കൊല്ലത്ത് മലവെള്ളപ്പാച്ചില്‍... കൊല്ലം ആര്യങ്കാവ്, ഇടപ്പാളയം മേഖലയില്‍ രാത്ര ശക്തമായി മഴ പെയ്തു. വീടുകളിലും കടകളിലും വെള്ളം കയറി. കുളത്തൂപ്പുഴ അമ്പതേക്കറില്‍ മലവെള്ളപ്പാച്ചിലുണ്ടായി. വില്ലുമല ആദിവാസി കോളനി ഒറ്റപ്പെട്ടു.


പത്തനംതിട്ട, കോട്ടയം ജില്ലകളില്‍ ഉരുള്‍പൊട്ടല്‍, നിരവധി കുടുംബങ്ങളെ മാറ്റി പാര്‍പ്പിച്ചു. കോട്ടയം, എരുമേലി കണമലയില്‍ രണ്ടിടത്ത് ഉരുള്‍പൊട്ടലുണ്ടായി. കീരിത്തോട്-പാറക്കടവ് മേഖലയില്‍ ഇന്ന് പുലര്‍ച്ചെയാണ് ഉരുള്‍പൊട്ടലുണ്ടായത്. എഴുത്വപ്പുഴയിലുണ്ടായ ഉരുള്‍പൊട്ടലില്‍ രണ്ട് വീടുകള്‍ തകര്‍ന്നുപോയി. പനന്തോട്ടം ജോസ്, തെന്നി പ്ലാക്കല്‍ ജോബിന്‍ എന്നിവരുടെ വീടുകളാണ് തകര്‍ന്നടിഞ്ഞത്.

രണ്ട് ഓട്ടോറിക്ഷകള്‍ ഒലിച്ചുപൊയി. ഒന്‍പത് കുടുംബങ്ങളെ മാറ്റിപ്പാര്‍പ്പിച്ചു. എഴുത്വപ്പുഴ- കണമല ബൈപ്പാസ് റോഡില്‍ മണ്ണിടിഞ്ഞു വീണെങ്കിലും ആളപായമൊന്നുമില്ല.

മണ്ണിടിച്ചിലില്‍പ്പെട്ട ഒരാളെ രക്ഷപ്പെടുത്തി. കണമല, എരത്വപുഴ, ഇടകടത്തി റോഡുകളില്‍ ഗതാഗത തടസമുണ്ടായി.പത്തനംതിട്ട കൊക്കാത്തോട് ഭാഗത്ത് ഉരുള്‍പൊട്ടിയതായും റിപ്പോര്‍ട്ടുണ്ട്. ഒരു വീട് തകര്‍ന്നു. നാല് വീടുകളില്‍ വെള്ളം കയറി. കോന്നി അച്ചന്‍കോവില്‍ ആറ്റില്‍ ജലനിരപ്പുയര്‍ന്നു. അഞ്ച് വീടുകളില്‍ വെള്ളം കയറി.