ശബരിമലയില്‍ ശരണം വിളികള്‍ ഉയര്‍ന്നതോടെ യുവതീ പ്രവേശന വിധി വീണ്ടും ചര്‍ച്ചയാവുന്നു. സുപ്രീം കോടതിയുടെ പരിഗണനയിലിരിക്കുന്ന കേസ് വീണ്ടും ശബരിമലയുടെ സമാധാനം കെടുത്തുമോ എന്നാണ് രാജ്യം ഉറ്റുനോക്കുന്നത്.

സുപ്രീം കോടതിയുടെ പരിഗണനയിലുള്ള ശബരിമലയിലെ യുവതീ പ്രവേശന ഹര്‍ജികള്‍ തീര്‍പ്പാക്കാന്‍ വഴിയൊരുങ്ങുന്നു. തിരുപ്പതി ക്ഷേത്രത്തിലെ ഹര്‍ജികള്‍ തീര്‍പ്പാക്കിയ അതേ വഴിയിലൂടെ ശബരിമല കേസും തീര്‍പ്പാക്കാനാണ് സാധ്യതയെന്ന് നിയമവൃത്തങ്ങള്‍ ചൂണ്ടിക്കാണിക്കുന്നു.

വിവേചനമുണ്ടെങ്കില്‍ ഇടപെടാം എന്നാണ് സുപ്രീം കോടതി തിരുപ്പതി വിധിയില്‍ ചൂണ്ടിക്കാണിക്കുന്നത്. ശബരിമലയിലെ ഭക്തജന പ്രവേശനത്തില്‍ വിവേചനമുണ്ടെന്നാണ് ഹര്‍ജിയിലെ ആക്ഷേപം. സുപ്രീം കോടതി ഇക്കാര്യം ശരിവച്ചു കൊണ്ടാണ് യുവതി പ്രവേശം അനുവദിച്ചത്. ഇത് വന്‍ വിവാദത്തിന് കാരണമായി.കേരളത്തില്‍ ക്രമസമാധാനം തകര്‍ന്നു. തിരുപ്പതി വിധി വരുമ്പോള്‍ കേരളം വീണ്ടും ആശങ്കയിലാവുന്നു.

ക്ഷേത്രങ്ങളിലെ ദൈംദിന ആചാരാനുഷ്ഠാനങ്ങളില്‍ ഭരണഘടന കോടതികള്‍ ഇടപെടില്ലന്നാണ് സുപ്രീംകോടതി വ്യക്തമാക്കിയത്. തിരുപ്പതി ക്ഷേത്രത്തിലെ പൂജാക്രമങ്ങളില്‍ മാറ്റം വരുത്തണമെന്ന് ആവശ്യപ്പെട്ടുള്ള ഹര്‍ജി തീര്‍പ്പാക്കിക്കൊണ്ടാണ് കോടതി പരാമര്‍ശം. അതേസമയം വിവേചനം, ദര്‍ശനം തടസ്സപ്പെടുത്തല്‍ തുടങ്ങി ഭരണപരമായ പ്രശ്‌നങ്ങള്‍ ഉണ്ടെങ്കില്‍ ഇടപെടാമെന്നും സുപ്രീംകോടതി വ്യക്തമാക്കി.

ക്ഷേത്രത്തില്‍ എങ്ങനെ പൂജ നടത്തണം, എങ്ങനെ തേങ്ങ ഉടക്കണം ഇതൊക്കെ ഭരണഘടന കോടതിയല്ല തീരുമാനിക്കേണ്ടത്. ക്ഷേത്രങ്ങളിലെ ആചാരനുഷ്ഠാനങ്ങളില്‍ ഭരണഘടന കോടതിക്ക് ഇടപെടാനാകില്ലെന്നും സുപ്രീംകോടതി വ്യക്തമാക്കി. തിരുപ്പതി ക്ഷേത്രത്തിലെ പൂജക്രമങ്ങള്‍ ലംഘിക്കപ്പെടുന്നു എന്ന് ചൂണ്ടിക്കാട്ടിയുള്ള ഹര്‍ജി പരിഗണിക്കവെയാണ് ചീഫ് ജസ്റ്റിസ് എന്‍.വി.രമണ നിലപാട് വ്യക്തമാക്കിയത്. ക്ഷേത്രങ്ങളുടെ ദൈനംദിന കാര്യങ്ങള്‍ ഭരണഘടന കോടതിയല്ല തീരുമാനിക്കേണ്ടത്. ഇത്തരം കാര്യങ്ങള്‍ ബന്ധപ്പെട്ട കേന്ദ്രങ്ങളില്‍ ഹര്‍ജിക്കാരന് ഉന്നയിക്കാം. അതേസമയം ഭരണപരമായ കാര്യങ്ങളില്‍ വീഴ്ച ഉണ്ടാകുന്നുണ്ടെങ്കില്‍ അത് പരിശോധിക്കാമെന്ന് കോടതി പറഞ്ഞു.

വിവേചനമോ, ദര്‍ശനം തടസ്സപ്പെടുത്തലോ ഉണ്ടെങ്കില്‍ ക്ഷേത്ര ഭരണസമിതിയോട് വിശദീകരണം ആവശ്യപ്പെടാം. ഇക്കാര്യത്തില്‍ ഹര്‍ജിക്കാരന്റെ പരാതിക്ക് ക്ഷേത്ര ഭരണസമിതിയോട് എട്ടാഴ്ചക്കകം മറുപടി നല്‍കാന്‍ സുപ്രീംകോടതി നിര്‍ദ്ദേശിച്ചു. മറുപടി തൃപ്തികരമല്ലെങ്കില്‍ ഹര്‍ജിക്കാരനെ തുടര്‍ നിയമനടപടികള്‍ ആലോചിക്കാവുന്നതാണെന്നും സുപ്രീംകോടതി വ്യക്തമാക്കി.

ശബരിമല യുവതി പ്രവേശന വിധി പുനഃപരിശോധനക്കണമെന്ന് ആവശ്യപ്പെട്ടുള്ള ഹര്‍ജി സുപ്രീംകോടതിയുടെ പരിഗണനയില്‍ തുടമ്പോഴാണ് തിരുപ്പതി കേസിലെ ശ്രദ്ധേയമായ പരാമര്‍ശം.

സുപ്രീം കോടതി ചീഫ് ജസ്റ്റിസ് നിയമത്തിന്റെ അടിസ്ഥാനത്തില്‍ മാത്രം പ്രവര്‍ത്തിക്കുന്ന ന്യായാധിപനാണ്. നിയമത്തിന്റെ അപ്പുറതേക്ക് ചിന്തിക്കുന്ന ഒരാളല്ല അദ്ദേഹം. അതു തന്നെയാണ് നിയമ ലോകത്തെ ആശങ്കപ്പെടുത്തുന്നത്. ശബരിമല കേസില്‍ നിര്‍ണായക തീരുമാനം തീര്‍ച്ചയായും ഉണ്ടാവുമെന്ന് കേരളം കരുതുന്നു.തിരുപ്പതി വിധിയുടെ ചുവടുപിടിച്ചാല്‍ സുപ്രീം കോടതിയുടെ ശബരിമല വിധി സ്ഥിരപ്പെടുത്താനാണ് സാധ്യത. അങ്ങനെ വന്നാല്‍ രക്തചൊരിച്ചിലിന് ഇടയാക്കും. കേരള സര്‍ക്കാരാകട്ടെ ഒരിക്കലും സുപ്രീം കോടതി വിധി മറികടക്കാനായി ശ്രമിക്കുകയുമില്ല.

കേന്ദ്ര സര്‍ക്കാരും സുപ്രീം കോടതിയും തീര്‍ത്തും നല്ല ബന്ധത്തിലല്ല. അതിനാല്‍ വിധി അനുസരിക്കാന്‍ മാത്രമേ കേന്ദ്രത്തിന് കഴിയുകയുള്ളു. അതിനിടെ മുന്‍ തന്ത്രി കണ്ഠര് മഹേശ്വരുടെ ഭാര്യ ശബരിമല കേസ് എത്രയും വേഗം പരിഗണിക്കണമെന്നാവശ്യപ്പെട്ട് സുപ്രീം കോടതി ചീഫ് ജസ്റ്റിസിന് കത്തയച്ചു.