വൃക്ക വില്‍ക്കാന്‍ വിസമ്മതിച്ച ഭാര്യയെ മര്‍ദിച്ചവശയാക്കിയ ഭര്‍ത്താവ് അറസ്റ്റില്‍. വിഴിഞ്ഞം കിടാരക്കുഴിയില്‍ വാടകയ്ക്ക് താമസിക്കുന്ന കോട്ടപ്പുറം കുഴിവിള പുരയിടത്തില്‍ സുജയുടെ പരാതിയിലാണ് വിഴിഞ്ഞം ഭര്‍ത്താവ് സാജനെ (41) പോലീസ് അറസ്റ്റ് ചെയ്തത്.

ഭാര്യയെ ചിരവകൊണ്ട് മര്‍ദിക്കുന്നതിനിടെ ആക്രമണം തടയാനെത്തിയ മാനസിക വെല്ലുവിളി നേരിടുന്ന മക്കളെയും ഇയാള്‍ മര്‍ദിച്ചതായി പരാതിയില്‍ പറയുന്നു. ഏതാനും ദിവസം മുന്‍പ് വിഴിഞ്ഞം മുള്ളുവിളക്കടുത്ത് സുജയും കുടുംബവും 25000 രൂപ അഡ്വാന്‍സിലും 3000 രൂപ മാസ വാടകയ്ക്കുമായി താമസിക്കാന്‍ ഒരു വീട് ഏര്‍പ്പാടാക്കിയിരുന്നു.

ഇതിന്റെ അഡ്വാന്‍സ് ഇന്നു വൈകുന്നേരം നല്‍കണമെന്ന് വീട്ടുടമ ആവശ്യപ്പെട്ടിരുന്നു. സുജ ഇത് സാജനെ അറിയിച്ചു. ഇതിനിടയില്‍ സുജയുടെ വൃക്കകളിലൊന്ന് ഒന്‍പത് ലക്ഷം രൂപയ്ക്ക് വില്‍ക്കുന്നതിന് തൃശൂരിലെ ഒരു ഏജന്റുമായി സാജന്‍ കരാര്‍ ഉണ്ടാക്കിയിരുന്നു.

ഇതനുസരിച്ച് വേണ്ട പരിശോധനകള്‍ നടത്തി കഴിഞ്ഞ 25ന് ഇവര്‍ തിരികെയെത്തിയിരുന്നു. ബാങ്കിലൂടെ പണമിടാമെന്ന് ഏജന്റ് ഉറപ്പും നല്‍കിയിരുന്നു.

ഈ പണത്തില്‍ നിന്ന് 25000 വീടിന് അഡ്വാന്‍സ് കൊടുക്കാനായിരുന്നു പദ്ധതിയെന്ന് സുജ പറഞ്ഞു. എന്നാല്‍ രഹസ്യമാക്കി വച്ചിരുന്ന വൃക്ക വില്‍പ്പനക്കാര്യം വീട്ടമ്മ സ്ഥലത്തെ ജനപ്രതിനിധിയെ ധരിപ്പിച്ചു. വൃക്ക നല്‍കിയാലുള്ള ശാരീരിക ബുദ്ധിമുട്ടുകളും നിയമക്കുരുക്കുകളും എല്ലാം അറിഞ്ഞതോടെ ദൗത്യത്തില്‍ നിന്ന് പിന്‍മാറാന്‍ ഇവര്‍ തയാറായത്.

രഹസ്യയമായി നടന്ന കാര്യം പുറത്തായത് സാജനെയാകെ ചൊടിപ്പിച്ചു. ഇതിനെ തുടര്‍ന്നാണ് ഇയാള്‍ ഭാര്യയെ ക്രൂരമായി മര്‍ദിച്ചത്. തടയാനെത്തിയ 11 ഉം 10 വയസ് പ്രായമുളള മക്കളെയും കഠിനമായി മര്‍ദിച്ചുവെന്ന് സുജ പോലീസിന് മൊഴി നല്‍കി.

ഇതിന്റെ അടിസ്ഥാനത്തില്‍ വിഴിഞ്ഞം എസ്‌ഐ. യുടെ നേതൃത്വത്തിലുളള പോലീസ് സംഘമെത്തി ഇയാളെ പിടികൂടുകയായിരുന്നു. ഭാര്യയെ മര്‍ദിച്ചതിനും കുട്ടികളെ മര്‍ദിച്ചതിന് ജുവനൈല്‍ ആക്ട്പ്രകാരവും കേസെടുത്തതായി വിഴിഞ്ഞം പോലീസ് അറിയിച്ചു. കോടതിയില്‍ ഹാജരാക്കിയ പ്രതി റിമാന്‍ഡില്‍.