തോരാതെ പെയ്യുന്ന മഴ സുഗമമായ ശബരിമല തീര്‍ത്ഥാടനത്തിന് തടസം സൃഷ്ടിക്കുമോ എന്ന ആശങ്ക ബാക്കിയാകുന്നു. ഒപ്പം മുന്നൊരുക്കള്‍ക്കും തടസമായി. മഴ ശക്തമാകുമെന്ന കാലാവസ്ഥാ നിരീക്ഷണ കേന്ദ്രത്തിന്റെ വിലയിരുത്തലാണ് തീര്‍ത്ഥാടനകാലത്തിന് ഭീഷണിയാകുന്നത്.

കഴിഞ്ഞ രണ്ട് ദിവസമായി ശബരിമലയുള്‍പ്പെടുന്ന വനാന്തരങ്ങളില്‍ മഴ ശക്തമാണ്. ഇതോടെ പമ്പാനദിയില്‍ ജലനിരപ്പ് ഉയര്‍ന്നിട്ടുണ്ട്. കഴിഞ്ഞ ദിവസം ശബരിമല വനാന്തരങ്ങളില്‍ ഉരുള്‍പൊട്ടല്‍ ഉണ്ടായതിനെ തുടര്‍ന്ന് ഞുണുങ്ങാറിന് കുറുകെയുള്ള താല്‍ക്കാലിക പാലം ഒലിച്ചുപോയി. ഇതിനെ തുടര്‍ന്ന് ചെറിയാനവട്ടത്തുള്ള സ്വീവേജ് ട്രീറ്റ്‌മെന്റ് പ്‌ളിന്റില്‍ നവീകരണം നടത്തിവരുന്ന തൊഴിലാളികള്‍ ഒറ്റപ്പെട്ടു.

പരമ്പരാഗതപാതയായ കരിമല വഴി വരുന്ന തീര്‍ത്ഥാടകര്‍ പമ്പയില്‍ പ്രവേശിക്കുന്നത് ഈ താല്‍ക്കാലിക പാലംവഴിയായിരുന്നു. പരമ്പരാഗത പാതവഴി തീര്‍ത്ഥാടകര്‍ക്ക് പ്രവേശനം നിരോധിച്ചിട്ടുണ്ടെങ്കിലും പുനരാരംഭിക്കണോ എന്നത് സംബന്ധിച്ച് തീരുമാനം കൈക്കൊള്ളാനിരിക്കേയാണ് താല്‍ക്കാലിക പാലം തകര്‍ന്ന് വീണത്.

പമ്പയിലെ ക്ഷേത്രസമുച്ചയങ്ങളുടെ പെയിന്റിംഗ് ജോലികള്‍ നടന്നുവരുകയാണ്. ദേവസ്വം ബോര്‍ഡ് നിയമിച്ച താല്‍ക്കാലിക ജീവനക്കാര്‍ ശബരിമലയില്‍ എത്തി. അരണവണ നിര്‍മ്മാണം ആരംഭിച്ചതിന് തൊട്ടുപിന്നാലെ ഇന്ന് ഉണ്ണിയപ്പത്തിന്റെയും പമ്പയിലെ പ്രധാന പ്രസാദമായ മോദകത്തിന്റെയും നിര്‍മ്മാണം തുടങ്ങും.

നാളെ വൈകിട്ട് നടതുറക്കുമെങ്കിലും ചൊവ്വാഴ്ച രാത്രി ഒരുമണിയോടെ മാത്രമേ തീര്‍ത്ഥാടകരെ സന്നിധാനത്തേക്ക് പ്രവേശിപ്പിക്കൂ.