മുല്ലപ്പെരിയാറിലെ വിവാദ മരംമുറി ഉത്തരവില് ജുഡീഷല് അന്വേഷണം വേണമെന്ന് പ്രതിപക്ഷം നിയമസഭയില്
മുല്ലപ്പെരിയാറിലെ വിവാദ മരംമുറി ഉത്തരവില് ജുഡീഷല് അന്വേഷണം വേണമെന്ന് പ്രതിപക്ഷം നിയമസഭയില്. സംസ്ഥാനത്തിന്റെ താല്പര്യത്തിന് വിരുദ്ധമാണ് ഉത്തരവെന്നും പ്രതിപക്ഷം വ്യക്തമാക്കി. ഇക്കാര്യങ്ങള് ചൂണ്ടിക്കാട്ടി തിരുവഞ്ചൂര് രാധാകൃഷ്ണന് എംഎല്എ സഭയില് അടിയന്തരപ്രമേയത്തിന് നോട്ടീസ് നല്കി.
തമിഴ്നാടിനെ സഹായിക്കാന് ഗൂഢശ്രമം നടക്കുന്നതായി ഉത്തരവിലൂടെ വ്യക്തമായെന്നും തിരുവഞ്ചൂര്. അതേസമയം മുല്ലപ്പെരിയാറില് ബേബി ഡാമിനു സമീപത്തെ 23 മരങ്ങള് മുറിക്കാന് തമിഴ്നാട് ആവശ്യപ്പെട്ടതായി മന്ത്രി എ.കെ. ശശീന്ദ്രന് സഭയില് പറഞ്ഞു.
15 മരങ്ങള് മുറിക്കാനാണ് അനുമതി നല്കിയത്. ഈ ഉത്തരവിട്ടത് ശ്രദ്ധയില്പെട്ടത് ഞായറാഴ്ചയാണ്. സംസ്ഥാനതാല്പര്യത്തിന് വിരുദ്ധമായി ഒരു നടപടിയും ഉണ്ടാവില്ലെന്നും മന്ത്രി സഭയില് ഉറപ്പ് നല്കി. മരം മുറിക്കാന് കേന്ദ്ര അനുമതിയും പാരിസ്ഥിതിക അനുമതിയും വേണം.
മുല്ലപ്പെരിയാര് വിഷയത്തില് സംസ്ഥാന സര്ക്കാര് സുപ്രീംകോടതിയില് സ്വീകരിച്ച നിലപാടിന് വിരുദ്ധമായി ഒരു ഉദ്യോഗസ്ഥന് എന്ത് നിലപാട് സ്വീകരിച്ചാലും അത് നിലനില്ക്കില്ലെന്നും മന്ത്രി പറഞ്ഞു. മുല്ലപ്പെരിയാറില് പുതിയ ഡാം വേണമെന്ന് നിലപാടില് സംസ്ഥാനം ഉറച്ചുനില്ക്കുകയാണെന്നും മന്ത്രി വ്യക്തമാക്കി.
അതേസമയം ബേബി ഡാമിന്റെ സമീപത്തെ 15 മരങ്ങള് മുറിക്കാന് ഉത്തരവിട്ടുകൊണ്ട് നവംബര് മാസം അഞ്ചിനാണ് ചീഫ് കണ്സര്വേറ്റര് ഓഫ് ഫോറസ്റ്റ് ഉത്തരവിറക്കിയത്. ഇത് വിവാദമായതിനെ തുടര്ന്ന് ഈ ഉത്തരവ് മരവിപ്പിക്കുമെന്നായിരുന്നു ഞായറാഴ്ച സര്ക്കാര് പ്രഖ്യാപനം. തിങ്കളാഴ്ച ഉത്തരവ് പുറത്തിറക്കുമെന്നും സര്ക്കാര് വ്യക്തമാക്കി.
എന്നാല് ഇന്ന് പുറത്തിറക്കിയ ഉത്തരവില് അനുമതി മരവിപ്പിക്കുന്നത് സംബന്ധിച്ച് വ്യക്തതയില്ല. മരവിപ്പിക്കുന്നുവെന്നതിനു പകരം ഈ ഉത്തരവ് താല്ക്കാലികമായി മാറ്റിവെക്കുന്നുവെന്ന് മാത്രമാണ് ഉത്തരവിലുള്ളത്.
വനം വന്യജീവി വകുപ്പിന്റെ അഡീഷണല് ചുമതലയുള്ള അഡീഷണല് ചീഫ് സെക്രട്ടറി രാജേഷ് കുമാര് സിന്ഹയാണ് ഉത്തരവ് താല്ക്കാലികമായി മാറ്റിവെക്കുന്നുവെന്ന ഉത്തരവ് പുറത്തിറക്കിയിരിക്കുന്നത്. പെരിയാര് ടൈഗര് റിസര്വിലുള്പ്പെട്ട സ്ഥലത്താണ് ബേബി ഡാം സ്ഥിതി ചെയ്യുന്നത്.
അവിടത്തെ മരങ്ങള് മുറിച്ചുമാറ്റാന് വനം പരിസ്ഥിതി മന്ത്രാലയത്തിന്റെയും ടൈഗര് റിസര്വിന്റെയും അനുമതി വേണം. മരംമുറിക്കാന് അനുമതി നല്കുന്നതിനുമുന്പ് ഇത്തരം കാര്യങ്ങള് പരിശോധിച്ചിട്ടുണ്ടോ എന്ന് നേരത്തെ ഇറങ്ങിയ ഉത്തരവില് വ്യക്തതയില്ല. അതിനാല് ഉത്തരവ് മാറ്റിവെയ്ക്കുന്നുവെന്നാണ് ഇപ്പോള് ഇറങ്ങിയ ഉത്തരവില് പറയുന്നത്. മുല്ലപ്പെരിയാര് ബേബി ഡാമിനരികിലെ മരങ്ങള് മുറിക്കാന് തമിഴ്നാടിന് അനുമതി നല്കിയ ഉത്തരവാണ് വിവാദത്തിന് തിരിതെളിച്ചത്.
"
https://www.facebook.com/Malayalivartha
