യുവതീ പ്രവേശന വിവാദവും പ്രളയവും കോവിഡും സൃഷ്ടിച്ച പ്രതിസന്ധികള്‍ നിമിത്തം രണ്ടുവര്‍ഷത്തെ ഇടവേളക്കുശേഷമാണ് ശബരിമല തീര്‍ഥാടനം ഇന്ന് പുനരാരംഭിക്കുകയാണ്. മണ്ഡലകാലത്തിന് തുടക്കംകുറിച്ച് ശബരിമലയില്‍ ഇന്ന് വൈകുന്നേരം നട തുറക്കും.

പക്ഷെ തീര്‍ത്തിട്ടും തീരാത്ത ശാപമായി മലകയറ്റം മാറുകയാണ്. യുവതീ പ്രവേശന വിവാദത്തിന് ശേഷം ഇതുവരേയും മര്യാദയ്ക്ക് ശബരിമല ദര്‍ശനം ഭക്തര്‍ക്ക് സാധ്യമായിട്ടില്ല.

കനത്ത മഴ തുടരുന്നതിനാല്‍ അടുത്ത മൂന്നു നാല് ദിവസങ്ങളില്‍ ആളുകളുടെ എണ്ണം നിയന്ത്രിക്കാന്‍ മുഖ്യമന്ത്രിയുടെ നേതൃത്വത്തില്‍ നടന്ന യോഗം തീരുമാനിച്ചു. ശബരിമല നട തുറക്കുമ്പോള്‍ കൂടുതല്‍ തീര്‍ഥാടകര്‍ പ്രവേശിക്കുന്നത് ഇപ്പോഴുള്ള അവസ്ഥയില്‍ പ്രയാസം സൃഷ്ടിക്കും. മഴ ശക്തമായതിനാല്‍ നദിയില്‍ കലക്കവെള്ളമാണുള്ളത്. കുടിവെള്ളത്തിന്റെയും കുളിക്കാനുള്ള വെള്ളത്തിന്റെയും ലഭ്യതയില്‍ കുറവു വരും.

ജലനിരപ്പ് അപകടകരമായതിനാല്‍ പമ്പാസ്‌നാനം അനുവദിക്കില്ല. മറ്റ് കുളിക്കടവുകളിലും ഇറങ്ങരുത്. സ്‌പോട്ട് ബുക്കിംഗ് നിര്‍ത്തും. ആളുകളുടെ എണ്ണം നിയന്ത്രിക്കാന്‍ വെര്‍ച്വല്‍ ക്യൂ വഴി ബുക്ക് ചെയ്തവര്‍ക്ക് തീയതി മാറ്റി നല്‍കുന്ന കാര്യം പരിഗണിക്കും.

അതേസമയം ഭക്തരെ വരവേല്‍ക്കാന്‍ പമ്പയും സന്നിധാനവും ഒരുങ്ങി. ചൊവ്വാഴ്ച മുതല്‍ ഭക്തര്‍ക്ക് ദര്‍ശനം അനുവദിക്കും. മഴ ശക്തമായതിനാല്‍ ആദ്യ നാലുദിവസം വളരെ കുറച്ച് ഭക്തരെ മാത്രമേ കടത്തിവിടൂ. പമ്പയില്‍ ഒഴുക്ക് ശക്തമായതിനാല്‍ പമ്പാസ്‌നാനം ആദ്യ ദിവസങ്ങളില്‍ അനുവദിക്കില്ല. തിങ്കളാഴ്ച മുതല്‍ മഴ കുറയുമെന്നാണ് പ്രതീക്ഷിക്കുന്നത്.

ഡിസംബര്‍ 26നാണ് മണ്ഡലപൂജ, മകരവിളക്ക് ജനുവരി 14ന്. തിങ്കളാഴ്ച വൈകീട്ട് അഞ്ചിന് ക്ഷേത്രതന്ത്രി കണ്ഠരര് മഹേഷ് മോഹനരുടെ സാന്നിധ്യത്തില്‍ ക്ഷേത്ര മേല്‍ശാന്തി വി.കെ. ജയരാജ് പോറ്റി ക്ഷേത്രനട തുറന്ന് ദീപങ്ങള്‍ തെളിക്കും. തുടര്‍ന്ന് മേല്‍ശാന്തി ഉപദേവത ക്ഷേത്രനടകളും തുറന്ന് ദീപങ്ങള്‍ തെളിക്കും. പിന്നീട് പതിനെട്ടാം പടിക്ക് മുന്നിലെ ആഴിയില്‍ അഗ്‌നി പകരും.

ദിനേന 30,000 പേരെ ദര്‍ശനത്തിന് അനുവദിക്കാനാണ് തീരുമാനം. വെര്‍ച്വല്‍ ക്യൂ വഴി ബുക്ക് ചെയ്തവര്‍ക്കാണ് ദര്‍ശന അനുമതി. കോവിഡ് രണ്ട് ഡോസ് വാക്‌സിന്‍ എടുത്തതിന്റെയോ അല്ലാത്തവര്‍ക്ക് ആര്‍.ടി പി.സി.ആര്‍ നെഗറ്റിവാണെന്നുള്ളതിന്റെയോ സര്‍ട്ടിഫിക്കറ്റ് ഉണ്ടാകണം. തിരുവിതാംകൂര്‍ ദേവസ്വം ബോര്‍ഡും പത്തനംതിട്ട ജില്ല ഭരണകൂടവും വിവിധ വകുപ്പുകളും ചേര്‍ന്ന് മഴയെ അതിജീവിച്ചും അനിവാര്യ ക്രമീകരണങ്ങള്‍ ഭക്തര്‍ക്ക് ഒരുക്കി. കെ.എസ്.ആര്‍.ടി വിവിധ ഡിപ്പോകളില്‍നിന്ന് സര്‍വിസ് നടത്തും. ഭക്തരുടെ വാഹനങ്ങള്‍ നിലക്കല്‍ വരെ മാത്രമാണ് അനുവദിക്കുക. അവിടെ നിന്ന് പമ്പയിലേക്ക് പോകാന്‍ കെ.എസ്.ആര്‍.ടി ബസുണ്ട്. പമ്പയില്‍ വാഹന പാര്‍ക്കിങ് അനുവദിക്കില്ല.

കനത്ത മഴയെ തുടര്‍ന്ന് ജലനിരപ്പ് വീണ്ടും അപകട നിലയോട് അടുത്തെങ്കിലും പമ്പ, അച്ചന്‍കോവില്‍, മണിമല നദികളില്‍ പ്രളയത്തിനു സാധ്യതയില്ലെന്ന് കേന്ദ്ര ജല കമ്മിഷനുമായി ബന്ധപ്പെട്ട ഹൈഡ്രോമെറ്റ് വിഭാഗം വ്യക്തമാക്കി. മൂന്നു നദികളിലും രാത്രിയോടെ ജലനിരപ്പ് ഉയരുമെങ്കിലും രാവിലെ കുറഞ്ഞേക്കും. കുട്ടനാട് മേഖലയില്‍ നേരിയ പ്രളയഭീഷണി തുടരും.

തീവ്രമഴയ്ക്കു സാധ്യതയില്ലെന്നു കാലാവസ്ഥാ വിഭാഗം നല്‍കുന്ന സൂചന വിവിധ ജില്ലകള്‍ക്ക് ആശ്വാസം പകരുന്നു. ഞായറാഴ്ചത്തെ ഓറഞ്ച് അലര്‍ട്ട് പത്തനംതിട്ട ഉള്‍പ്പെടെ തെക്കന്‍ ജില്ലകളില്‍ യെലോ അലര്‍ട്ടാക്കി കുറച്ചിട്ടുണ്ട്. ശക്തി കുറഞ്ഞ മഴ ഇടയ്ക്കു പെയ്യാനുള്ള സാധ്യതയാണ് യെലോ അലര്‍ട്ട്. മഴ പെട്ടന്ന് കുറഞ്ഞ് ശബരിമല തീര്‍ത്ഥാടനം പഴയത് പോലെയാക്കണേയെന്നാണ് അയ്യപ്പനോടുള്ള പ്രാര്‍ത്ഥന. സ്വാമി ശരണം.