കൊച്ചിയില്‍ മുന്‍ മിസ് കേരളയടക്കം മൂന്ന് പേര്‍ കാറപകടത്തില്‍ കൊല്ലപ്പെട്ട സംഭവത്തില്‍ വലിയ ട്വിസ്റ്റാണ് ഉണ്ടായിരിക്കുന്നത്. ഇവരെ പിന്തുടര്‍ന്നെത്തിയ ആഡംബരക്കാര്‍ ഓടിച്ചയാള്‍ക്കെതിരെ കേസെടുക്കും. പക്ഷെ അത് റാഷ് ഡ്രൈവിങ്ങിന് ആണെന്ന് മാത്രം.

ആഡംബര കാര്‍ ഓടിച്ചിരുന്ന എറണാകുളം സ്വദേശി സൈജുവിനെ ചോദ്യം ചെയ്തു വിട്ടയച്ച ശേഷമാണ് പൊലീസ് ഇക്കാര്യമറിയിച്ചത്. ഐപിസി 279 പ്രകാരം അമിത വേഗത്തില്‍ വാഹനം ഓടിച്ചതിന് സൈജുവിനെതിരെ കേസെടുക്കും. അപകടത്തില്‍പെട്ട കാര്‍ ഓടിച്ചിരുന്ന അബ്ദുള്‍ റഹ്മാനെ അടുത്ത ദിവസം കസ്റ്റഡിയില്‍ എടുത്തു ചോദ്യം ചെയ്ത ശേഷമായിരിക്കും ഇക്കാര്യത്തില്‍ തുടര്‍നടപടിയുണ്ടാകുക.

സൈജുവിനെ പൊലീസ് വിട്ടയച്ചെങ്കിലും എപ്പോള്‍ വേണമെങ്കിലും വിളിപ്പിച്ചാല്‍ ചോദ്യം ചെയ്യലിനു ഹാജരാകണമെന്നു നിര്‍ദേശിച്ചിട്ടുണ്ട്. കുണ്ടന്നൂരില്‍ വാക്കുതര്‍ക്കമല്ല, യുവതികള്‍ ഉള്‍പ്പടെയുള്ളവര്‍ക്കു ഹോട്ടലില്‍ താമസിക്കാം എന്നു പറയുക മാത്രമാണു ചെയ്തതെന്നും വേഗം കുറച്ചു പോകാന്‍ പറയുന്നതിനാണു പിന്തുടര്‍ന്നത് എന്നുമാണ് സൈജു നല്‍കിയ മൊഴിയിലുള്ളത്. സൈജു ഹോട്ടലുമായി ബന്ധമുള്ള ആളാണ്. എന്നാല്‍ വാഹനം ഹോട്ടല്‍ ഉടമയുടേതല്ലെന്നാണു വിവരം. വേറൊരാളുടെ വാഹനമാണ് ഉപയോഗിക്കുന്നതെന്നാണ് സൈജു പൊലീസിനോടു പറഞ്ഞത്.

നിലവില്‍ ഹോട്ടല്‍ ഉടമ എവിടെയാണെന്നതിനെക്കുറിച്ചു വിവരമില്ലെന്നു പൊലീസ് പറഞ്ഞു. ഇദ്ദേഹം കേസില്‍ പ്രതിയല്ലാത്തതിനാല്‍ ഒളിവിലാണെന്നു പറയാനാകില്ല. ഹാര്‍ഡ് ഡിസ്‌ക് നശിപ്പിച്ചതിനു തെളിവു നശിപ്പിച്ചെന്ന പേരില്‍ കേസെടുക്കേണ്ട സാഹചര്യമില്ല. ഹോട്ടലിനുള്ളിലെ ദൃശ്യങ്ങള്‍ ഉള്ള ഹാര്‍ഡ് ഡിസ്‌ക് പൊലീസിനു ലഭിച്ചിട്ടില്ല. അകത്തു നടന്ന ഇടപാടുകളും, ഇടപാടുകാരുടെ സ്വകാര്യത നഷ്ടപ്പെടാതിരിക്കാനുമാകണം ഹാര്‍ഡ് ഡിസ്‌ക് നശിപ്പിച്ചതെന്നാണു സൂചന. കൂടുതല്‍ പരിശോധനയില്‍ ഹോട്ടലിനു പുറത്തേക്കു യുവതികള്‍ വരുന്ന ദൃശ്യങ്ങള്‍ പൊലീസിനു ലഭിച്ചിരുന്നു. ഇതില്‍ പെണ്‍കുട്ടികള്‍ നൃത്തം ചെയ്താണ് ഇറങ്ങി പോകുന്നതെന്നും കണ്ടെത്തിയിട്ടുണ്ട്.

അതിനിടെ ആന്‍സി കബീറും സംഘവും ഫോര്‍ട്ട് കൊച്ചിയിലെ നമ്പര്‍ 18 ഹോട്ടലില്‍ നിന്ന് ഇറങ്ങുമ്പോള്‍ മുതല്‍ സൈജു ആഡംബരക്കാറില്‍ ഇവരെ പിന്തുടര്‍ന്നുവെന്നാണ് വിവരം. കാര്‍ പിന്തുടരുന്നത് കണ്ട് കുണ്ടന്നൂരില്‍ വച്ച് ആന്‍സി കബീര്‍ സഞ്ചരിച്ചിരുന്ന വാഹനം വേഗത കുറച്ചു. ഇതേത്തുടര്‍ന്ന് സൈജു ഇവരോട് സംസാരിച്ചു. ഇതിന്റെ സിസി ടി വി ദൃശ്യങ്ങള്‍ പൊലീസിന് ലഭിച്ചിരുന്നു. എന്നാല്‍ കുണ്ടന്നൂരില്‍ വച്ച് വാക്കുതര്‍ക്കമുണ്ടായില്ലെന്നും യുവതികള്‍ ഉള്‍പ്പടെയുള്ളവര്‍ക്ക് ഹോട്ടലില്‍ താമസിക്കാമെന്ന് പറയുക മാത്രമാണ് ചെയ്തതെന്നുമാണ് സൈജുവിന്റെ മൊഴി. പക്ഷേ ഈ സംഭാഷണത്തിന് ശേഷം ഇരു കൂട്ടരും വാഹനവുമായി പാഞ്ഞെന്നാണ് പൊലീസ് പറയുന്നത്.

സൈജുവിന്റെ കാറിനെ മറികടന്ന് മുന്നോട്ട് കുതിക്കുമ്പോഴാണ് അപകടമുണ്ടാകുന്നത്. അത് കൊണ്ട് തന്നെ കൊല്ലപ്പെട്ടവര്‍ സഞ്ചരിച്ച കാറോടിച്ച അബ്ദുറഹ്മാനെ വീണ്ടും ചോദ്യം ചെയ്ത ശേഷം സൈജുവിനെതിരെ കേസെടുക്കാന്‍ ആണ് നീക്കം. അപകടമുണ്ടായ ശേഷം ഇടപ്പള്ളി എത്തിയ സൈജു ഹോട്ടലുടമ റോയിയെ വിളിച്ചിരുന്നു. പിന്നെ അപകട സ്ഥലത്തേക്ക് എത്തുകയായിരുന്നു. അതും സംശയമുണ്ട്.

ഡിജെ പാര്‍ട്ടി നടന്ന ഹോട്ടലിന്റെ ഉടമയായ റോയിയുമായി സൈജുവിന് അടുത്ത ബന്ധമുണ്ട്. നിലവില്‍ റോയ് എവിടെ എന്ന് പൊലീസിന് വിവരമില്ല. റോയിയുടെ നിര്‍ദേശപ്രകാരമാണ് ഹോട്ടലിലെ സിസിടിവി ദൃശ്യങ്ങള്‍ അടങ്ങുന്ന ഹാര്‍ഡ് ഡിസ്‌ക് മാറ്റിയെന്ന് പൊലീസിന് വ്യക്തമായിട്ടുണ്ട്. എന്തായാലും മാധ്യമങ്ങള്‍ ഈ വിഷയം സജീവമായി ചര്‍ച്ച ചെയ്തതോടെ അന്വേഷണം കടുപ്പിക്കും.