ഈ കെ.എസ്.ആര്‍.ടി.സി.യെ നന്നാക്കാന്‍ ശ്രമിച്ച് പുറത്തായവരാണ് ടോമിന്‍ തച്ചങ്കരി ഉള്‍പ്പെടെയുള്ള പ്രമുഖര്‍. യൂണിയന്‍ കളിച്ച് കുളമാക്കിയ കെ.എസ്.ആര്‍.ടി.സി.യെ ഒരു പരിധിവരെ തച്ചങ്കരി പിടിച്ച് നിര്‍ത്തിയതാണ്. എന്നാല്‍ തച്ചങ്കരിയ്ക്കും പുറത്ത് പോകേണ്ടി വന്നു. ഇപ്പോള്‍ ബിജു പ്രഭാകറാണ് എംഡി. കെ.എസ്.ആര്‍.ടി.സി.യെ രക്ഷിക്കാന്‍ പുതിയ പദ്ധതികള്‍ കൊണ്ടു വരുന്നതിനിടയിലാണ് അപ്രതീക്ഷിത സമരം. അതും രണ്ട് ദിവസം.

കൊറോണ കഴിഞ്ഞ് ജനം വെളിയില്‍ ഇറങ്ങി തുടങ്ങിയതേയുള്ളൂ. കെ.എസ്.ആര്‍.ടി.സി. പോലും പല ഷെഡ്യൂളും തുടങ്ങിയിട്ടില്ല. നഷ്ടത്തിലാണ് ഓടുന്നത്. എന്നിട്ടും അവര്‍ രണ്ട് ദിവസം സമരം ചെയ്തു. ഒരു വണ്ടിയും ഓടിയില്ല. കൊറോണ കാലത്ത് അഞ്ച് പൈസയുടെ ജോലി ചെയ്യാതെ മുഴുവന്‍ ശമ്പളവും വാങ്ങിയിട്ട് ഒന്ന് ഓടി തുടങ്ങിയപ്പോള്‍ കെ.എസ്.ആര്‍.ടി.സി.യ്ക്ക് 3 കോടി നഷ്ടം വരുത്തിയാണ് സമരം ചെയ്തത്. സമരം ജയിച്ചു ജനം തോറ്റു.

സമരം വിജയിച്ചെത്തിയ ജീവനക്കാര്‍ കണ്ടത് ഞെട്ടിക്കുന്ന വാര്‍ത്തയാണ്. മാര്‍ച്ച് വരെ പരമാവധി 3800 സര്‍വീസുകള്‍ മാത്രമേ ഓടിക്കാന്‍ കഴിയൂവെന്നും നിലവിലെ സാഹചര്യത്തില്‍ 7500 സ്ഥിരംജീവനക്കാരെ താത്കാലികമായി മാറ്റിനിര്‍ത്തിയാല്‍ നഷ്ടം കുറയ്ക്കാമെന്നും കെ.എസ്.ആര്‍.ടി.സി.

ബസുകളില്‍ 40 ശതമാനം നഷ്ടത്തിലാണ്. യാത്രക്കാര്‍ കൂടാതെ കൂടുതല്‍ ബസുകള്‍ ഇറക്കുക പ്രായോഗികമല്ല. ലോക്ഡൗണിനെത്തുടര്‍ന്ന് ഒതുക്കിയിട്ടിരിക്കുന്ന 2500 ബസുകള്‍ നന്നാക്കി റോഡിലിറക്കിയാല്‍ ലാഭമുണ്ടാകില്ലെന്നും സര്‍ക്കാരിനു നല്‍കിയ റിപ്പോര്‍ട്ടില്‍ പറയുന്നു.

താത്കാലിക ജീവനക്കാരെ ഒഴിവാക്കിയശേഷം 5250 ബസുകള്‍ക്കുവേണ്ട സ്ഥിരജീവനക്കാരുടെ തസ്തികകള്‍ നിജപ്പെടുത്തിയിരുന്നു. എന്നാല്‍, നിലവിലെ സാഹചര്യത്തില്‍ 4250 ബസുകള്‍ക്ക് 20,468 ജീവനക്കാര്‍ മതി. ശേഷിക്കുന്നവരെ പകുതി ശമ്പളം നല്‍കി തത്കാലത്തേക്കു മാറ്റിനിര്‍ത്തിയാല്‍ നഷ്ടം കുറയ്ക്കാം. സ്വയം സന്നദ്ധരാകുന്ന ജീവനക്കാരെ ഇതിനു പരിഗണിക്കാമെന്ന് റിപ്പോര്‍ട്ടില്‍ പറയുന്നു. ഇവര്‍ക്ക് പകുതി ശമ്പളം നല്‍കിയാല്‍പ്പോലും മാസം 10 കോടി ലാഭിക്കാം. 2020 മാര്‍ച്ചുമുതല്‍ സര്‍ക്കാര്‍ സഹായത്തിലാണ് ശമ്പളം നല്‍കുന്നത്. ഇടക്കാല ആശ്വാസം ഉള്‍പ്പെടെ മാസശമ്പളം നല്‍കാന്‍ 84 കോടി രൂപ നല്‍കണം.

ജീവനക്കാരെ മാറ്റിനിര്‍ത്താനുള്ള നിര്‍ദേശം തൊഴിലാളി നേതൃത്വം ഇതുവരെ അംഗീകരിച്ചിട്ടില്ല. ട്രിപ്പ് മാനേജ്‌മെന്റ് എന്നപേരില്‍ ലാഭകരമായ റൂട്ടുകളില്‍ മാത്രം ഓടിക്കുന്ന പരീക്ഷണമാണ് നഷ്ടമുണ്ടാക്കുന്നതെന്ന് തൊഴിലാളി യൂണിയനുകള്‍ ആരോപിക്കുന്നു.

ലോക്ഡൗണിനെത്തുടര്‍ന്ന് നിര്‍ത്തിയ ലാഭകരമായ റൂട്ടുകളെല്ലാം പരീക്ഷണാടിസ്ഥാനത്തില്‍ ഒരു മാസത്തേക്കെങ്കിലും ഓടിക്കാന്‍ തയ്യാറാകണമെന്ന് അവര്‍ ആവശ്യപ്പെടുന്നു. ആദ്യ ദിവസങ്ങളില്‍ നഷ്ടമുണ്ടാകുമെങ്കിലും കൃത്യമായി ബസ്സോടിച്ചാല്‍ യാത്രക്കാരെ കിട്ടുമെന്നും സംഘടനകള്‍ വാദിക്കുന്നു. ലാഭകരമായി നടത്തിയിരുന്ന ചെയിന്‍ സര്‍വീസുകള്‍ പൂര്‍ണമായി പുനരാരംഭിക്കാത്തതിനെയും തൊഴിലാളികള്‍ വിമര്‍ശിക്കുന്നു.

സര്‍ക്കാരിനെ വെല്ലുവിളിച്ച് സമരം നടത്തിയ കെ.എസ്.ആര്‍.ടി.സി. ജീവനക്കാര്‍ ഇരിക്കുന്ന കൊമ്പ് മുറിക്കുകയാണ് ചെയ്തത്. ഇനിയും അനിശ്ചിതകാല സമരത്തിന് പോകുമെന്നാണ് പറയുന്നത്. മരം ഉണ്ടായാലല്ലേ കൊമ്പ് മുറിയ്ക്കാന്‍ പറ്റൂ. ജീവനക്കാര്‍ക്കും പെന്‍ഷന്‍കാര്‍ക്കും ശമ്പളവും പെന്‍ഷനും കൊടുക്കാന്‍ പാടുപെടുകയാണ് കെ.എസ്.ആര്‍.ടി.സി. ന്യായമായ ആവശ്യമാണെങ്കിലും വേണമായിരുന്നോ ഈ സമരം.