കട്ടവനെ കിട്ടിയില്ലെങ്കില് കണ്ടവനെ പിടിക്കുക... ലഹരിവില്പന സംഘത്തെ തേടിയെത്തിയ എക്സൈസ് സംഘം ആളുമാറി നിരപരാധിയെ മര്ദിച്ചെന്ന് ആരോപണം;കേസിലെ പ്രതി നല്കിയ പേരും, യുവാവിന്റെ പേരും ഒന്നായിരുന്നുവെന്നാണ് എക്സൈസിന്റെ വിശദീകരണം
തൊടുപുഴയില് ലഹരിവില്പന സംഘത്തെ തേടിയെത്തിയ എക്സൈസ് സംഘം ആളുമാറി നിരപരാധിയായ യുവാവിനെ മര്ദിച്ചെന്ന് ആരോപണം. നാട്ടുകാരുടെ സമയോചിതമായ ഇടപെടലില് യുവാവ് രക്ഷപ്പെട്ടുവെന്ന് വേണമെങ്കില് പറയാം. നാട്ടുകാരുടെ എതിര്പ്പിനെ തുടര്ന്ന് യുവാവിനെ പിന്നീട് മോചിപ്പിച്ച് എക്സൈസുകാര് തലയൂരി. കേസിലെ പ്രതി നല്കിയ പേരും, യുവാവിന്റെ പേരും ഒന്നായിരുന്നുവെന്നാണ് എക്സൈസ് പൊലീസിന് നല്കിയ വിശദീകരണം.
തൊടുപുഴ വെങ്ങല്ലൂര് പള്ളിക്കുറ്റിയില് എക്സൈസ് ഉദ്യോഗസ്ഥര് പരിശോധനനക്കെത്തിയപ്പോള് റോഡുവക്കില് തമ്പടിച്ചിരുന്ന യുവാക്കളുടെ സംഘം ചിതറിയോടി. ഈ സമയം ഇതുവഴി നടന്നുവന്ന യുവാവിനെ ആളുമാറി കസ്റ്റഡിയിലെടുത്തു. എം.ഡി.എം.എ കേസില് പിടിയിലായവര് നല്കിയ വിവരത്തിന്റെ അടിസ്ഥാനത്തിലാണ് യുവാവിനെ അറസ്റ്റു ചെയ്യുന്നതെന്നാണ് എക്സൈസ് സംഘം ആദ്യം പറഞ്ഞത്.
പിടിയിലായ യുവാവിനെ വിലങ്ങിട്ട ശേഷം എക്സൈസ്സംഘം മര്ദിച്ചെന്നും നാട്ടുകാര് ആരോപിച്ചു. ഇതുകണ്ട്നാട്ടുകാര് പ്രതിഷേധവുമായി രംഗത്തെത്തി. യുവാവ് നിരപരാധിയെന്ന് അയല്ക്കാര് പറഞ്ഞിട്ടും ആദ്യം ഉദ്യോഗസ്ഥര് വഴങ്ങിയില്ല. തുടര്ന്ന് നാട്ടുകാരും ഉദ്യോഗസ്ഥരും തമ്മില് വാക്കേറ്റമായി.മകനെ എക്സൈസ് ഉദ്യോഗസ്ഥര് ക്രൂരമായി മര്ദിച്ചെന്ന് അച്ഛന് ആരോപിച്ചു. യുവാവ് തൊടുപുഴയിലെ സ്വകാര്യ ആശുപത്രിയില് ചികില്സയിലാണ്.
കഴിഞ്ഞവര്ഷവും ഇത്തരത്തില് ഒരു സംഭവം അരങ്ങേറിയിരുന്നു. കൊല്ലം അഞ്ചലില് യുവാവിനെ ആളുമാറി എക്സൈസ് സംഘം മര്ദിച്ചിരുന്നു. രാത്രിയില് സുഹൃത്തിനൊപ്പം യുവാവ് ബൈക്കില് വീട്ടിലേക്ക് വരുകയായിരുന്നു. വീടിന്റെ മുന്നിലെത്തിയപ്പോള് എക്സൈസ് സംഘം ജീപ്പില് പാഞ്ഞെത്തി.
വാഹത്തില് നിന്നു ചാടി ഇറങ്ങിയ ഉദ്യോഗസ്ഥര് ഒന്നും ചോദിക്കാതെ മര്ദിച്ചെന്നാണ് യുവാവ് പരാതി നല്കിയത്. യുവാവിന്റെ പരാതിയില് അഞ്ചല് പൊലീസ് എക്സൈസ് ഉദ്യോഗസ്ഥരുടെ മൊഴി എടുത്തു.
നാലു കിലോ കഞ്ചാവുമായി രണ്ടു യുവാക്കള് തടിക്കാട് ഭാഗത്തേക്ക് വരുന്നു എന്ന രഹസ്യവിവരത്തിന്റെ അടിസ്ഥാനത്തിലാണ് എത്തിയതെന്ന് എക്സൈസ് ഉദ്യോഗസ്ഥര് പറഞ്ഞു. ആള് മാറി പോയതാണെന്നും മര്ദനമേറ്റവര്ക്ക് കേസുമായി ഒരു ബന്ധവുമില്ലന്നും വിശദീകരിച്ചു.
https://www.facebook.com/Malayalivartha
