സംസ്ഥാനത്തെ സ്‌കൂളുകള്‍ തുറക്കുന്നതിന് മുന്നോടിയായി എല്ലാ സജ്ജീകരണങ്ങളും പൂര്‍ത്തിയായതായി വിദ്യാഭ്യാസ മന്ത്രി വി ശിവന്‍കുട്ടി അറിയിച്ചു. സ്‌കൂള്‍ തുറക്കുന്നത് സംബന്ധിച്ച് ആശങ്ക വേണ്ടെന്നും ആദ്യ രണ്ടാഴ്ച ഹാജരുണ്ടാകില്ലെന്നും മന്ത്രി പറഞ്ഞു.

നവംബര്‍ ഒന്നിന് സ്‌കൂള്‍ തുറക്കുന്നതുമായി ബന്ധപ്പെട്ട് നടത്തിയ വാര്‍ത്താസമ്മേളനത്തിലാണ് മന്ത്രി ഇക്കാര്യം അറിയിച്ചത്. സ്‌കൂള്‍ തുറന്നതിനുശേഷമുള്ള ആദ്യ ദിവസങ്ങളില്‍ വിദ്യാര്‍ത്ഥികളുടെ ആത്മവിശ്വാസം വര്‍ദ്ധിപ്പിക്കുന്ന പാഠങ്ങള്‍ മാത്രമായിരിക്കും പഠിപ്പിക്കുകയെന്നും മന്ത്രി വ്യക്തമാക്കി.
1 മുതല്‍ 7 വരെയുള്ള ക്ലാസുകളിലെ വിദ്യാര്‍ത്ഥികള്‍ക്കും, 10, 12 ക്ലാസിലെ വിദ്യാര്‍ത്ഥികള്‍ക്കുമാണ് നവംബര്‍ ഒന്നിന് ക്ലാസുകള്‍ ആരംഭിക്കുന്നത്. മറ്റെല്ലാ വിദ്യാര്‍ത്ഥികള്‍ക്കും നവംബര്‍ 15ന് ക്ലാസുകള്‍ ആരംഭിക്കും. സ്‌കൂളില്‍ എത്തുന്ന വിദ്യാര്‍ത്ഥികളുടെ ശരീര ഊഷ്മാവ് പരിശോധിക്കുന്നതിന് 24,300 തെര്‍മല്‍ സ്‌കാനറുകള്‍ വിദ്യാലയങ്ങളില്‍ വിതരണം ചെയ്തിട്ടുണ്ടെന്ന് മന്ത്രി അറിയിച്ചു.
തിരഞ്ഞെടുപ്പിന് ഉപയോഗിച്ച ഉപകരണങ്ങളാണിത്. പരിസരശുചീകരണം, അണുനശീകരണം എന്നിവ നടത്താന്‍ ഇനിയും 204 സ്‌കൂളുകള്‍ ഉണ്ടെന്ന് മന്ത്രി പറഞ്ഞു. പ്രവര്‍ത്തനങ്ങള്‍ വേഗത്തിലാക്കാന്‍ ഈ വിദ്യാലയങ്ങള്‍ക്ക് മന്ത്രി നിര്‍ദ്ദേശം നല്‍കി. പ്രവേശനോത്സവത്തോടെയാണ് നവംബര്‍ ഒന്നിന് സ്‌കൂള്‍ തുറക്കുന്നത്.
സംസ്ഥാനതല ഉദ്ഘാടനം തിരുവനന്തപുരത്തെ കോട്ടണ്‍ ഹില്‍ സ്‌കൂളില്‍ രാവിലെ 8.30 ന് നടക്കുമെന്നും മന്ത്രി വാര്‍ത്താസമ്മേളത്തില്‍ പറഞ്ഞു. സംസ്ഥാനത്തെ 15,452 സ്‌കൂളുകളില്‍ ഫിറ്റ്‌നസ് ലഭിക്കാനുള്ളവയുടെ എണ്ണം 446 ആണ്. 1,474 സ്‌കൂള്‍ ബസുകള്‍ ഇനിയും പ്രവര്‍ത്തനക്ഷമമാക്കാനുണ്ട്. വാക്‌സിന്‍ എടുക്കാത്ത അദ്ധ്യാപകര്‍ 2,282ഉം, വാക്‌സിന്‍ എടുക്കാത്ത അനദ്ധ്യാപകര്‍ 327മാണെന്ന് വി ശിവന്‍കുട്ടി വ്യക്തമാക്കി.
സോപ്പ്, ഹാന്‍ഡ് വാഷ്, ബക്കറ്റ് എന്നിവ വാങ്ങുന്നതിന് വിദ്യാലയങ്ങള്‍ക്ക് 2.85 കോടി രൂപ നല്‍കിയതായി മന്ത്രി പറഞ്ഞു. സ്‌കൂളുകളില്‍ ഉച്ചഭക്ഷണ പദ്ധതി നടപ്പിലാക്കാന്‍ 105.5 കോടി രൂപ മുന്‍കൂറായി നല്‍കിയിട്ടുണ്ട്. കൂടാതെ പിടിഎ ജനറല്‍ ബോഡി ഓണ്‍ലൈനായി ചേര്‍ന്ന് ഭാരവാഹികളെ തിരഞ്ഞെടുക്കാന്‍ മന്ത്രി നിര്‍ദ്ദേശിച്ചു.
42,65,273 വിദ്യാര്‍ഥികളാണ് രണ്ടു ഘട്ടമായി സ്‌കൂളിലേക്കെത്തുക. ഇതില്‍ 6,07,702 പേര്‍ നവാഗതരാണ്. സര്‍ക്കാര്‍എയ്ഡഡ് മേഖലയില്‍ മുന്‍വര്‍ഷത്തെ അപേക്ഷിച്ച് 28,482 കുട്ടികളാണ് ഒന്നാം ക്ലാസില്‍ ഇക്കൊല്ലം പ്രവേശിച്ചത്.
202021ല്‍ സര്‍ക്കാര്‍ മേഖലയില്‍ 1,05472 കുട്ടികളും എയ്ഡഡ് മേഖലയില്‍ 1,71,460 കുട്ടികളുമടക്കം 2,76,932 കുട്ടികളാണ് ഒന്നാം ക്ലാസില്‍ ചേര്‍ന്നത്. 202122 അധ്യയന വര്‍ഷത്തില്‍ സര്‍ക്കാര്‍ വിദ്യാഭ്യാസ സ്ഥാപനങ്ങളില്‍ 1,20,706 കുട്ടികളും എയ്ഡഡ് സ്‌കൂളുകളില്‍ 1,84,708 കുട്ടികളും പ്രവേശനം നേടിയതായി മന്ത്രി പറഞ്ഞു.