ശക്തമായ മഴയെ തുടർന്ന് ജലനിരപ്പ് ഉയർന്നതിനാൽ ഇടുക്കി അണക്കെട്ട് തുറന്നു. ഉച്ചയ്‌ക്ക് രണ്ടോടെയാണ് അണക്കെട്ടിന്റെ മൂന്നാമത് ഷട്ടർ 40 സെന്റീമീ‌റ്റർ ഉയർത്തിയത്. അതിനിടയിൽ പുറത്ത് വരുന്നത് മറ്റൊരു വർത്തയാണ്. തുടർച്ചയായി പെയ്യുന്ന കനത്ത മഴയിൽ മണ്ണിടിച്ചിലിനെ തുടർന്ന് ഒരാൾ മരിച്ചു. എറണാകുളം കളമശേരിയിലാണ് സംഭവം.

തിരുവനന്തപുരം ഉദിയൻകുളങ്ങര കൊച്ചോട്ടുകോണം പനവിള വീട്ടിൽ തങ്കരാജ്(72) ആണ് മരിച്ചത്. ഒൻപത് മണിയോടെ കണ്ടെയ്നർ റോഡിലാണ് മണ്ണിടിച്ചിലുണ്ടായത്. തങ്കരാജ് ലോറി നിർത്തി പുറത്തിറങ്ങിയയുടൻ മണ്ണിടിയുകയായിരുന്നു.ദേശീയപാതയിൽ അപ്പോളോ ടയേഴ്സിന് സമീപമാണ് സംഭവം. തങ്കരാജ് മൂത്രമൊഴിക്കുന്നതിനായി ലോറി നിർത്തി പുറത്തിറങ്ങുകയായിരുന്നു.

ഈ സമയം സമീപത്തെ മൺതിട്ട ഇടിഞ്ഞ് ശരീരത്തിലേക്ക് മണ്ണും വലിയ കല്ലും വീഴുകയായിരുന്നു. ഉടൻ സമീപത്തുണ്ടായിരുന്ന മറ്റു ലോറി ഡ്രൈവർമാരും നാട്ടുകാരുമെത്തി തങ്കരാജിനെ പുറത്തെടുക്കുമ്പോഴേക്കും മരിച്ചിരുന്നു. മൃതദേഹം കളമശ്ശേരി മെഡിക്കൽ കോളേജ് ആശുപത്രിയിലേക്ക് മാറ്റി.