നെഞ്ചത്ത് റീത്ത് വച്ച് യൂത്ത്... ജോജു ജോര്ജിന്റെ സിനിമ നടക്കുന്ന തീയറ്ററില് റീത്ത് വച്ച് യൂത്ത് കോണ്ഗ്രസുകാര് കളം നിറയുമ്പോള് പിടിച്ചു കെട്ടി കെ. സുധാകരന്; സിനിമ ഷൂട്ടിംഗ് തടയരുതെന്ന് കോണ്ഗ്രസ്; തടഞ്ഞാല് സംരക്ഷണമൊരുക്കാന് സഖാക്കളും; കളികള് മാറിമറിയുമെന്നാ തോന്നുന്നേ
ജോജു ജോര്ജിനോടുള്ള കോണ്ഗ്രസുകാരുടെ കലിപ്പ് തീരുന്നില്ല. എവിടെ ജോജു ജോര്ജിനെ കണ്ടാലും അവിടെ റീത്ത് വയ്ക്കാനായി യൂത്ത് കോണ്ഗ്രസുകാര് റീത്തും കൊണ്ട് നടക്കുകയാണ്. ജോജു എവിടേയെങ്കിലുമുണ്ടോ എന്നന്വേഷിച്ച് യൂത്ത് കോണ്ഗ്രസുകാര് കാഞ്ഞിരപ്പള്ളി വരെ പോയി. അവിടത്തെ ഷാജി കൈലാസ് സെറ്റില് വരെയെത്തി. പൃഥ്വിരാജിനെ കണ്ട് ജോജുവല്ലേ ഇതെന്ന് പറഞ്ഞ യൂത്ത് കോണ്ഗ്രസുകാരുണ്ട്. അവരെ വിരട്ടിയോടിച്ചത് നാട്ടുകാരായ യൂത്ത് കോണ്ഗ്രസുകാര് തന്നെ.
യൂത്ത് കോണ്ഗ്രസുകാര് ഒന്ന് അനക്കം വച്ച് തുടങ്ങിയപ്പോഴേക്കും കോണ്ഗ്രസിന്റെ കേഡര് പാര്ട്ടി നേതാവ് കെ സുധാകരന് അവരുടെ ചെവിക്ക് പിടിച്ചു. കേഡര് പാര്ട്ടിയില് ഇത്രയ്ക്കങ്ങ് ഷൈന് ചെയ്യാന് പാടില്ല. പൊടിക്കടങ്ങ്. സിനിമാക്കാരെ തടയരുത്. സിനിമാ ഷൂട്ടിംഗ് അലങ്കോലമാക്കാന് ചെന്നാല് എല്ലാവരും സഖാക്കളെ അഭയം പ്രാപിക്കും. യൂത്തുകാരെ നേരിടാന് ഒരവസരം കാത്തിരിക്കുകയാണ് ഡിവൈഎഫ്ഐക്കാര്. അവരാങ്ങാനം ഏറ്റെടുത്താല് തീര്ന്നു.
ജോജുവിനെതിരായ പ്രതിഷേധത്തിന്റെ ഭാഗമായി സിനിമാ ഷൂട്ടിംഗ് മൊത്തത്തില് തടയുന്നതിനെതിരെ അവസാനം കെ സുധാകരന് തന്നെ രംഗത്തെത്തി. സിനിമാ ചിത്രീകരണം തടയുമെന്ന യൂത്ത് കോണ്ഗ്രസ് പ്രഖ്യാപനത്തിനെതിരെ കെപിസിസി നേതൃയോഗത്തില് രൂക്ഷവിമര്ശനമാണ് ഉയര്ന്നത്. ജോജുവിനെതിരായ സമരം സിനിമാ മേഖലയാകെ പടര്ത്തരുതെന്ന് യോഗത്തില് കെ സുധാകരന് പറഞ്ഞു. സിനിമ സര്ഗാത്മക പ്രവര്ത്തനമാണ്, ഈ വ്യവസായത്തെ തടയുന്ന രീതി ശരിയല്ലെന്നും സുധാകരന് വിമര്ശിച്ചു.
ജോജുവിനെതിരെ ഇന്നലെയും യൂത്ത് കോണ്ഗ്രസിന്റെ പ്രതിഷേധ പരിപാടിയുണ്ടായിരുന്നു. സ്റ്റാര് എന്ന ജോജുവിന്റെ ചിത്രം പ്രദര്ശിപ്പിക്കുന്ന എറണാകുളം ഷേണായീസ് തീയേറ്ററിലേക്ക് യൂത്ത് കോണ്ഗ്രസ് പ്രവര്ത്തകര് പ്രകടനം നടത്തി. ജോജുവിന്റെ ചിത്രം പതിച്ച റീത്തുമായിട്ടായിരുന്നു പ്രകടനം. തീയേറ്ററിന് മുന്നില് റീത്തും വച്ച ശേഷമായിരുന്നു പ്രതിഷേധം അവസാനിച്ചത്.
അതേസമയം സിനിമാ ഷൂട്ടിംഗ് തടയുമെന്ന യൂത്ത് കോണ്ഗ്രസ് പ്രഖ്യാപനത്തിനെതിരെ സാംസ്കാരിക മന്ത്രി സജി ചെറിയാനും രംഗത്തെത്തി. കോണ്ഗ്രസ് നേതൃത്വം ഒരു കലാരൂപത്തോടും തൊഴില് മേഖലയോടും കലാപപ്രഖ്യാപനം നടത്തുകയാണെന്ന് സജി ചെറിയാന് ആരോപിച്ചു. കോണ്ഗ്രസ് നേതൃത്വത്തിന് നില തെറ്റിയ അവസ്ഥയാണെന്നും സിനിമാ കലാകാരന്മാരെ സര്ക്കാര് സംരക്ഷിക്കുമെന്നും സാംസ്കാരിക സിനിമ മന്ത്രിയായ സജി ചെറിയാന് പറഞ്ഞു.
ഇന്ധനവില വ!ര്ധനവിനെതിരെ കൊച്ചിയില് കോണ്ഗ്രസ് നടത്തിയ വഴിതടയല് സമരത്തിനെതിരെ നടന് ജോജു ജോര്ജ് പരസ്യപ്രതിഷേധം നടത്തിയതിനെ തുടര്ന്നുള്ള പ്രശ്നങ്ങളാണ് പുതിയ വിവാദങ്ങളിലേക്ക് എത്തുന്നത്. ജോജുവിനെതിരെ യൂത്ത് കോണ്ഗ്രസിന്റെ സമരപരിപാടി തുടരുകയാണ്.
ഹൈവേ ഉപരോധത്തിനിടെ നടന് ജോജു ജോര്ജിന്റെ കാര് തല്ലിത്തകര്ത്ത കേസില് മുന് മേയര് ടോണി ചമ്മിണി ഉള്പ്പെടെ ആറ് പ്രതികളളും ജയിലിലാണ്. അറ്റകുറ്റപ്പണിക്ക് ആറരലക്ഷം രൂപ ചെലവ് വരുമെന്നാണ് കോടതിക്ക് കൈമാറിയ റിപ്പോര്ട്ടിലുള്ളത്. ഈ തുകയുടെ 50 ശതമാനം കെട്ടിവെച്ച് ജാമ്യം അനുവദിക്കണമെന്നാണ് പ്രതികളുടെ വാദം. എന്നാല് കാറിന്റെ മൊത്തം വിലയുടെ 50 ശതമാനം കെട്ടിവെക്കണമെന്നതാണ് പ്രോസിക്യൂട്ടറുടെ വാദം.
അതിനിടെ ജോജുവിനെതിരെയുള്ള പരാതിയില് കേസെടുക്കാത്ത പൊലീസിന്റെ നടപടിയില് പ്രതിഷേധിച്ച് മഹിളാ കോണ്ഗ്രസിന്റെ ആഭിമുഖ്യത്തില് മരട് സ്റ്റേഷനിലേക്ക് പ്രകടനം നടന്നു. ഉപരോധത്തിന്റെ വീഡിയോ ദൃശ്യങ്ങള് ഉള്പ്പെടെ പരിശോധിച്ചിട്ടും ജോജുവിനെതിരെ കേസെടുക്കാനുള്ള തെളിവൊന്നും ലഭിച്ചിട്ടില്ലെന്ന് പറയുന്നതിനെതാരായാണ് പ്രതിഷേധം. എന്തായാലും ഇങ്ങനെ പോയാല് ജോജുവിനെ സഖാക്കളങ്ങെടുക്കുമെന്ന കാര്യത്തില് സംശയം വേണ്ട.
https://www.facebook.com/Malayalivartha
