ശബരിമലയില് മണ്ഡല മകരവിളക്ക് തീര്ത്ഥാടനത്തിന് ഇന്ന് തുടക്കം.. .തീര്ത്ഥാടകര്ക്ക് നാളെ മുതല് പ്രവേശനം.... പമ്പയില് കുളിക്കാന് അനുവദിക്കില്ല, ശക്തമായ മഴയെതുടര്ന്ന് സന്ദര്ശകര്ക്ക് നിയന്ത്രണം
ശബരിമലയില് മണ്ഡല മകരവിളക്ക് തീര്ത്ഥാടനത്തിന് ഇന്ന് തുടക്കം.. .തീര്ത്ഥാടകര്ക്ക് നാളെ മുതല് പ്രവേശനം.... പമ്പയില് കുളിക്കാന് അനുവദിക്കില്ല, ശക്തമായ മഴയെതുടര്ന്ന് സന്ദര്ശകര്ക്ക് നിയന്ത്രണം ഏര്പ്പെടുത്തി.
തീര്ത്ഥാടകര് വൃശ്ചികം ഒന്നായ നാളെ മുതല് ഇരുമുടിയേന്തി മല കയറും. നാളെ പുലര്ച്ചെ 5നു നട തുറക്കുമ്പോള് മുതല് ദര്ശനത്തിനായി തീര്ത്ഥാടകരെ നിലയ്ക്കലില് നിന്നു കടത്തി വിടും. കനത്ത മഴ തുടരുന്ന സാഹചര്യത്തില് ശബരിമലയില് അടുത്ത 34 ദിവസങ്ങളില് ആളുകളുടെ എണ്ണം നിയന്ത്രിക്കാന് മുഖ്യമന്ത്രിയുടെ നേതൃത്വത്തില് ചേര്ന്ന യോഗം തീരുമാനിച്ചു.
ജലനിരപ്പ് അപകടകരമായതിനാല് പമ്പാ സ്നാനം അനുവദിക്കില്ല. മറ്റു കുളിക്കടവുകളിലും ഇറങ്ങരുതെന്നു നിര്ദേശമുണ്ട്. നിലയ്ക്കലില് ഏര്പ്പെടുത്തിയിരുന്ന സ്പോട്ട് ബുക്കിങ് നിര്ത്തും. വെര്ച്വല് ക്യൂ വഴി ബുക്ക് ചെയ്തവര്ക്ക് തീയതി മാറ്റി നല്കുന്ന കാര്യം പരിഗണിക്കണമെന്നും മുഖ്യമന്ത്രി നിര്ദ്ദേശം നല്കി.
ഇന്നു വൈകിട്ട് 5നു മേല്ശാന്തി വി.കെ.ജയരാജ് പോറ്റി നട തുറക്കും. തുടര്ന്നു പുതിയ മേല്ശാന്തിമാരായ കളീക്കല് മഠത്തില് എന്.പരമേശ്വരന് നമ്പൂതിരി (ശബരിമല) , കുറവക്കോട്ട് ഇല്ലത്ത് ശംഭു നമ്പൂതിരി (മാളികപ്പുറം) എന്നിവരുടെ സ്ഥാനാരോഹണച്ചടങ്ങുകള് നടക്കും.
തന്ത്രി കണ്ഠര് മഹേഷ് മോഹനരുടെ കാര്മികത്വത്തില് സോപാനത്തില് കലശം പൂജിച്ച് പരമേശ്വരന് നമ്പൂതിരിയെ അഭിഷേകം ചെയ്തു ശ്രീകോവിലില് കൊണ്ടുപോയി അയ്യപ്പന്റെ മൂലമന്ത്രം ഉപദേശിക്കും. തുടര്ന്നു മാളികപ്പുറത്തു നടക്കുന്ന ചടങ്ങില് ശംഭു നമ്പൂതിരിയെ അവരോധിക്കും.
അതേസമയം ശബരിമല തീര്ത്ഥാടനത്തോടനുബന്ധിച്ച് ആരോഗ്യ സുരക്ഷ ഉറപ്പാക്കുന്നതിന് ആരോഗ്യ വകുപ്പ് സജ്ജമാണെന്ന് ആരോഗ്യ വകുപ്പ് മന്ത്രി വീണാ ജോര്ജ്. ഒക്ടോബര് മാസത്തില് ആക്ഷന് പ്ലാന് രൂപീകരിച്ച് മുന്നൊരുക്കം നടത്തിയാണ് ആരോഗ്യ സേവനങ്ങള് ഉറപ്പാക്കിയത്. സംസ്ഥാന തലത്തിലും പത്തനംതിട്ട, ആലപ്പുഴ, കോട്ടയം, ഇടുക്കി ജില്ലകളിലും പ്രത്യേകം യോഗം വിളിച്ചാണ് പ്രവര്ത്തനങ്ങള് ഏകോപിപ്പിച്ചത്.
പമ്പ മുതല് സന്നിധാനം വരെയുള്ള ചികിത്സാ കേന്ദ്രങ്ങളില് ജീവനക്കാരെ വിന്യസിച്ച് വരികയാണ്. പമ്പയിലും സന്നിധാനത്തും മെഡിക്കല് കോളേജുകളിലെ വിദഗ്ധ ഡോക്ടര്മാരുടെ സേവനവും ഉറപ്പ് വരുത്തിയിട്ടുണ്ട്. തിങ്കളാഴ്ച മുതല് ഈ കേന്ദ്രങ്ങള് പ്രവര്ത്തിച്ചു തുടങ്ങും.
കോവിഡിനോടൊപ്പം മഴക്കാലം കൂടിയായതിനാല് തീര്ത്ഥാടകരും ജീവനക്കാരും ഒരുപോലെ ശ്രദ്ധിക്കണം. എന്തെങ്കിലും ആരോഗ്യ പ്രശ്നങ്ങളുള്ളവര് ആരോഗ്യ പ്രവര്ത്തകരുമായി ബന്ധപ്പെടണമെന്നും മന്ത്രി വ്യക്തമാക്കി
"https://www.facebook.com/Malayalivartha
