റോഡില്‍ നടന്നുപോയ യുവതിയെ മൂന്നു വളര്‍ത്തുനായകള്‍ ആക്രമിച്ചു. റോഡില്‍ തലയടിച്ച് വീണ യുവതിയെ നായകള്‍ ചേര്‍ന്ന് കടിച്ചു വലിക്കുന്ന വീഡിയോ പുറത്തായിരിക്കുകയാണ്. താമരശ്ശേരിയില്‍ അമ്പായത്തോട്ടില്‍ സ്വകാര്യ വ്യക്തി വളര്‍ത്തുന്ന നായകളുടെ അക്രമം നാട്ടുകാര്‍ക്ക് പൊതുശല്യമായിത്തീര്‍ന്നിരിക്കുന്നത്. വഴി നടക്കുന്ന നാട്ടുകാരെപ്പോലും ആക്രമിക്കുന്ന സംഭവം ഇവിടെ തുടക്കഥയാവുകയാണ്. ഞായറാഴ്ച രാവിലെയും നായകള്‍ നാട്ടുകാരെ കടിച്ചു പറിച്ചു.

അമ്പായത്തോട്ടില്‍ നായയുടെ കടിയേറ്റ് യുവതിക്ക് സാരമായി പരിക്കേറ്റു. അമ്പായത്തോട് മിച്ചഭൂമിയിലെ താമസക്കാരിയായ ഫൗസിയക്കാണ് കടിയേറ്റത്. ശരീരമാസകലം പരിക്കേറ്റ ഇവരെ ആശുപത്രിയില്‍ പ്രവേശിപ്പിച്ചു
നേരത്തെ നിരവധി പേരെ കടിച്ച വെഴുപ്പൂര്‍ എസ്‌റ്റേറ്റ് ഉടമ ജോളി തോമസിന്റെ ചെറുമകന്‍ റോഷന്റെ വളര്‍ത്തുനായയാണ് റോഡില്‍ വെച്ച് യുവതിയെ കടിച്ചത്. ഇവരെ ആശുപത്രിയില്‍ പ്രവേശിപ്പിച്ചു. ഏതാനും ദിവസം മുമ്പ് പ്രഭാകരന്‍ എന്ന വ്യക്തിക്കും ഈ നായകളുടെ കടിയേറ്റിരുന്നു. ഇതിനെ തുടര്‍ന്ന്ഇദ്ദേഹം മെഡിക്കല്‍ കോളേജില്‍ ചികിത്സതേടിയിരുന്നു.

ഇതിന് മുമ്പും പലര്‍ക്കും നായയുടെ കടിയേറ്റെങ്കിലും ഉടമ അതൊന്നും കാര്യമാക്കിയില്ലെന്ന് നാട്ടുകാര്‍ പരാതിപ്പെടുന്നു. ആക്രമിക്കുന്ന നായകളെ ഇയാള്‍ വീണ്ടും, വീണ്ടും അശ്രദ്ധമായി തുറന്നു വിടുകയാണ്. മൂന്നു നായകളാണ് യുവതിയെ ഒന്നിച്ച് ആക്രമിച്ചത് .

കൈയ്യിലൊരു പഌസ്റ്റിക് ബാഗുമായി റോഡു മുറിച്ചു കടക്കാനൊരുങ്ങി നില്‍ക്കുന്ന യുവതി, നായകളെ അകറ്റി ഓടിക്കാനായി ശ്രമിക്കുന്നുണ്ട്. എന്നാല്‍ അവ ചാടി വീണതോടെ തലയിടിച്ചു വീണ യുവതിയെ നായകള്‍ ചേര്‍ന്ന് കടിച്ചു വലിക്കുന്നത് കാണാം നാട്ടുകാര്‍ രക്ഷിക്കാന്‍ ശ്രമിക്കുന്നുണ്ടെങ്കിലും ഇവ കടി വിടാതെ തുടരുകയാണ്. ഉടമ ഇടപെട്ടാണ് നായകളെ തിരിച്ചോടിക്കുന്നത്.

നായയുടെ അക്രമം തുടര്‍ക്കഥയായതോടെ നാട്ടുകാര്‍ രോഷാകുലരാണ്. നായയുടെ ഉടമക്കെതിരെ പ്രതിഷേധം ശക്തമായതിനെ തുടര്‍ന്ന് പോലീസ് സ്ഥലത്തെത്തി. പരാതികളെ തുടര്‍ന്ന് ഉടമയെ പോലീസ് കസ്റ്റഡിയിലെടുത്തു.