൂർ എംഎൽഎയും ആയിരുന്ന പി. രവീന്ദ്രൻ സാറുമായും മുൻ മന്ത്രി സി.വി. പത്മരാജൻ സാറുമായും അഭിമുഖം നടത്തിയത് പ്രസന്നകുമാർ ആയിരുന്നു.

കൊല്ലം ജില്ലയിൽ ഒമ്പതാം പദ്ധതി ജനകീയ പദ്ധതിയുടെ ആദ്യ വികസനരേഖ സമർപ്പിച്ചത് പൂതക്കുളം ഗ്രാമപഞ്ചായത്തായിരുന്നു. അത് ഏറ്റുവാങ്ങിയത് അന്നത്തെ വ്യവസായ വകുപ്പു മന്ത്രി സുശീലാഗോ പാലനായിരുന്നു. ജനകീയാസൂത്രണം നെഞ്ചിലേറ്റിയപ്പോൾ പിഎച്ച്ഡി ഗവേഷണം നിർത്തിവയ്ക്കേണ്ടി വന്നു. (പിന്നെ ഒരിടവേളക്കുശേഷം വിദ്യാഭ്യാസത്തിൽ പിഎച്ച്ഡിക്കുള്ള ശ്രമം നടത്തിയപ്പോൾ ജനകീയാസൂത്രണണ അനുഭവങ്ങൾ കരുത്തായി).

ജനകീയാസൂത്രണം സെമിനാർ കഴിഞ്ഞതോടെ പരവൂർ നഗരസഭയിൽ വർക്ക് അറേൻജ്മെന്റിൽ കോർഡിനേറ്റായി പ്രവർത്തിക്കാൻ തുടങ്ങി. പദ്ധതി നിർവഹണത്തിനുള്ള ജനകീയ സമതികൾ വരവു-ചെലവുകൾ പ്രദർശിപ്പിച്ചത് ജനങ്ങൾക്ക് ജനകീയാസൂത്രണ പ്രവർത്തനങ്ങളിലുള്ള മതിപ്പ് വർദ്ധിപ്പിച്ചു. രണ്ടു വർഷക്കാലം കോർഡിനേറ്ററായി പ്രവർത്തിച്ചു. സർവശിക്ഷാ അഭിയാനിൽ സംസ്ഥാന തലത്തിൽ പ്രോജക്ട് ഓഫീസറായി പ്രവർത്തിക്കവെ 2011-ൽ ബ്രിട്ടീഷ് കൗൺസിലിന്റെ പദ്ധതിയുടെ ഭാഗമായി യുകെയിൽ സ്കൂൾ സന്ദർശിക്കാൻ അവസരം ലഭിച്ചു.

അവിടെ ഗേറ്റ്സ് ഹെഡ് എന്ന സ്വയംഭരണാധികാരമുള്ള പട്ടണത്തിലെ മേയറിന്റെ വിരുന്നു സൽക്കാരത്തിൽ പങ്കെടുത്തു. ഞാൻ ഇന്ത്യയിൽ കേരളത്തിൽ നിന്നാണ് എന്നു പരിചയപ്പെടുത്തിയപ്പോൾ അദ്ദേഹം "ഓ, കേരള സ്റ്റേറ്റ് ഓഫ് പീപ്പിൾസ് പ്ലാനിംഗ്" എന്നു പറഞ്ഞ് അഭിനന്ദിച്ചു. ജനകീയാസൂത്രണത്തെക്കുറിച്ചു ഹ്രസ്വമായ ഒരു അവതരണം ഡോ. പ്രസന്നകുമാർ നടത്താൻ നിർബന്ധിതമായി.

കില സംഘടിപ്പിച്ച മില്ലിനിയം ഡവലപ്പ്മെന്റ് ഗോൾസ് (MGD), നവകേരളത്തിനു ജനകീയാസൂത്രണം മാർഗരേഖ (വിദ്യാഭ്യാസം) തുടങ്ങിയ പ്രവർത്തനങ്ങളിലും പങ്കാളിയായി. 2018-ൽ SCERT നടത്തിയ പ്രാദേശിക ഭരണകൂടങ്ങൾ ജനകീയാസൂത്രണത്തിലൂടെ വിദ്യാലയങ്ങളിൽ നടപ്പിലാക്കിയ പദ്ധതികളുടെ ഫലപ്രാപ്തി പഠനം എന്ന ഗവേഷണത്തിലും പങ്കാളിയാകാൻ സാധിച്ചു.

സർവീസിൽ നിന്നും വിരമിച്ച ശേഷം 2015-20 കാലഘട്ടത്തിൽ പരവൂർ നഗരസഭയിൽ ആസൂത്രണ സമിതി ഉപാധ്യക്ഷനായി. കിലയുടെ റിസോൾസ് പേഴ്സൺ എന്ന നിലയിൽ പരവൂർ നഗരസഭയിലെ പരിശീലന കോർഡിനേറ്ററായും പ്രവർത്തിച്ചുവരുന്നു.

തിരിഞ്ഞു നോക്കുമ്പോൾ ഒമ്പതാം പദ്ധതി ജനകീയ പദ്ധതി മുതൽ തുടർന്ന് ഇങ്ങോട്ടു മാറിമാറിവന്ന നഗരസഭാ ഭരണസമിതികളുടെ കാലങ്ങളിലും ഒന്ന് അല്ലെങ്കിൽ മറ്റൊരു റോളിൽ ജനങ്ങൾക്കൊപ്പം പ്രവർത്തിക്കിനായതിൽ ഡോ. ആർ. പ്രസന്നകുമാർ അഭിമാനം കൊള്ളുന്നു.
#ജനകീയാസൂത്രണജനകീയചരിത്രം