മുല്ലപ്പെരിയാറില്‍ അടിയന്തിരമായി ഒന്നും ചെയ്യേണ്ടെന്ന് കേരള സര്‍ക്കാര്‍ ആവര്‍ത്തിക്കുമ്പോള്‍ തമിഴ്‌നാട് പൂഴിക്കടകനുമായി സുപ്രീം കോടതിയെ സമീപിച്ചു. അപ്പോഴും കേരള സര്‍ക്കാര്‍ തമിഴ്‌നാടിന്റെ പോക്കറ്റ് വലിപ്പം കണ്ട് നിശബ്ദത തുടരുന്നു.

കമ്പം , തേനി പ്രദേശത്ത് കേരളത്തിലെ രാഷ്ട്രീയക്കാര്‍ക്ക് ഏക്കര്‍കണക്കിന് ഭൂമി ഗിഫ്റ്റ് കിട്ടുന്നുണ്ടെന്ന ആരോപണം ശരിവയ്ക്കുന്നതാണ് കേരളം കാലാകാലങ്ങളായി തുടരുന്ന സ്റ്റാന്റ്.

മുല്ലപ്പെരിയാറിലേ ബേബി ഡാം ശക്തിപ്പെടുത്തുന്നതിന് 15 മരങ്ങള്‍ മുറിക്കാന്‍ അനുമതി തേടിയാണ് തമിഴ്‌നാട് സര്‍ക്കാര്‍ സുപ്രീം കോടതിയെ സമീപിച്ചത്. മരം മുറിക്കാന്‍ നല്‍കിയ അനുമതി പിന്‍വലിച്ച കേരളത്തിന്റെ നടപടി കോടതി അലക്ഷ്യമാണെന്നും തമിഴ്‌നാട് സര്‍ക്കാര്‍ സുപ്രീം കോടതിയെ അറിയിച്ചു. വള്ളക്കടവ് - മുല്ലപ്പെരിയാര്‍ റോഡിന്റെ അറ്റകുറ്റപണി അടിയന്തരമായി നടത്താന്‍ കേരളത്തിനോട് നിര്‍ദേശിക്കണമെന്നും സുപ്രീം കോടതിയോട് ആവശ്യപ്പെട്ടു.

കേരളത്തിന്റെയും തമിഴ്‌നാടിന്റേയും ഉദ്യോഗസ്ഥര്‍ അടങ്ങുന്ന സംയുക്ത സംഘം 2021 ജൂണ്‍ മാസം നടത്തിയ പരിശോധനയ്ക്ക് ശേഷമാണ് മുല്ലപ്പെരിയാറില്‍ നിന്ന് 15 മരങ്ങള്‍ മുറിക്കാന്‍ തീരുമാനമായതെന്ന് തമിഴ്‌നാട് സര്‍ക്കാര്‍ സുപ്രീം കോടതിയില്‍ ഫയല്‍ ചെയ്ത അപേക്ഷയില്‍ വ്യക്തമാക്കുന്നു. ഇതുമായി ബന്ധപ്പെട്ട് കേരളവും തമിഴ്‌നാടും തമ്മില്‍ നടത്തിയ കത്തിടപാടുകളുടെ വിശദാംശങ്ങളും തമിഴ്‌നാട് സര്‍ക്കാര്‍ സുപ്രീം കോടതിക്ക് കൈമാറി. മരം മുറിക്ക് അനുമതി നല്‍കിയ നവംബര്‍ ആറിലെ ഉത്തരവ് റദ്ദാക്കിയത് സംബന്ധിച്ച മാധ്യമ റിപ്പോര്‍ട്ടുകളും തമിഴ്‌നാട് സര്‍ക്കാര്‍ കൈമാറിയിട്ടുണ്ട്.

മുല്ലപ്പെരിയാര്‍ അണകെട്ട് ബലപ്പെടുത്തുന്നതിനുള്ള നടപടികള്‍ കേരളം തടസ്സപ്പെടുത്തുന്നു എന്ന് തമിഴ്‌നാട് ആരോപിക്കുന്നു. 2014 ലെ സുപ്രീം കോടതി ഭരണഘടനാ ബെഞ്ചിന്റെ വിധി നടപ്പാക്കാന്‍ കേരളം തയ്യാറാകുന്നില്ല. ബേബി ഡാം ശക്തിപ്പെടുത്തുന്നതിനുള്ള നടപടികള്‍ കഴിഞ്ഞ 16 വര്‍ഷമായി കേരളം തടസ്സപ്പെടുത്തുന്നു. പ്രധാന അണകെട്ട് ശക്തിപ്പെടുത്തുന്നതിന് സാധന സാമഗ്രികള്‍ കൊണ്ടുപോകുന്നിത് വള്ളക്കടവ് - മുല്ലപ്പെരിയാര്‍ റോഡിന്റെ അറ്റകുറ്റ പണി നടത്തണമെന്നും തമിഴ്‌നാട് സര്‍ക്കാര്‍ ആവശ്യപ്പെട്ടിട്ടുണ്ട്.

മുല്ലപ്പെരിയാറിന്റെ വൃഷ്ടി പ്രദേശത്ത് മഴ മാപിനി കേന്ദ്രങ്ങള്‍ സ്ഥാപിക്കണമെന്ന് 2015-ല്‍ മേല്‍നോട്ട സമിതി തീരുമാനിച്ചിരുന്നു. ഈ തീരുമാനം ഉടന്‍ നടപ്പിലാക്കാന്‍ കേരളത്തോട് നിര്‍ദേശിക്കണമെന്നും അപേക്ഷയില്‍ ആവശ്യപ്പെട്ടിട്ടുണ്ട്. കേരള നിയമസഭ പാസ്സാക്കിയ ഡാം സുരക്ഷാ നിയമം ചോദ്യംചെയ്ത് 2006-ല്‍ ഫയല്‍ ചെയ്ത സ്യൂട്ടിലാണ് തമിഴ്‌നാട് സര്‍ക്കാര്‍ പുതിയ അപേക്ഷ ഫയല്‍ ചെയ്തിരിക്കുന്നത്.

ഇതിലും കേരളം നിശബ്ദത തുടരാന്‍ തുടരാന്‍ തന്നെയാണ് സാധ്യത.കഴിഞ്ഞ കുറെ ദിവസങ്ങളായി മുല്ലപ്പെരിയാറില്‍ പ്രത്യേകിച്ച് ഒന്നുമില്ലെന്നാണ് കേരളം പറഞ്ഞു കൊണ്ടിരിക്കുന്നത്.

മുല്ലപ്പെരിയാറിന്റെ കാര്യത്തില്‍ കേരളത്തിന്റെ താത്പര്യങ്ങള്‍ സംരക്ഷിക്കുന്നതിന് പകരം തമിഴ് നാടിന്റെ താത്പര്യങ്ങള്‍ സംരക്ഷിക്കാനാണ് പിണറായി സര്‍ക്കാര്‍ ശ്രമിക്കുന്നത്. മാധ്യമങ്ങള്‍ വിവരം ചോര്‍ത്തി കൊണ്ടു വരുമ്പോള്‍ ബെന്നിച്ചന്‍ തോമസിനെ പോലെ ആരെയെങ്കിലും രക്തസാക്ഷിയാ ക്കി കേരളം തലയൂരും. ഇടത്- വലത് സര്‍ക്കാരുകളുടെ കാലത്ത് ഇതായിരുന്നു പതിവ്.

ജല വിഭവ മന്ത്രിയായിരുന്ന എന്‍ കെ പ്രേമചന്ദ്രന്‍ ഒഴികെയുള്ള എല്ലാ ജല മന്ത്രിമാര്‍ക്കുമെതിരെ ആരോപണം ഉയര്‍ന്നിട്ടുണ്ട്. അവരാരും ഇക്കാര്യം നിഷേധിച്ചിട്ടില്ല. എന്തായാലും പിണറായി സര്‍ക്കാരിലെ ഏമാന്‍മാരുടെ ടൈം എന്ന് പറഞ്ഞാല്‍ മതി.

മുല്ലപ്പെരിയാറില്‍ നത്തിം ഗ് സീരിയസ് എന്ന് പറയുമ്പോള്‍ ഗുട്ടന്‍സ് മനസിലായല്ലോ?