മലയാളികളെ ഞെട്ടിപ്പിച്ച സംഭവമാണ് മുന്‍ മിസ് കേരള ആന്‍സി കബീറിന്റേയും (25) റണ്ണര്‍ അപ്പ് അഞ്ജനയുടേയും (24) ഒപ്പമുണ്ടായിരുന്ന ആഷിഖിന്റെയും (25) അപകട മരണം. മൂന്ന് യുവതയെ കൊലയ്ക്ക് കൊടുത്തത് ആരാണെങ്കിലും പൊക്കാനുറച്ചിരിക്കുകയാണ് പോലീസ്. ഫോര്‍ട്ട് കൊച്ചിയിലെ നമ്പര്‍ 18 ഹോട്ടലില്‍ നടന്ന ഡിജെ പാര്‍ട്ടി കഴിഞ്ഞ് മടങ്ങുമ്പോഴാണ് മുന്‍ മിസ് കേരള അടക്കം മൂന്ന് പേര്‍ വൈറ്റിലയില്‍ വാഹനാപകടത്തില്‍ മരിച്ചത്. അതിനാല്‍ തന്നെ ഈ ഹോട്ടല്‍ കേന്ദ്രീകരിച്ചാണ് അന്വേഷണം നടക്കുന്നത്.

ഇതുമായി ബന്ധപ്പെട്ട അന്വേഷണം പോലീസ് ശക്തമാക്കി. അപകടത്തിന് തൊട്ടുമുമ്പുളള ഇവര്‍ ഉണ്ടായിരുന്ന ഫോര്‍ട്ടുകൊച്ചിയിലെ നമ്പര്‍ 18 ഹോട്ടല്‍ കേന്ദ്രീകരിച്ചാണ് ഇപ്പോള്‍ അന്വേഷണം പുരോഗമിക്കുന്നത്. ഇന്നത്തെ ദിവസം അതിനിര്‍ണായകമാണ്. ഇവിടെ നടന്ന ഡി ജെ പാര്‍ട്ടിയടക്കമുള്ളവയുടെ ദൃശ്യങ്ങള്‍ ഇന്ന് വിദഗ്ധരുടെ സഹായത്തോടെ പൊലീസ് പരിശോധിക്കും. നമ്പര്‍ 18 ഹോട്ടല്‍ നിന്ന് പിടിച്ചെടുത്ത ഹാര്‍ഡ് ഡിസ്‌കിന്റെ പരിശോധനയാണ് ഇന്ന് നടക്കുന്നത്.

ഹാര്‍ഡ് ഡിസ്‌കിന്റെ പാസ് വേര്‍ഡ് അറിയില്ലെന്ന് ഹോട്ടലിലെ ജീവനക്കാര്‍ പറഞ്ഞതോടെയാണ് ഇന്നലെ പൊലീസ് ഇത് പിടിച്ചെടുത്തത്. ഇവരുടെ ദൃശ്യങ്ങളടക്കം തേടിയാണ് കൊച്ചി സിറ്റി പൊലീസ് ഇന്നലെ ഹോട്ടലില്‍ എത്തിയത്. എന്നാല്‍ ദൃശ്യങ്ങളടങ്ങിയ ഹാര്‍ഡ് ഡിസ്‌കിന്റെ പാസ്‌വേര്‍ഡ് അറിയില്ലെന്ന മറുപടിയാണ് ഹോട്ടല്‍ ജീവനക്കാര്‍ ഉറച്ചുനില്‍ക്കുകയായിരുന്നു.

കൊവിഡ് കാലത്ത് ഡിജെ പോലുളള കൂടിച്ചേരലുകള്‍ക്ക് നിയന്ത്രണങ്ങള്‍ ഉളളപ്പോഴാണ് ഫോര്‍ട്ട് കൊച്ചി പൊലീസ് സ്‌റ്റേഷന് തൊട്ടടുത്ത് രാവേറെ നീളുന്ന പാര്‍ട്ടികള്‍ അരങ്ങേറിയത്. നിശ്ചിതസമയം കഴിഞ്ഞും മദ്യവില്‍പ്പന നടത്തിയതിന് ഹോട്ടലിന്റെ ബാര്‍ ലൈസന്‍സ് കഴിഞ്ഞ ദിവസം സസ്‌പെന്‍ഡ് ചെയ്തതിരുന്നു. ലഹരിമരുന്ന് വിതരണം എന്ന സംശയത്തിന്റെ പേരില്‍ എക്‌സൈസും പരിശോധന നടത്തിയിരുന്നു. കഴിഞ്ഞ മാര്‍ച്ചില്‍ കേന്ദ്ര എജന്‍സികളും ഇവിടെ പരിശോധനയ്‌ക്കെത്തിയതാണ്.

കൊച്ചി നഗരത്തിലെ ആളൊഴിഞ്ഞ ദ്വീപുകളിലേയും വന്‍കിട ഹോട്ടലുകളിലെയും ഡിജെ പാര്‍ട്ടികളുടെ മറവില്‍ നടക്കുന്ന ലഹരി മരുന്ന് വ്യാപാരത്തെക്കുറിച്ച് നേരത്തെ സിറ്റി പൊലീസടക്കം പരിശോധിച്ചിരുന്നതാണ്. എന്നാല്‍ കൊവിഡിനെത്തുടര്‍ന്ന് കഴിഞ്ഞ കുറേ മാസങ്ങളായി ഇത് നിലച്ചു. അടുത്തയിടെയാണ് നഗരത്തിലെ വന്‍കിട ഹോട്ടലുകളില്‍ ഡിജെ പാര്‍ട്ടികള്‍ തുടങ്ങിയത്. എന്നാല്‍ റെയ്ഡ് നടത്തി ടൂറിസം വ്യവസായത്തെ തകര്‍ക്കേണ്ടെന്ന പേരില്‍ പൊലീസും കണ്ണടച്ചിരിക്കുകയാണെന്ന ആക്ഷേപം ഉയരുന്നുണ്ട്.

നവംബര്‍ ഒന്നിന് പുലര്‍ച്ചെ വൈറ്റില ബൈപാസില്‍ വച്ചായിരുന്നു അപകടം നടന്നത്. അപകടത്തില്‍ മുന്‍ മിസ് കേരളയും തിരുവനന്തപുരം ആറ്റിങ്ങല്‍ സ്വദേശിയുമായ ആന്‍സി കബീര്‍, മിസ് കേരള മുന്‍ റണ്ണറപ്പും തൃശൂര്‍ സ്വദേശിയുമായ അഞ്ജന ഷാജന്‍, തൃശൂര്‍ വെമ്പല്ലൂര്‍ കട്ടന്‍ബസാര്‍ കറപ്പംവീട്ടില്‍ അഷ്‌റഫിന്റെ മകന്‍ കെ.എ മുഹമ്മദ് ആഷിഖ് എന്നിവരാണ് മരണമടഞ്ഞത്. ആന്‍സിയും അഞ്ജനയും സംഭവസ്ഥലത്ത് തന്നെ മരിച്ചു.

ഹോട്ടലിലെ ഡിജെ പാര്‍ട്ടി കഴിഞ്ഞ് മടങ്ങുമ്പോഴായിരുന്നു ഇവര്‍ സഞ്ചരിച്ച വാഹനം അപകടത്തില്‍പ്പെട്ടത് എന്ന വാര്‍ത്തയാണ് ഹോട്ടലിലേക്ക് അന്വേഷണം നീണ്ടത്. അപകട സമയത്ത് കാറോടിച്ചിരുന്ന തൃശൂര്‍ മാള സ്വദേശി അബ്ദുള്‍ റഹ്മാനെ കഴിഞ്ഞ ദിവസം പൊലീസ് അറസ്റ്റ് ചെയ്തിരുന്നു. വാഹനം ഓടിക്കുന്ന സമയത്ത് ഇയാള്‍ മദ്യപിച്ചിരുന്നതായി പൊലീസ് കണ്ടെത്തിയിരുന്നു. അബ്ദുള്‍ റഹ്മാന്‍ മദ്യപിച്ചിരുന്നുവെന്നതിന് കൂടുതല്‍ തെളിവുകള്‍ ശേഖരിക്കാനും മറ്റെന്തെങ്കിലും ലഹരി വസ്തുക്കള്‍ ഇയാള്‍ ഉപയോഗിച്ചിരുന്നോ എന്ന് പരിശോധിക്കാനുമാണ് സിസിടിവി ദൃശ്യങ്ങള്‍ ശേഖരിച്ചത്. അതിന്റെ പരിശോധനയാണ് ഇന്ന് നടക്കുന്നത്.