അങ്കമാലി കറുകകുറ്റിയിൽ 100 കിലോയിലധികം കഞ്ചാവുമായി മൂന്നം​ഗ സംഘം പിടിയിൽ.ഒരു സ്ത്രീ അടക്കം മൂന്ന് പേർ പിടിയിലായിരിക്കുന്നത്.
കാഞ്ഞരക്കാട് കളപ്പുരക്കൽ അനസ്(41) പൊക്കൽ സ്വദേശി ഫൈസൽ(35) തിരുവനന്തപുരം ശംഖുമുഖം സ്വദേശിനി വർഷ (22) എന്നിവരാണ് പിടിയിലായത്. അനസും ഫൈസലും മുമ്പും കഞ്ചാവ് കേസിൽ മുമ്പും കഞ്ചാവ് കേസിൽ പിടിയിലായിട്ടുള്ളവരാണ് .ഇരുവരും പ്രദേശത്തെ ലഹരി ഇടപാടിന്റെ പ്രധാന കണ്ണികളാണ് എന്നാണ് അന്വേഷണസംഘം നൽകുന്ന വിവരം.

ആന്ധ്രയിൽ നിന്നും റോഡ് മാർഗം കൊണ്ടുവന്ന കഞ്ചാവാണ് പിടികൂടിയത്. രണ്ടു കിലോ വീതമടങ്ങുന്ന പ്രത്യേക ബാഗുകളിലാക്കി കാറിന്റെ ഡിക്കിയിലും സീറ്റിനടിയിലും ഒളിപ്പിച്ചാണ് കഞ്ചാവ് കടത്താൻ ശ്രമിച്ചത്.

പെരുമ്പാവൂരിലേക്ക് കടത്തുകയായിരുന്നു സംഘത്തിന്റെ ലക്ഷ്യമെന്നാണ് വിവരം. ആന്ധ്രയിൽ നിന്നും 200 മുതൽ 300 വരെ രൂപയ്‌ക്ക് കഞ്ചാവ് വാങ്ങി അത് കേരളത്തിലെത്തിച്ച് 20,000 മുതൽ 30,000 രൂപ വരെ വിലയിട്ടാണ് ഇവർ കഞ്ചാവ് വിൽപ്പന നടത്തിയിരുന്നത്. രണ്ട് വാഹനങ്ങളിലായാണ് സംഘം സഞ്ചരിച്ചിരുന്നത്. ഈ വാഹനങ്ങളും പോലീസ് പിടിച്ചെടുത്തി‌ട്ടുണ്ട്.റൂറൽ പോലീസ് മേധാവി കെ. കാർത്തിക്കിന് ലഭിച്ച രഹസ്യ വിവരത്തെ തുടർന്ന് ഫ്‌ളൈയിംങ് സ്‌ക്വാഡ് നടത്തിയ പരിശോധനയിലാണ് ഇവരെ പിടികൂടിയത്.

നാർകോട്ടിക്‌സ് സെൽ ഡി.വൈ.എസ്.പി സക്കറിയ മാത്യു, ആലുവ ഡി.വൈ.എസ്.പി പി.കെ.ശിവൻകുട്ടി, എസ്.എച്ച്.ഒ മാരായ സോണി മത്തായി, കെ.ജെ.പീറ്റർ, പി.എം.ബൈജു എന്നിവരടങ്ങിയ പ്രത്യേക സംഘമാണ് കേസ് അന്വേഷിക്കുന്നത്.