മുന്‍ മിസ് കേരള വിജയികള്‍ ഉള്‍പ്പെടെയുള്ളവര്‍ കാര്‍ അപകടത്തില്‍ മരിച്ച സംഭവത്തില്‍ ഡി ജെ പാര്‍ട്ടി നടന്ന കൊച്ചിയിലെ ഹോട്ടലിന് പോലീസ് കാവല്‍. ജോണ്‍സന്‍ മാവുങ്കലിന് സംരക്ഷണം നല്‍കിയ അതേ രീതിയാണ് ഡി ജെ പാര്‍ട്ടി നടത്തിയ ഹോട്ടലിന്റെ കാര്യത്തിലും കൊച്ചി പോലീസ് പിന്തുടര്‍ന്നത്.

ഫോര്‍ട്ട് കൊച്ചി പോലീസ് സ്റ്റേഷന് തൊട്ടുമുന്നിലാണ് ഈ ഹോട്ടല്‍. എന്നിട്ടും അവര്‍ ഒന്നും അറിഞ്ഞില്ല. മദ്യവും മയക്കുമരുന്നും ഉപയോഗിച്ചുള്ള പാര്‍ട്ടിയാണ് നടന്നതെന്ന് വ്യക്തം. കാരണം മരിച്ചവര്‍ ലഹരിക്ക് അടിമയായിരുന്നുവെന്നാണ് പോലീസ് റിപ്പോര്‍ട്ട്.

ഒക്ടോബര്‍ 31-ന് രാത്രി ഇവിടെ നടന്ന പാര്‍ട്ടി കഴിഞ്ഞ് മടങ്ങുന്നതിനിടെയാണ് അന്‍സി കബീര്‍, അന്‍ജന ഷാജന്‍, ആഷിഖ്, അബ്ദുള്‍ റഹ്മാന്‍ എന്നിവര്‍ സഞ്ചരിച്ച കാര്‍ അപകടത്തില്‍പ്പെട്ടത്. അന്‍സി കബീറും അന്‍ജന ഷാജനും തല്‍ക്ഷണം മരിച്ചു. ചികിത്സയിലായിരുന്ന ആഷിഖ് കഴിഞ്ഞ ദിവസവും മരിച്ചു.

ഫോര്‍ട്ട് കൊച്ചിയിലെ ഹോട്ടലില്‍ ഡി ജെ പാര്‍ട്ടികള്‍ നടക്കാറുണ്ടെന്ന കാര്യം പോലീസിന് വ്യക്തമായി അറിയാമായിരുന്നു.എന്നാല്‍ സമൂഹത്തിലും പോലീസിലും ഏറെ പിടിപാടുള്ള ഹോട്ടല്‍ മുതലാളിക്ക് മുന്നില്‍ പോലീസ് സാഷ്ടാംഗം നമസകരിക്കുകയായിരുന്നു. ഒക്ടോബര്‍ 31 ന് ഇവിടെ പാര്‍ട്ടി നടന്നപ്പോഴും തൊട്ടു മുന്നിലെ പോലീസ് ഒന്നും അറിഞ്ഞില്ലെന്ന് പറഞ്ഞാല്‍ അത് അത്ഭുതമായി മാറും.



അപകടം നടന്ന് ആളുകള്‍ മരിച്ചതോടെയാണ് പോലീസിന് ബോധോദയം ഉണ്ടായത്. ഹോട്ടലില്‍ നിന്നും ഹാര്‍ഡ് ഡിസ്‌ക് കസ്റ്റഡിയിലെടുത്തു. ഫോര്‍ട്ട് കൊച്ചിയിലെ 'നമ്പര്‍ 18' ഹോട്ടലില്‍ നടത്തിയ പരിശോധനയിലാണ് സിസിടിവി ദൃശ്യങ്ങള്‍ സൂക്ഷിച്ചിരിക്കുന്ന ഹാര്‍ഡ് ഡിസ്‌ക് പോലീസ് പിടിച്ചെടുത്തത്. ഈ ഹോട്ടലില്‍നിന്ന് പാര്‍ട്ടി കഴിഞ്ഞ് മടങ്ങുന്നതിനിടെയാണ് മുന്‍ മിസ് കേരള വിജയികളായ അന്‍സി കബീറും അന്‍ജന ഷാജനും ഇവരുടെ സുഹൃത്തായ ആഷിഖും വാഹനാപകടത്തില്‍ മരിച്ചത്.

അതേസമയം, ഹോട്ടലില്‍നിന്ന് കണ്ടെടുത്ത ഹാര്‍ഡ് ഡിസ്‌ക്കിന്റെ പാസ് വേഡ് അറിയില്ലെന്നാണ് ജീവനക്കാര്‍ പോലീസിന് നല്‍കിയ മൊഴി. അതിനാല്‍ സാങ്കേതിക വിദഗ്ധരുടെ സഹായത്താല്‍ ഇത് പരിശോധിക്കുമെന്ന് മെട്രോ സ്റ്റേഷന്‍ എസ്.എച്ച്.ഒ. അനന്തലാല്‍ പറഞ്ഞു. ഹാര്‍ഡ് ഡിസ്‌ക്കിന്റെ പാസ് വേഡ് അറിയില്ലെന്ന് അത് സ്ഥാപിച്ചവര്‍ പറഞ്ഞാല്‍ അത് കേട്ടിട്ട് മുങ്ങി പോകുന്ന പോലീസ് തങ്ങളുടെ ധൈര്യം ആര്‍ക്കെങ്കിലും പണയം വച്ചെന്ന് വേണം കരുതാന്‍.

കാര്‍ ഓടിച്ചിരുന്ന അബ്ദുള്‍ റഹ്മാനെ പോലീസ് കഴിഞ്ഞ ദിവസം അറസ്റ്റ് ചെയ്തിരുന്നു. മദ്യലഹരിയിലാണ് ഇയാള്‍ വാഹനമോടിച്ചതെന്ന് കണ്ടെത്തിയതിനെ തുടര്‍ന്നായിരുന്നു നടപടി. മദ്യപിച്ച് വാഹനമോടിച്ച് അപകടമുണ്ടാക്കിയതിനും മനഃപൂര്‍വമല്ലാത്ത നരഹത്യയ്ക്കുമാണ് ഇയാള്‍ക്കെതിരേ കേസെടുത്തിരിക്കുന്നത്. മദ്യപിച്ച് വാഹനം ഓടിച്ചാല്‍ അത് മനപൂര്‍വമല്ലാത്ത നരഹത്യയാകുന്നത് എങ്ങനെയാണെന്ന കാര്യത്തില്‍ പുതിയ പഠനങ്ങള്‍ ആവശ്യമാണ്.

അതിനിടെ, രാത്രി വൈകിയും മദ്യം വിറ്റെന്ന് കണ്ടെത്തിയതിനെ തുടര്‍ന്ന് 'നമ്പര്‍ 18' ഹോട്ടല്‍ എക്‌സൈസ് അധികൃതര്‍ പൂട്ടിക്കുകയും ചെയ്തു. തീര്‍ത്തും നിസാര വകുപ്പ് മാത്രമേ ഈ കുറ്റത്തിന് നല്‍കാന്‍ കഴിയുകയുള്ളു. ബാര്‍ ഉടമയുടെ സ്വാധീനം ഇതില്‍ നിന്നും വ്യക്തമാണ്.

കൊച്ചിയിലെ ഹോട്ടലുകളില്‍ പലതിലും ഡി.ജെ.പാര്‍ട്ടികള്‍ പതിവാണ്. ഐ ടി പ്രൊഫഷണലുകള്‍ തിങ്ങിപാര്‍ക്കുന്ന സ്ഥലങ്ങളില്‍ മയക്കുമരുന്ന് ഉപയോഗം വരെ വ്യാപകമാണ്. ഇതില്‍ പങ്കെടുക്കുന്നവര്‍ക്കെല്ലാം വന്‍സ്വാധീനമാണുള്ളത്. അതു കൊണ്ടു തന്നെ പോലീസിന് ഹോട്ടലുടമകളെ പിടിക്കാന്‍ ഭയമാണ്. ഇല്ലെങ്കില്‍ കണ്‍മുന്നില്‍ നടന്ന കുറ്റകൃത്യം കണ്ടില്ലെന്ന് നടിക്കുമോ?

കൊച്ചിയിലെ ഹോട്ടലുകളില്‍ നിന്നും പോലീസുദ്യോഗസ്ഥര്‍ മാസപ്പടി വാങ്ങുന്നുണ്ടെന്ന ആരോപണത്തിന് ഇന്നും ചൂട് കുറഞ്ഞിട്ടില്ല. പോലീസുകാര്‍ മാത്രമല്ല ഉയര്‍ന്ന രാഷ്ട്രീയ നേതാക്കളും ഡി ജെ റാക്കറ്റുകളില്‍ നിന്ന് പണം വാങ്ങുന്നുണ്ട്.