യൂത്ത് കോൺഗ്രസ് സംസ്ഥാന അധ്യക്ഷൻ രാഹുൽ മാങ്കൂട്ടത്തിലിന്റെ മുൻകൂർ ജാമ്യം റദ്ദാക്കണമെന്ന ഹർജി സുപ്രീം കോടതി തള്ളിയതോടെ കേസിൽ പുതിയ രാഷ്ട്രീയ വഴിത്തിരിവ്. ജസ്റ്റിസ് എം.എം. സുന്ദരേഷ്, ജസ്റ്റിസ് എൻ.കെ. സിംഗ് എന്നിവരടങ്ങിയ ബെഞ്ചാണ് പരാതിക്കാരിയുടെ ഹർജി ഫയലിൽ സ്വീകരിക്കാതെ തള്ളിക്കളഞ്ഞത്. രാഹുലിന് ഹൈക്കോടതി അനുവദിച്ച ജാമ്യത്തിന് സുപ്രീം കോടതി ഉത്തരവോടെ കൂടുതൽ കരുത്ത് ലഭിച്ചിരിക്കുകയാണ്.

മാധ്യമങ്ങൾ വലിയ പ്രാധാന്യത്തോടെ 'നിർണ്ണായകം' എന്ന് വിശേഷിപ്പിച്ച ദിവസത്തിന്റെ അവസാനം സത്യം ജയിച്ചുവെന്ന അവകാശവാദവുമായി ഫെന്നി നൈനാൻ രംഗത്തെത്തി. "ഇന്ന് മാധ്യമങ്ങളിൽ വരാനിടയില്ലാത്ത വാർത്തയാണിത്" എന്ന് കുറിച്ചുകൊണ്ടാണ് ഫെന്നി നൈനാൻ ഫേസ്ബുക്കിൽ ഈ വിവരം പങ്കുവെച്ചത്. വരും ദിവസങ്ങളിൽ കൂടുതൽ ഞെട്ടിക്കുന്ന സത്യങ്ങൾ പുറത്തുവരുമെന്നും അദ്ദേഹം തന്റെ പോസ്റ്റിലൂടെ അവകാശപ്പെടുന്നു.

ഫേസ്ബുക്ക് പോസ്റ്റ് ഇങ്ങനെ...

ഇന്ന് മാധ്യമങ്ങളിൽ വരാനിടയില്ലാത്ത ഒരു വാർത്ത നിങ്ങളോട് പറയാനാണ് ഈ പോസ്റ്റ്.. ഇന്ന് രാവിലെ മാധ്യമങ്ങളിൽ വലിയ വാർത്ത ഉണ്ടായിരുന്നു രാഹുലിന് നിർണായകം എന്ന്.. സുപ്രീം കോടതിയിൽ ഒന്നാമത്തെ പരാതിക്കാരി ഹൈക്കോടതി രാഹുലിന് നൽകിയ ജാമ്യം തള്ളിക്കളയണം എന്ന് ആവശ്യപ്പെട്ട് കൊടുത്ത ഹർജി പരിഗണിക്കുന്ന ദിവസം ആയിരുന്നു ഇന്ന്.. സുപ്രീം കോടതി പരാതിക്കാരി കൊടുത്ത ഹർജി ഇന്ന് ഫയലിൽ പോലും സ്വീകരിക്കാതെ തള്ളിക്കളഞ്ഞു. ഇനി അങ്ങോട്ട് സത്യം ജയിക്കുന്ന ദിവസങ്ങളാണ്.. ഞെട്ടിക്കുന്ന സത്യങ്ങൾ പുറത്ത് വരാൻ പോകുന്ന ദിവസങ്ങളാണ്.. എന്നായിരുന്നു.