അച്ഛനും മകനും വഴക്കിടുന്നത് പതിവ്... വാക്കുതര്‍ക്കം മൂര്‍ച്ഛിച്ചതോടെ വീട്ടിലുണ്ടായിരുന്ന കത്തിയെടുത്ത് മകനെ കുത്തി, കുത്തേറ്റ അരുണ്‍ രക്തം വാര്‍ന്ന് കിടന്നത് അരമണിക്കൂറോളം, രക്തത്തില്‍ കുളിച്ചു കിടക്കുന്ന മകനെ അമ്മ കണ്ട അരുണിന്റെ സുഹൃത്തുക്കളെ വിളിച്ചു വരുത്തി ആശുപത്രിയില്‍ എത്തിച്ചപ്പോഴേക്കും മരിച്ചിരുന്നു.

മദ്യപിച്ചുണ്ടായ വാക്കുതര്‍ക്കത്തിനിടെ അച്ഛന്‍ മകനെ കുത്തിക്കൊന്നത്. ഓലത്താന്നി, പാതിരിശ്ശേരി, താഴങ്കാട് വീട് എസ്.എസ്. ഭവനില്‍ കുട്ടു എന്നു വിളിക്കുന്ന എസ്.എസ്.അരുണാ(32)ണ് മരിച്ചത്. സംഭവശേഷം ഒളിവില്‍പ്പോയ അച്ഛന്‍ ശശിധരന്‍നായരെ(62) നെയ്യാറ്റിന്‍കര പോലീസ് കസ്റ്റഡിയിലെടുത്തു.

ശനിയാഴ്ച രാത്രി 9.45-നാണ് സംഭവം. സംഭവസമയം വീട്ടില്‍ ശശിധരന്‍നായര്‍, ഭാര്യ ശാന്തകുമാരി, മകന്‍ അരുണ്‍ എന്നിവരാണുണ്ടായിരുന്നത്. ശശിധരന്‍നായരും അരുണും മദ്യപിച്ചിരുന്നു. പലപ്പോഴും ഇവര്‍ ഒരുമിച്ച് മദ്യപിക്കാറുണ്ടെന്ന് പോലീസ് പറയുന്നു.

മദ്യപിച്ചശേഷം ഇവര്‍ വഴക്കിടുന്നതും പതിവാണ്. പിന്നീട് ഇരുവരും ഒന്നാകുന്നതും പതിവെന്ന് നാട്ടുകാര്‍. സംഭവദിവസം ഇരുവരും മദ്യപിച്ചശേഷം വീട്ടില്‍വെച്ച് വഴക്കിട്ടു. വാക്കുതര്‍ക്കം മൂര്‍ച്ഛിച്ചതോടെ വീട്ടിലുണ്ടായിരുന്ന കത്തിയെടുത്ത് ശശിധരന്‍നായര്‍ മകന്‍ അരുണിനെ കുത്തുകയായിരുന്നുവെന്ന് പോലീസ് പറയുന്നു.

ഇതിനുശേഷം ശശിധരന്‍നായര്‍ ജോലി ചെയ്യുന്ന ഓലത്താന്നിയിലെ ഹോട്ടലില്‍ പോയി ഒളിച്ചിരുന്നു. കുത്തേറ്റ അരുണ്‍ അരമണിക്കൂറോളം രക്തം വാര്‍ന്ന് കിടന്നു. അമ്മ ശാന്തകുമാരി അരുണിന്റെ സുഹൃത്തുക്കളെ അറിയിച്ചു. ഇവരെത്തി അരുണിനെ നെയ്യാറ്റിന്‍കര ജനറല്‍ ആശുപത്രിയിലെത്തിച്ചെങ്കിലും മരിച്ചിരുന്നു.

മദ്യപിച്ച് ബഹളംവയ്ക്കുമ്പോഴെല്ലാം ശശിധരന്‍നായര്‍ മകനെ കത്തിയെടുത്ത് കുത്തുമെന്ന് പലപ്പോഴും പറയാറുണ്ടായിരുന്നു. അരുണിന്റെ ഇടതുനെഞ്ചിലാണ് കുത്തേറ്റത്. ഹൃദയത്തിനേറ്റ മുറിവാണ് മരണത്തിനിടയാക്കിയതെന്നാണ് പ്രാഥമിക നിഗമനം.

സംഭവശേഷം ഹോട്ടലില്‍ ഒളിച്ചിരുന്ന ശശിധരന്‍നായരെ നെയ്യാറ്റിന്‍കര ഡിവൈ.എസ്.പി. അനില്‍കുമാറിന്റെയും സി.ഐ. സാഗറിന്റെയും നേതൃത്വത്തിലുള്ള പോലീസ് കസ്റ്റഡിയിലെടുത്തു.