അഞ്ച് ദിവസം മുന്‍പ് ആലത്തൂരില്‍ നിന്ന് കാണാതായ നാല് കുട്ടികളെ കോയമ്ബത്തൂരില്‍ നിന്ന് കണ്ടെത്തി. റയില്‍വേ സ്‌റ്റേഷനില്‍ നിന്നാണ് കുട്ടികളെ കണ്ടെത്തിയത്. ഇരട്ടസഹോദരിമാരെയും രണ്ട് ആണ്‍ കുട്ടികളെയുമാണ് കാണ്ടെത്തിയത്.

ഒന്‍പതാം ക്ലാസ് വിദ്യാര്‍ത്ഥികളാണ് നാല് പേരും. ആലത്തൂര്‍ ഡിവൈഎസ്പി കെ എം ദേവസ്യയുടെ നേതൃത്വത്തിലുള്ള സംഘമാണ് അന്വേഷണം നടത്തിയത്. പെണ്‍കുട്ടികളെ കാണാനില്ലെന്ന് രക്ഷിതാവ് ആലത്തൂര്‍ പൊലീസില്‍ നല്‍കിയ പരാതിയെത്തുടര്‍ന്ന് നടത്തിയ അന്വേഷണത്തിലാണ് വിദ്യാര്‍ഥികളായ രണ്ട് ആണ്‍കുട്ടികള്‍കൂടി ഇവര്‍ക്കൊപ്പമുണ്ടെന്ന് കണ്ടെത്തിയത്.

പേലീസ് നടത്തിയ അന്വേഷണത്തില്‍ കുട്ടികള്‍ തമിഴ്‌നാട്ടിലേക്ക് കടന്നതായി സൂചന ലഭിച്ചു. അന്വേഷണം തമിഴ്‌നാട്ടിലേക്ക് വ്യാപിപ്പിക്കുകയും ചെയ്തു. പൊള്ളാച്ചിയില്‍ നിന്ന് ഇവരുടെ സിസിടിവി ദൃശ്യങ്ങള്‍ ലഭിച്ചതോടെയാണ് ഇവര്‍ തമിഴ്‌നാട്ടിലുണ്ടെന്ന് പോലീസ് സ്ഥിരീകരിച്ചത്.

പരിസര പ്രദേശങ്ങളില്‍ പോലീസ് അന്വേഷണം നടത്തിയെങ്കിലും അപ്പോഴേക്കും കുട്ടികള്‍ അവിടെ നിന്നും കടന്ന് കളഞ്ഞിരുന്നു.
കാണാതായ നാല് വിദ്യാര്‍ത്ഥികളുടെ ചിത്രങ്ങള്‍വച്ചുള്ള പോസ്റ്റര്‍ അടക്കം തമിഴ്‌നാട്ടില്‍ എത്തിച്ചാണ് പിന്നീട് അന്വേഷണം നടത്തിയത്. ഇതിലൂടെയാണ് കുട്ടികളെ കണ്ടെത്തിയത്. എന്നാല്‍ വീട്ടില്‍ നിന്നും ഒളിച്ചോടിയതിന് പിന്നിലെ കാരണം വ്യക്തമല്ല.

അതേസമയം കഴിഞ്ഞ ആഓഗസ്റ്റ് 30ന് രാവിലെ പതിനൊന്നേകാലോടെ പുതിയങ്കം തെലുങ്കത്തറ ഭരതന്‍ നിവാസില്‍ രാധാകൃഷ്ണന്റെയും സുനിതയുടേയും മൂത്തമകള്‍ സൂര്യകൃഷ്ണയെ കാണാതായിരുന്നു. ആലത്തൂരിലെ ബുക്ക് സ്റ്റാളിലേക്ക് പോയ പാലക്കാട് മേഴ്‌സി കോളേജില്‍ രണ്ടാം വര്‍ഷ ബിഎ ഇംഗ്ലീഷ് വിദ്യാര്‍ഥിനിയായിരുന്ന സൂര്യ കൃഷ്ണ പിന്നെ വീട്ടില്‍ തിരിച്ചെത്തിയില്ല.

മൊബൈല്‍ ഫോണ്‍ എടുക്കാതെയാണ് ഇവര്‍ വീട്ടില്‍ നിന്നിറങ്ങിയത്. രണ്ടു ജോഡി വസ്ത്രം ബാഗില്‍ എടുത്തിരുന്നു. സിസിടിവി ദൃശ്യത്തിന്റെ പരിശോധനയിലോ ഫോണ്‍ വിളികളിലോ പോലീസിന് തുമ്പൊന്നും കിട്ടിയില്ല. ഗോവ, തിരുപ്പൂര്‍, കോട്ടയം എന്നിവിടങ്ങളില്‍ അന്വേഷണ സംഘത്തിന്റെ നേതൃത്വത്തില്‍ അന്വേഷണം നടത്തിയെങ്കിലും യാതൊരു പുരോഗതിയും ഉണ്ടായില്ല. ഇതിന്റെ അന്വേഷണത്തിന് പിന്നാലെയാണ് ഇരട്ട സഹോദരിമാരുള്‍പ്പടെ നാലംഗ വിദ്യാര്‍ഥികളെ കഴിഞ്ഞ ദിവസം കാണാതാവുന്നത്. വിദ്യാര്‍ത്ഥികളെ കണ്ടെത്തിയ പോലെ സൂര്യകൃഷ്ണയെയും കണ്ടെത്താന്‍ സാധിക്കുമെന്നാണ് പ്രതീക്ഷിക്കുന്നത്.