അച്ചൻകോവിൽ ഗ്രാമത്തിൽ വ്യാപകമായി പഴകിയ മീൻ വിൽപന നടത്തുന്നതായി പരാതി. ഇവിടെ നിന്നും വാങ്ങുന്ന മീൻ പാചകം ചെയ്ത് കഴിക്കുന്നവർക്ക് ഛർദിയും അതിസാരവും ഉൾപ്പെടെയുള്ള ഗുരുതരമായ ആരോഗ്യപ്രശ്നങ്ങൾ റിപ്പോർട്ട് ചെയ്തിട്ടുണ്ട്. നാട്ടുകാർ പലതവണ അധികൃതർക്ക് പരാതി നൽകിയിട്ടും നടപടി സ്വീകരിക്കുന്നില്ലെന്നാണ് ആക്ഷേപം. കഴിഞ്ഞ ഏതാനും ദിവസങ്ങളായി പ്രദേശത്ത് വിൽപനയ്ക്കെത്തിക്കുന്ന മീനിന് പാകം ചെയ്യുമ്പോൾ അസഹനീയമായ ദുർഗന്ധമാണ് അനുഭവപ്പെടുന്നത്. ദുർഗന്ധം മൂലം പലർക്കും മീൻ ഉപയോഗിക്കാതെ ഉപേക്ഷിക്കേണ്ടി വന്നു.

ഇത് ശ്രദ്ധയിൽപ്പെട്ടതിനെത്തുടർന്ന് വിൽപനക്കാരോട് ചോദിച്ചപ്പോൾ അവർ നിഷേധാത്മകമായ നിലപാടാണ് സ്വീകരിച്ചതെന്ന് നാട്ടുകാർ പറയുന്നു. മാരകമായ രാസവസ്തുക്കൾ കലർന്ന മീനാണോ വിൽപനയ്ക്ക് എത്തിക്കുന്നതെന്ന ആശങ്കയിലാണ് ജനങ്ങൾ. ഒട്ടേറെപ്പേർക്ക് ആരോഗ്യപ്രശ്നങ്ങൾ നേരിട്ടതോടെ നാട്ടുകാർക്കിടയിൽ വലിയ പ്രതിഷേധം ഉയർന്നിട്ടുണ്ട്. ആരോഗ്യ വകുപ്പിനെ വിവരം അറിയിച്ചിട്ടും ഇതുവരെ പരിശോധന നടത്താനോ കുറ്റക്കാർക്കെതിരെ നടപടിയെടുക്കാനോ അധികൃതർ തയ്യാറായിട്ടില്ല.

ഭക്ഷ്യയോഗ്യമല്ലാത്ത മീൻ വിൽക്കുന്നവർക്കെതിരെ കർശന നടപടി സ്വീകരിക്കണമെന്നും, അനധികൃത മീൻ വിൽപന കേന്ദ്രങ്ങളിൽ അടിയന്തരമായി പരിശോധന നടത്തി പഴകിയ മീൻ പിടിച്ചെടുക്കണമെന്നും നാട്ടുകാർ ആവശ്യപ്പെട്ടു. വിഷയത്തിൽ ആരോഗ്യ വകുപ്പിന്റെ അടിയന്തര ഇടപെടൽ ഉണ്ടായില്ലെങ്കിൽ വലിയ ജനകീയ പ്രതിഷേധത്തിന് ഒരുങ്ങുകയാണ് അച്ചൻകോവിൽ നിവാസികൾ.