ഇടത് വശം ചേർന്ന് പോയ ബൈക്കിൽ ഇടിക്കാതിരിക്കാൻ വെട്ടിച്ച കാർ മരത്തിൽ ഇടിച്ചുണ്ടായ അപകടത്തിൽ പൊലിഞ്ഞത് റാമ്പിൽ ഒരുമിച്ച സൗഹൃദപൂക്കൾ. മിസ് കേരള സൗന്ദര്യ മത്സരത്തിന് മുന്നോടിയായുള്ള പരിശീലനനാളുകളിലായിരുന്നു അൻസിയും അഞ്ജനയും സൗഹൃദത്തിലാകുന്നത്.

റാംപിൽ കടുത്ത മത്സരങ്ങൾ ആയിരുന്നെങ്കിലും ഇരുവരുടെ സൗഹൃദത്തെയും അത് ബാധിച്ചിരുന്നില്ല. കൊച്ചിയിൽ ഒരു പരിപാടിയിൽ പങ്കെടുത്തശേഷം മടങ്ങുമ്പോൾ ഇരുവരും സഞ്ചരിച്ചിരുന്ന കാർ എറണാകുളം ബൈപ്പാസ് റോഡിൽ ഹോളിഡേ ഇൻഹോട്ടലിന് മുന്നിൽ അപകടത്തിൽപ്പെടുകയായിരുന്നു.

കൊച്ചിയിൽ നിന്ന് അഞ്ജനയുടെ തൃശൂരിലെ വീട്ടിലേയ്ക്ക് മടങ്ങും വഴിയായിരുന്നു അപകടമെന്ന് കാറിൽ ഒപ്പമുണ്ടായിരുന്ന സുഹൃത്ത് പറയുന്നു. കാറിൽ മുന്നിലും പിന്നിലുമായി ഇടതു വശത്തിരുന്ന രണ്ടു പേരുമാണ് മരിച്ചത്. മുൻ സീറ്റിലിരുന്ന യുവതി വാഹനത്തിൽ ഞെരിഞ്ഞമർന്നു. പിന്നിലിരുന്ന യുവതി പുറത്തേയ്ക്കു തെറിച്ചുവീണ് മീഡിയനിൽ തലയിടിച്ചുണ്ടായ പരുക്ക് മൂലമാണ് മരിച്ചതെന്ന് പൊലീസ് പറഞ്ഞു.

പുറക് സീറ്റിൽ ഇരുന്ന അന്‍സി കബീര്‍, അഞ്ജന ഷാജന്‍ എന്നിവർ ഇടിയുടെ ആഘാതത്തിൽ മുന്നോട്ട് തെറിച്ച് വന്ന് മുൻ ഗ്ളാസു വരെ തകർത്തു എന്നാണ്‌ കരുതുന്നത്. പിൻ സീറ്റിൽ ഇരുന്ന അന്‍സി കബീര്‍,അഞ്ജന ഷാജന്‍ ഇവർ സീറ്റ് ബെൽറ്റ് ഇട്ടിരുന്നു എങ്കിൽ ദാരുണമായ ദുരന്തത്തിൽ നിന്നും രക്ഷപെടുമായിരുന്നു എന്നും പോലീസ് പറയുന്നു.

ബൈക്കിൽ ഇടിച്ചെങ്കിലും യാത്രക്കാരന് കാര്യമായ പരുക്കില്ല. ഡ്രൈവർ സീറ്റിൽ എയർ ബാഗ് ഉണ്ടായിരുന്നതിനാൽ ഡ്രൈവർക്ക് കാര്യമായ പരുക്കുകൾ സംഭവിച്ചില്ല. പിന്നിൽ വലതുവശത്തിരുന്ന യുവാവ് മുന്നിലേയ്ക്കു തെറിച്ചു വീണു തലയ്ക്ക് കാര്യമായി പരുക്കേറ്റിട്ടുണ്ട്.

തിരുവനന്തപുരം ആറ്റിങ്ങൽ ആലങ്കോട് സ്വദേശിനിയാണ് അൻസി കബീർ. തൃശൂർ സ്വദേശിനിയാണ് അൻജന ഷാജൻ. സംഭവ സ്ഥലത്തുവച്ചു തന്നെ ഇരുവരും മരിച്ചു. നാലുപേരാണ് വാഹനത്തിലുണ്ടായിരുന്നത്. ഒപ്പമുണ്ടായിരുന്ന രണ്ടുപേരിൽ ഒരാളുടെ അവസ്ഥ ഗുരുതരമാണ്. ഇരുവരും എറണാകുളം മെഡിക്കൽ സെന്ററിൽ ചികിത്സയിലുണ്ട്.

പറന്നുയരും മുമ്പേ കൊഴിഞ്ഞ് പോയ മലയാളത്തിന്റെ വശ്യ സൗന്ദര്യം ആയിരുന്നു അഞ്ജനയും അൻസിയും. കൂട്ടുകാരികൾ പ്രഫഷണലിനും മരണത്തിലും ഒന്നിച്ചപ്പോൾ ആർക്കും ഇത് വിശ്വസിക്കാൻ ആകുന്നില്ല. സൗന്ദര്യ മൽസരത്തിൽ തുടങ്ങിയ ഇവരുടെ സൗഹൃദ ബന്ധം മരണത്തിലും ഒന്നിച്ചപ്പോൾ എന്ത് പറഞ്ഞ് കുടുംബത്തേ ആശ്വസിപ്പിക്കും എന്നറിയാതെ തേങ്ങുകയാണ്‌ കൂട്ടുകാർ. അൻസിക്ക് മിസ് കേരള പട്ടം കിട്ടി ആദ്യ ഒരാഴ്ച ഒരുപാട് അഭിനന്ദനങ്ങളും സന്തോഷങ്ങളുമായി നിറയെ ആവേശമായിരുന്നു ചുറ്റിലും. ആ അഭിനന്ദനങ്ങളും സന്തോഷങ്ങളുമെല്ലാം ഒരായുസിന്റെ ആവേശമാണ് തന്നിൽ നിറച്ചതെന്ന് അൻസി പറഞ്ഞിരുന്നു.

കിരീട നേട്ടത്തിലൂടെ സാക്ഷാത്കരിച്ചത് അമ്മയുടെ സ്വപ്നം കൂടിയാണെന്നും ആൻസി പറഞ്ഞിരുന്നു. മണപ്പുറം സൗത്ത് ഇന്ത്യ 2021 കിരീടം അൻസി കബീർ സ്വന്തമാക്കിരുന്നു. കൂടാതെ 2019 ൽ സ്വയംവര സിൽക്‌സ് നടത്തിയ മിസ് കേരള മത്സരത്തിൽ സൗന്ദര്യ റാണിയായി അൻസി കബീറിനെ തിരഞ്ഞെടുത്തിരുന്നു.

അൻജനയുടെ സഹോദരൻ അപകടമറിഞ്ഞ് രാത്രിയിൽ തന്നെ കൊച്ചിയിൽ എത്തിയിരുന്നു. അൻസിയുടെ തിരുവനന്തപുരത്തുള്ള ബന്ധുക്കളും കൊച്ചിയിൽ എത്തി. എറണാകുളം മെഡിക്കൽ സെന്ററിലാണ് ഇരുവരുടെയും മൃതദേഹം സൂക്ഷിച്ചിരിക്കുന്നത്.