സംസ്ഥാനത്ത് കനത്ത മഴ തുടരുന്നു... ജില്ലകളിലെ വിദ്യാഭ്യാസ സ്ഥാപനങ്ങള്ക്കു നാളെ അവധി പ്രഖ്യാപിച്ചു; സര്വകലാശാലകള് പരീക്ഷകളും മാറ്റി; കാല്ലം, കോട്ടയം, പത്തനംതിട്ട, ആലപ്പുഴ, കാസര്കോട്, എറണാകുളം ജില്ലകളിലെ പ്രഫഷനല് കോളജുകള് ഉള്പ്പെടെയുള്ള വിദ്യാഭ്യാസ സ്ഥാപനങ്ങള്ക്കാണ് തിങ്കളാഴ്ച കലക്ടര്മാര് അവധി പ്രഖ്യാപിച്ചത്
സംസ്ഥാനത്തു കനത്ത മഴ തുടരുന്നതിനാല് വിവിധ ജില്ലകളിലെ വിദ്യാഭ്യാസ സ്ഥാപനങ്ങള്ക്കു നാളെ അവധി പ്രഖ്യാപിച്ചു. സര്വകലാശാലകള് പരീക്ഷകളും മാറ്റിവച്ചു.കൊല്ലം, കോട്ടയം, പത്തനംതിട്ട, ആലപ്പുഴ, കാസര്കോട്, എറണാകുളം ജില്ലകളിലെ പ്രഫഷനല് കോളജുകള് ഉള്പ്പെടെയുള്ള വിദ്യാഭ്യാസ സ്ഥാപനങ്ങള്ക്കാണ് തിങ്കളാഴ്ച കലക്ടര്മാര് അവധി പ്രഖ്യാപിച്ചത്. കാസര്കോട് ജില്ലയില് കോളജുകള്ക്ക് അവധി ബാധകമല്ല. കാട്ടാക്കട, നെടുമങ്ങാട് താലൂക്കുകളിലെ സ്കൂളുകള്ക്ക് നാളെ അവധി.എംജി സര്വകലാശാല തിങ്കളാഴ്ച നടത്താനിരുന്ന എല്ലാ പരീക്ഷയും മാറ്റി. പുതുക്കിയ തീയതി പിന്നീട് അറിയിക്കും.
കേരള സര്വകലാശാല തിങ്കളാഴ്ച ആരംഭിക്കാനിരുന്ന രണ്ടാം സെമസ്റ്റര് എംഎ, എംഎസ്സി, എംകോം, എംഎസ്ഡബ്ല്യു, എംസിജെ പരീക്ഷകള് 22ന് ആരംഭിക്കാനായി മാറ്റി. കേരള ആരോഗ്യ ശാസ്ത്ര സര്വകലാശാല തിങ്കളാഴ്ച നടത്താനിരുന്ന പരീക്ഷകളും മാറ്റി. പുതുക്കിയ തീയതി സര്വകലാശാല വൈബ്സൈറ്റില് ഉടന് പ്രസിദ്ധപ്പെടുത്തും.
തിങ്കളാഴ്ച എറണാകുളം, ഇടുക്കി, തൃശൂര് ജില്ലകളില് കാലാവസ്ഥാ വകുപ്പ് റെഡ് അലര്ട്ട് പ്രഖ്യാപിച്ചു. ഇന്ന് തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂര്, കാസര്കോട് ജില്ലകളില് ഓറഞ്ച് അലര്ട്ടും മറ്റു ജില്ലകളില് യെലോ അലര്ട്ടുമാണ്. ചൊവ്വാഴ്ച വരെ പരക്കെ മഴയായിരിക്കുമെന്നാണ് പ്രവചനം.
അപ്പര്കുട്ടനാട്ടിലെ തിരുവല്ല, ചെങ്ങന്നൂര് മേഖലകളില് കനത്തമഴയാണ്. മാന്നാര്, ബുധനൂര്, ചെന്നിത്തല, വെണ്മണി, ചെറിയനാട് പഞ്ചായത്തുകളില് വെള്ളക്കെട്ട് രൂപപ്പെട്ടു. അച്ചന്കോവില്, കുട്ടമ്പേരൂരാര്, പുത്തനാര് എന്നിവ കരകവിഞ്ഞു. കുട്ടനാട്ടില് ജലനിരപ്പുയരുകയാണ്. പത്തനംതിട്ടയില് അതീവജാഗ്രതാ നിര്ദേശം പുറപ്പെടുവിച്ചു. അടൂര് എംസി റോഡില് വെള്ളം കയറി ഏനാത്ത് ഉള്പ്പെടെ പലയിടത്തും ഗതാഗതം തിരിച്ചുവിട്ടു. നദിതീരങ്ങളിലും ഉരുള്പൊട്ടല് മേഖലയിലുമുള്ളവര് ജാഗ്രത പാലിക്കണം. മലയോരമേഖലയിലേക്കുള്ള യാത്ര ഒഴിവാക്കണം. കൊച്ചിയിലും ആലപ്പുഴയിലും തൃശൂരും കോട്ടയത്തും കനത്ത മഴ തുടരുകയാണ്. എറണാകുളം കളമശേരിയില് മണ്ണിടിഞ്ഞ് ഒരാള് മരിച്ചു. തിരുവനന്തപുരം നെയ്യാറ്റിന്കര സ്വദേശി തങ്കരാജ് (72) ആണ് മരിച്ചത്. കോട്ടയം ജില്ലയില് കൂട്ടിക്കല് മേഖലയില് മേഖലയില് പുല്ലകയാറ്റിലെ ജലനിരപ്പ് ഉയര്ന്നു തന്നെ നില്ക്കുന്നു. കൂട്ടിക്കലിലെ താളുങ്കല് തോടും ഇടുക്കി ജില്ലയിലെ കൊക്കയാറ്റില്നിന്ന് വരുന്ന ചന്തക്കടവ് തോടും കരകവിഞ്ഞു.
ആലപ്പുഴ ചങ്ങനാശേരി റോഡില് രാവിലെ െവള്ളക്കെട്ടൊഴിഞ്ഞെങ്കിലും വേലിയേറ്റം വര്ധിക്കുന്നത് ജലനിരപ്പ് ഉയരാനിടയാക്കി. ഇപ്പോള് ഒന്നാം കരയ്ക്കും പള്ളിക്കുട്ടുമ്മയ്ക്കും ഇടയിലാണ് വെള്ളക്കെട്ടുള്ളത്. ഉച്ചയോടെ കിടങ്ങറ പെട്രോള് പമ്പിനു സമീപവും വെള്ളം കയറിയിട്ടുണ്ട്. ഈ പ്രദേശത്ത് വലിയ കുഴികള് രൂപപ്പെട്ടത് യാത്രക്കാരെ അപകടത്തിലാക്കുന്നുണ്ട്. കായംകുളം പുനലൂര് റോഡില് വെട്ടിക്കോട്ട് ചാല് നിറയാറായി. മഴ തുടര്ന്നാല് കെപി റോഡില് ഉച്ചയ്ക്കു ശേഷം വെള്ളം കയറാന് സാധ്യതയുണ്ട്.
കെപി റോഡിലെ നൂറനാട് നിന്നു എംസി റോഡിലെ പന്തളത്തേക്കുള്ള റോഡില് കുടശ്ശനാട് മാവിളമുക്കില് വെള്ളം കയറിത്തുടങ്ങി. കരിങ്ങാലില് ചാല് പുഞ്ചയില് വെള്ളം നിറഞ്ഞതിനെത്തുടര്ന്നാണ് റോഡില് വെള്ളം കയറിയത്. അച്ചന്കോവിലാറ്റില് വെള്ളം കയറുന്നത് മാവേലിക്കര താലൂക്കിലെ പല റോഡുകളിലെയും ഗതാഗതം തടസ്സപ്പെടാനിടയാക്കും.
പെരുന്ന ഭാഗത്ത് വെള്ളം കയറിയതിനെ തുടര്ന്ന് പെരുന്ന ഗവ എല്പി സ്കൂളില് ക്യാംപ് തുടങ്ങി. മണിമലയാറ്റില് പഴയിടം കോസ്വേയില് വെള്ളം മുട്ടിയൊഴുകുന്നു. അനിഷ്ട സംഭവങ്ങള് ഇതു വരെ ജില്ലയില് റിപ്പോര്ട്ട് ചെയ്തിട്ടില്ല. മണിമലയാര്, മീനച്ചിലാര് എന്നിവിടങ്ങളില് വെള്ളമുയര്ന്നെങ്കിലും അപകട നിലയിലേക്ക് എത്തിയിട്ടില്ല.
ശനിയാഴ്ച കനത്ത മഴ വന്നാശമുണ്ടാക്കിയ തിരുവനന്തപുരം ജില്ലയില് ഇപ്പോള് മഴ മാറി നില്ക്കുകയാണ്. തിരുവനന്തപുരത്ത് 33 ദുരിതാശ്വാസ ക്യാംപുകളിലായി 571 പേരെ മാറ്റിപ്പാര്പ്പിച്ചു. വിനോദ സഞ്ചാരവും ക്വാറി, മൈനിങ് പ്രവര്ത്തനങ്ങളും നിരോധിച്ചു. മലയോര മേഖലകളിലേയ്ക്ക് അത്യാവശ്യത്തിനല്ലാതെ യാത്ര പാടില്ല. നെയ്യാര്, അരുവിക്കര, പേപ്പാറ ഡാമുകളുടെ എല്ലാ ഷട്ടറുകളും ഉയര്ത്തിയിരിക്കുന്നതിനാല് സമീപവാസികള് അതീവ ജാഗ്രത പാലിക്കണമെന്ന് ജില്ലാ കലക്ടര് അറിയിച്ചു.
https://www.facebook.com/Malayalivartha
