ശിശുദിനത്തിൽ കെ സുധാകരന്റെ കുറിപ്പ് വളരെയധികം ശ്രദ്ധേയമാകുകയാണ് . കുട്ടികൾ സ്നേഹത്തോടെ "ചാച്ചാജി "എന്നു വിളിച്ച പണ്ഡിറ്റ് നെഹ്റുവിനെയും, നെഹ്റുവിൻ്റെ ഇന്ത്യയെയും പറ്റി കുട്ടികൾക്ക് പഠിപ്പിച്ചു കൊടുക്കേണ്ടത് കാലഘട്ടത്തിൻ്റെ അനിവാര്യതയാണെന്ന് അദ്ദേഹം ചൂണ്ടിക്കാണിക്കുന്നു. അദ്ദേഹത്തിന്റെ കുറിപ്പിന്റെ പൂർണ്ണ രൂപം ഇങ്ങനെ; ഇന്ന് ശിശുദിനം.

ലോകം കണ്ട ഏറ്റവും പ്രഗത്ഭരായ രാഷ്ട്രതന്ത്രജ്ഞരിൽ ഒരാളായ പണ്ഡിറ്റ് ജവഹർലാൽ നെഹ്റുവിൻ്റെ 132-ാം ജന്മദിനം. കുട്ടികൾ സ്നേഹത്തോടെ "ചാച്ചാജി "എന്നു വിളിച്ച പണ്ഡിറ്റ് നെഹ്റുവിനെയും, നെഹ്റുവിൻ്റെ ഇന്ത്യയെയും പറ്റി കുട്ടികൾക്ക് പഠിപ്പിച്ചു കൊടുക്കേണ്ടത് കാലഘട്ടത്തിൻ്റെ അനിവാര്യതയാണ്.

രാഷ്ട്രശില്പികളിൽ പ്രധാനിയായ പണ്ഡിറ്റ് ജവഹർലാൽ നെഹ്റുവിൻ്റെ സംഭാവനകളെ ഇകഴ്ത്തിക്കാണിക്കാനും അപമാനിക്കാനും രാഷ്ട്രീയ ഫാസിസ്റ്റുകൾ നിരന്തരം ശ്രമിച്ചുകൊണ്ടിരിക്കുകയാണ്.ലോക രാജ്യങ്ങൾക്കിടയിൽ ഇന്ത്യയ്ക്ക് ആദരവ് നേടിക്കൊടുത്ത അദ്ദേഹത്തെ കോമാളിത്തം കാണിക്കുന്ന പുതിയ ഭരണാധികാരികളുടെ കാലത്ത് കൂടുതൽ പഠിക്കേണ്ടതുണ്ട്. 

ശിശുദിനത്തിൽ "ഇന്നത്തെ ശിശുക്കൾ നാളത്തെ പൗരൻമാർ'' എന്ന മുദ്രാവാക്യവുമായി മൂവർണ്ണക്കൊടികളുമായി നടന്നു നീങ്ങുന്ന കുരുന്നുകൾ മലയാളികളുടെ ഗൃഹാതുരതയാണ്. എന്നാൽ ആ മുദ്രാവാക്യത്തിൽ മാത്രം നെഹ്റുവിൻ്റെ ഓർമകളെ തളച്ചിടാതെ കുട്ടികളെ നെഹ്റുവിനെ പഠിപ്പിക്കാൻ നാം തയ്യാറാകണം.

കുട്ടികളെ ഏറെ സ്നേഹിച്ച പണ്ഡിറ്റ്ജിയെ പറ്റി പഠിക്കുമ്പോൾ അവർ ഇന്ത്യയെ കണ്ടെത്തും. അവർ ഇന്ത്യയുടെ ചരിത്രം പഠിക്കും. അത്തരത്തിൽ നെഹ്റുവിനെയും ഗാന്ധിയെയും ഇന്ത്യയുടെ ചരിത്രത്തെയും തൊട്ടറിഞ്ഞ ശിശുക്കൾ നാളെ പൗരൻമാരാകുമ്പോൾ അവരെ സ്വാധീനിക്കാൻ ഒരു വർഗ്ഗീയ-രാഷ്ട്രീയ ഫാസിസ്റ്റുകൾക്കും സാധിക്കില്ല.

കാരണം നെഹ്റുവിനെ പഠിച്ചാൽ അവരിൽ ഉന്നതമായ ജനാധിപത്യ മൂല്യങ്ങളും മതനിരപേക്ഷ ചിന്തകളും സ്വാഭാവികമായും ഉരുത്തിരിഞ്ഞിരിക്കും. ഈ നല്ല ദിനത്തിൽ ആരംഭം കുറിക്കാം. കുട്ടികൾ പഠിച്ചു തുടങ്ങട്ടെ, ഇന്ത്യയുടെ ചരിത്രത്തെയും ചരിത്ര പുരുഷൻമാരെയും ! എല്ലാ കുരുന്നുകൾക്കും ഏറെ സ്നേഹത്തോടെ ശിശുദിനാശംസകൾ നേരുന്നു.