കേരള പോലീസില്‍ ലക്ഷ്മണ എന്ന പേര് വാഴുന്നില്ല. മുമ്പ് നക്‌സല്‍ വര്‍ഗീസ് വധക്കേസിലാണ് ലക്ഷ്മണ എന്ന പേരുകാരനായ ഐ.ജി. കുരുങ്ങിയതെങ്കില്‍ ഇപ്പോള്‍ കുരുങ്ങിയത് മറ്റൊരു ഐ ജി ലക്ഷ്മണയാണ്.

മോന്‍സണ്‍ മാവുങ്കലിന്റെ പുരാവസ്തു തട്ടിപ്പ് കേസിലാണ് ഐ ജി ലക്ഷ്മണക്കെതിരെ ശക്തമായ തെളിവുകള്‍ പോലീസിന് ലഭിച്ചത്. ശരിയായ വിധത്തില്‍ നടപടിയുണ്ടായാല്‍ ലക്ഷ്മണയും അഴിക്കുള്ളിലാവും. ഇതിന് തന്നെയാണ് സാധ്യത. കാരണം അന്വേഷണം ഹൈക്കോടതിയുടെ നിരീക്ഷണത്തിലാണ്. പോലീസ് സംവിധാനം ഐ.ജി. ദുരുപയോഗം ചെയ്‌തെന്നാണ് കണ്ടെത്തല്‍. 

മോന്‍സന്റെ പുരാവസ്തു തട്ടിപ്പില്‍ ഐ ജി ഇടനിലക്കാരന്‍ ആയെന്നാണ് മൊഴി. പുരാവസ്തു ഇടപാടിന് ആന്ധ്രാ സ്വദേശിനിയെ മോണ്‍സന് പരിചയപ്പെടുത്തിക്കൊടുത്തത് ഐ ജി ലക്ഷ്മണയാണ്. മോന്‍സന്റെ കൈവശം ഉള്ള അപൂര്‍വ്വ മത്സ്യങ്ങളുടെ സ്റ്റഫ്, മുതലയുടെ തലയോട്, അടക്കം ഇടനിലക്കാരി വഴി വില്പന നടത്താന്‍ പദ്ധതി ഇട്ടെന്നും കണ്ടെത്തിയിട്ടുണ്ട്.

ഐജി ലക്ഷ്മണയുടെ നേതൃത്വത്തില്‍ തിരുവനതപുരം പോലീസ് ക്ലബ്ബില്‍ ഇടനിലക്കാരിയും മോന്‍സനും കൂടിക്കാഴ്ച്ച നടത്തിയെന്നും കണ്ടെത്തി. ആഗസ്റ്റ് 5നായിരുന്നു കൂടിക്കാഴ്ച. പോലീസ് ക്ലബ്ബില്‍ ഐ ജി ആവശ്യപ്പെട്ടത് പ്രകാരം മോന്‍സന്റെ വീട്ടില്‍ നിന്ന് പുരാവസ്തുക്കള്‍ എത്തിച്ചു.

ഐ ജി പറഞ്ഞയച്ച പോലീസ് ഉദ്യോഗസ്ഥന്‍ ആണ് ഇത് കൊണ്ട് പോയത്. ഇടപാടിന് മുന്‍പ് പുരാവസ്തുക്കളുടെ ചിത്രം മോന്‍സന്റെ ജീവനക്കാര്‍ ഇടനിലക്കാരിക്ക് അയച്ചു കൊടുത്തതായും വ്യക്തമായിട്ടുണ്ട്. ഇടപാടുകളുടെ വാട്‌സ്ആപ് ചാറ്റുകള്‍ പുറത്ത് ആയിട്ടുണ്ട്.

ഐ ജി ലക്ഷ്മണയുടെ മൂന്ന് പി എസ് ഒ മാര്‍ക്കെതിരെയും തെളിവുകള്‍ അന്വേഷണ സംഘത്തിന് ലഭിച്ചിട്ടുണ്ട്.

മോന്‍സന്‍ മാവുങ്കല്ലിനെ സഹായിച്ചതിന് ഐജി ലക്ഷമണക്കെതിരെ ക്രൈംബ്രാഞ്ച് നടപടിക്ക് ശുപാര്‍ശ ചെയ്തിട്ടുണ്ട്. ലക്ഷമണയ്ക്ക് എതിരായ അന്വേഷണ റിപ്പോര്‍ട്ട് ക്രൈംബ്രാഞ്ച് മുഖ്യമന്ത്രിക്കും സമര്‍പ്പിച്ചിട്ടുണ്ട്. മോന്‍സന്‍ മാവുങ്കല്ലിനെ കൂടാതെ സാമ്പത്തിക തട്ടിപ്പ് നടത്തിയ വേറെയും ചിലരെ ഐജി ലക്ഷമണ സഹായിച്ചുവെന്ന് പരാതിയുള്ളതായി ക്രൈംബ്രാഞ്ച് റിപ്പോര്‍ട്ടില്‍ പറയുന്നുണ്ട്. നിലവില്‍ ട്രാഫിക് ചുമതലയുള്ള ഐജിയാണ് ലക്ഷമണ.

കഴിഞ്ഞ മാസം ഡിജിപി അനില്‍ കാന്തും ഐജി ലക്ഷമണയ്ക്ക് എതിരെ ഹൈക്കോടതിയില്‍ റിപ്പോര്‍ട്ട് നല്‍കിയിരുന്നു. മോന്‍സന്‍ മാവുങ്കലിന്റെ മുന്‍ ഡ്രൈവര്‍ അജിത്ത് നല്‍കിയ ഹര്‍ജിയിലാണ് ഡിജിപി സത്യവാങ്മൂലം നല്‍കിയത്. മോന്‍സനെതിരെ പത്ത് കേസുകള്‍ റജിസ്റ്റര്‍ ചെയ്തിട്ടുണ്ടെന്നും ഉന്നത പൊലീസ് ഉദ്യോഗസ്ഥരും മോന്‍സനും തമ്മിലുള്ള ബന്ധത്തിന്റെ പേരില്‍ അന്വേഷണത്തിന്റെ കാര്യക്ഷമതയെ സംശയിക്കേണ്ടതില്ലെന്നും ഹൈക്കോടതിയില്‍ ഡിജിപി അറിയിച്ചിരുന്നു.

എന്നാല്‍ നക്‌സല്‍ വര്‍ഗീസ് വധക്കേസില്‍ കുരുങ്ങിയ മുന്‍ ഐ.ജി.ലക്ഷ്മണ കെ കരുണാകരന്റെ വിശ്വസ്തനായിരുന്നു . വര്‍ഗീസ് വധക്കേസില്‍ അദ്ദേഹം ജീവപര്യന്തം ശിക്ഷ അനുഭവിച്ചു.75 വയസു കഴിഞ്ഞ തടവുകാരെ മോചിപ്പിക്കുന്ന ദയയിലാണ് അദ്ദേഹം മോചിതനായത്. വര്‍ഗീസിനെ വെടിവച്ച കോണ്‍സ്റ്റബിള്‍ രാമചന്ദ്രന്‍ നായരുടെ മൊഴിയിലാണ് ലക്ഷ്മണെ കുരുങ്ങിയത്. വെടി വയ്ക്കാന്‍ ഉത്തരവിട്ടത് ലക്ഷ്മണയായിരുന്നു.

അതേസമയം മാവുങ്കലിന്റെ സുഹൃത്തായ ഐ.ജി.മലയാളിയല്ല. ആ വ്യത്യാസം മാത്രമാണ് ഈ കേസിലുള്ളത്.