അമ്പരപ്പിന്റെ നിമിഷങ്ങള്... വാഹനാപകടത്തില് മരിച്ച മിസ് കേരള റണ്ണര് ഡോ. അഞ്ജന യാത്രയായത് തന്റെ കന്നിച്ചിത്രത്തിന്റെ റിലീസ് കാണാന് കഴിയാതെ; മികച്ച അഭിനയം കാഴ്ചവച്ച അഞ്ജനയെപ്പറ്റി സെറ്റിലുള്ളവര്ക്ക് നല്ലത് മാത്രമേ പറയാനുള്ളൂ
എറണാകുളം വൈറ്റിലയില് വാഹനാപകടത്തില് മരിച്ച മിസ് കേരള റണ്ണര് അപ്പ് തൃശൂര് ആളൂര് അമ്പാടന് വീട്ടില് ഷാജന്റെ മകള് ഡോ. അഞ്ജന യാത്രയായത് തന്റെ കന്നിച്ചിത്രത്തിന്റെ റിലീസ് അടുത്തമാസം നടക്കാനിരിക്കെയാണ്. സിനിമയില് വലിയ അവസരങ്ങളാണ് അഞ്ജനയെ കാത്തിരുന്നത്.
സൗന്ദര്യമത്സരങ്ങളില് തിളങ്ങിയ അഞ്ജനയ്ക്ക് വെള്ളിത്തിരയില് തിളങ്ങാനും മോഹമുണ്ടായിരുന്നു. റോഷന് ആന്ഡ്രൂസ് സംവിധാനം ചെയ്യുന്ന ദുല്ഖര് സല്മാന് ചിത്രമായ 'സല്യൂട്ടി' ല് നല്ലൊരു വേഷം ഡോ. അഞ്ജന ചെയ്തിരുന്നു. എന്നാല് ചിത്രം പുറത്തിറങ്ങും മുന്പ് അഞ്ജനയെ മരണം കവര്ന്നു.
ദുല്ഖറിനൊപ്പമുള്ള കോമ്പിനേഷന് സീനായിരുന്നു അഞ്ജനയുടേത്. തുടക്കക്കാരി എന്ന തോന്നല് ഉണ്ടാക്കാതെ മികച്ച അഭിനയമാണ് ചിത്രത്തില് അഞ്ജന കാഴ്ചവച്ചതെന്ന് സെറ്റിലുള്ളവര് ഓര്ത്തെടുക്കുന്നു. സെറ്റിലുള്ള എല്ലാവരുടെയും സ്നേഹം നേടിയ അഞ്ജനയുടെ മരണത്തിന്റെ ഞെട്ടലിലാണ് 'സല്യൂട്ടി'ന്റെ അണിയറ പ്രവര്ത്തകര്. അഞ്ജന അഭിനയിച്ച 'കമ്മല് സ്റ്റോറി ' എന്ന ഹ്രസ്വചിത്രം കഴിഞ്ഞ ദിവസം പുറത്തിറങ്ങിയിരുന്നു. വര്ഷങ്ങളായി മോഡലിംഗ് രംഗത്തുള്ള അഞ്ജന നിരവധി പരസ്യചിത്രങ്ങളിലും അഭിനയിച്ചിട്ടുണ്ട്.
അഞ്ജനയും ഒപ്പം മരിച്ച അന്സിയും സൗന്ദര്യ മത്സരങ്ങളില് ഒരുമിച്ചു പങ്കെടുത്തതു മുതല് തുടങ്ങിയ സൗഹൃദമായിരുന്നു. കോവിഡ് കാലത്തും സൗഹൃദം കാത്തുസൂക്ഷിച്ച ഇവര് പല പരിപാടികളിലും ഒന്നിച്ചു പങ്കെടുത്തു. അത്തരത്തില് ഒരു പരിപാടിയില് പങ്കെടുക്കാനാണ് ഇരുവരും കൊച്ചിയില് എത്തിയത്. റാന്പില് തുടങ്ങിയ ആ സൗഹൃദം മരണത്തിലും പിരിഞ്ഞില്ല.
കൊച്ചിയില് ഹ്രസ്വചിത്രത്തിന്റെ ഷൂട്ടിങ് സ്ഥലത്തുനിന്നു ഡോ. അഞ്ജന ഷാജന് തിരക്കിട്ടു മടങ്ങാന് കാരണം വീട്ടില് അമ്മ തനിച്ചായതുകൊണ്ടാണ്. അച്ഛന് ഷാജന് ആലുവയിലെ ജോലി സ്ഥലത്തായതിനാല് അമ്മ ലതിക വീട്ടില് ഒറ്റയ്ക്കായിരുന്നു. സോഫ്റ്റ്വെയര് എന്ജിനീയറായ സഹോദരന് അര്ജുന് കൊച്ചിയിലായിരുന്നു.
ശനിയാഴ്ചയാണ് അഞ്ജന ആളൂരിലെ വീട്ടില്നിന്നു കൊച്ചിയില് ഷൂട്ടിങ്ങിനെത്തിയത്. ചിത്രീകരണം പൂര്ത്തിയായപ്പോള് വൈകി. മിസ് കേരള മത്സരത്തിലെ ജേതാവും കൂട്ടുകാരിയുമായ അന്സി കബീറിനൊപ്പം കാറിന്റെ പിന്സീറ്റിലിരുന്നയിരുന്നു യാത്ര.
പ്ലസ്ടു വരെയുള്ള പഠനം ഹൈദരാബാദിലെ കേന്ദ്രീയ വിദ്യാലയത്തില് പൂര്ത്തിയാക്കിയ ശേഷമാണ് അഞ്ജന ബിഎഎംഎസ് പൂര്ത്തിയാക്കിയത്. കുറച്ചുനാള് ബെംഗളൂരുവുവിലെ ആശുപത്രിയില് സേവനമനുഷ്ഠിച്ചിരുന്നു.
അതേസമയം യാഥാസ്ഥിതിക കുടുംബത്തില്നിന്നു ഫാഷന് ലോകത്തേയ്ക്ക് എത്തിയ അന്സി കബീറിന്റെ എല്ലാ വിജയങ്ങള്ക്കും പിന്നില് ഉമ്മ റസീന ബീവിയായിരുന്നു. 2019ല് റാംപില് നേടിയ സുന്ദരിപ്പട്ടം അന്സി അന്നു സമര്പ്പിച്ചത് പ്രിയപ്പെട്ട ഉമ്മയ്ക്കാണ്. വീട്ടിലെ ഏക മകള്. സ്വപ്നം കണ്ട വിജയങ്ങളെല്ലാം കൈപ്പിടിയിലൊതുക്കാന് മകളെ പ്രാപ്തയാക്കുകയായിരുന്നു ആ ഉമ്മ.
ഈ വര്ഷത്തെ മിസ് സൗത്ത് ഇന്ത്യ കിരീടവും അന്സി കബീര് നേടിയിരുന്നു. മകളുടെ ആഗ്രഹങ്ങളെ ഉമ്മ പിന്തുണച്ചപ്പോള് പിതാവും കാര്യമായി എതിര്ത്തില്ല. ഒടുവില് മിസ് കേരള സൗന്ദര്യ കിരീടം സ്വന്തമാക്കി. കൂട്ടുകാര്ക്കൊപ്പം കൊച്ചിയില് നിന്നും മടങ്ങുമ്പോഴായിരുന്നു അന്സിയുടെ അന്ത്യം. സൗന്ദര്യകിരീടം അണിഞ്ഞതിനു പിന്നാലെ സിനിമാ മോഹങ്ങളാണ് അന്സി മനസ്സില് സൂക്ഷിച്ചിരുന്നത്.
"
https://www.facebook.com/Malayalivartha
