വരുന്നത് ഭയാനകമായ ദിവസങ്ങള്‍. കേരളത്തിലെ താപനില 40 ഡിഗ്രിയിലേക്ക് ഉയരുന്ന സാഹചര്യത്തില്‍ സൂര്യതാപം ഉള്‍പ്പെടെയുള്ള ഗുരുതര സാഹചര്യത്തിലേക്ക് കാര്യങ്ങള്‍ നീങ്ങുന്നത്. പകല്‍ച്ചൂടില്‍ തളര്‍ന്നു വീണു മരണം സംഭവിക്കാനും ബോധക്ഷയം സംഭവിക്കാനും പൊള്ളലേല്‍ക്കാനും സാധ്യതയേറെയാണ്. വേനല്‍മഴ ലഭിച്ചാല്‍പ്പോലും വരുന്ന ദിവസങ്ങളില്‍ സംസ്ഥാനത്ത് റിക്കാര്‍ഡ് താപനിലയ്ക്കുള്ള സാധ്യതയാണ് കാലാവസ്ഥാ നിരീക്ഷകര്‍ പറയുന്നത്.

മാര്‍ച്ച് മാസത്തില്‍ പരമാവധി 36 ഡിഗ്രിവരെ ഉയര്‍ന്നിരുന്ന താപനില ചില പ്രദേശങ്ങളില്‍ 39 ഡിഗ്രിയിലേക്ക് പറന്നുയരുന്ന സാഹചര്യമാണ് സംസ്ഥാനത്ത് നിലവിലുള്ളത്. തമിഴ് നാട്ടിലെ തേനി, കമ്പം, കോയമ്പത്തൂര്‍ പ്രദേശങ്ങളില്‍ ലഭിക്കുന്ന വേനല്‍ച്ചൂടിനെക്കാള്‍ ഉയരെയാണ് കേരളത്തില്‍ നിലവിലെ താപനില. സംസ്ഥാനത്ത് ചൂട് അതികഠിനമാകുന്ന സാഹചര്യത്തില്‍ വരും ദിവസങ്ങളിലും ഉയര്‍ന്ന താപനില തുടരുമെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നല്‍കി. കേരളത്തില്‍ എല്ലാ ജില്ലകളിലും 37 ഡിഗ്രിക്ക് മുകളിലാണ് പകല്‍ച്ചൂട്. പാലക്കാട്, കൊല്ലം ജില്ലകളില്‍ 39 ഡിഗ്രിക്കു മുകളിലാണ് താപനില. മുന്‍ വര്‍ഷങ്ങളെ അപേക്ഷിച്ച് ഇക്കുറി ചൂടിന്റെ കാഠിന്യം നേരത്തെ തുടങ്ങി. ഉറക്കമില്ലാത്ത രാത്രികളെയാണു പലരും നേരിടുന്നത്.

കൊല്ലം, കോട്ടയം, പാലക്കാട് ജില്ലകളില്‍ താപനില 38 ഡിഗ്രിയിലെത്തി. പത്തനംതിട്ട, ആലപ്പുഴ, തൃശൂര്‍, എറണാകുളം, കോഴിക്കോട്, കണ്ണൂര്‍ ജില്ലകളില്‍ 37 ഡിഗ്രി വരെയും തിരുവനന്തപുരം, മലപ്പുറം, കാസര്‍കോട് ജില്ലകളില്‍ 36 ഡിഗ്രി വരെയും ഉയര്‍ന്നു കഴിഞ്ഞു. മനുഷ്യനും ജന്തുജാലങ്ങള്‍ക്കും താങ്ങാന്‍ പറ്റുന്നതിനെക്കാള്‍ കൂടുതലാണ് ചൂടും ഉഷ്ണവും. കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, പാലക്കാട്, മലപ്പുറം ജില്ലകളില്‍ താപനില ഇനിയും ഉയരുമെന്ന മുന്നറിയിപ്പുമുണ്ട്.

വയനാട്, ഇടുക്കി ഒഴികെയുള്ള 12 ജില്ലകളില്‍ കേന്ദ്ര കാലാവസ്ഥാ വകുപ്പ് യെലോ അലര്‍ട്ട് പ്രഖ്യാപിച്ചു. ഈ സീസണിലെ സാധാരണ താപനിലയെക്കാള്‍ മൂന്നു ഡിഗ്രി വരെ കൂടുതലാണിത്. നാളെ മുതല്‍ സംസ്ഥാനത്ത് നേരിയ മഴയ്ക്ക് സാധ്യതയുണ്ടെങ്കിലും എല്ലാ പ്രദേശങ്ങളിലും മഴയ്ക്കുള്ള സാധ്യതയില്ല. അന്തരീക്ഷതാപം വര്‍ധിപ്പിക്കുന്ന എല്‍ നിനോ പ്രതിഭാസവും വാകാതെ അനുഭവപ്പെടാന്‍ സാധ്യതയുണ്ട്. 39 ഡിഗ്രി വരെ ചൂടാണ് ഇപ്പോള്‍ അനുഭവപ്പെടുന്നതെങ്കിലും അന്തരീക്ഷത്തിലെ ഈര്‍പ്പം കൂടി ഇതോടൊപ്പം കലരുമ്പോള്‍ കടുത്ത ഉഷ്ണവും നീറ്റലും പുകച്ചിലുമായി അത് അസഹ്യമാകുന്നു.

സാധാരണ ലഭിക്കേണ്ടതിനേക്കാള്‍ രണ്ട് മുതല്‍ നാല് ഡിഗ്രി വരെ താപനില ഉയരുന്നത് ജനജീവിതത്തെ സാരമായി ബാധിക്കുമെന്നാണ് മുന്നറിയിപ്പുകള്‍..താപനിലയ്ക്കൊപ്പം അള്‍ട്രാവയലറ്റ് വികിരണത്തിന്റെ അളവ് അപകടകരമായ രീതിയില്‍ വര്‍ധിക്കുന്നത് വലിയ ആശങ്കയാണ് സൃഷ്ടിക്കുന്നത്. അതിതഗുരുതരമായ സാഹചര്യത്തില്‍ പകല്‍ 11 മണി മുതല്‍ മൂന്ന് മണി വരെയുള്ള സമയങ്ങളില്‍ സൂര്യപ്രകാശം നേരിട്ട് ഏല്‍ക്കുന്നത് ഒഴിവാക്കണമെന്ന് ദുരന്തനിവാരണ അതോറിറ്റി നിര്‍ദ്ദേശിച്ചിട്ടുണ്ട്. വരുംദിവസങ്ങളില്‍ പാലക്കാട്, കൊല്ലം, കോട്ടയം ജില്ലകളില്‍ താപനില 42 ഡിഗ്രിവരെ ഉയരുമെന്നാണ് ആശങ്ക. കേരളത്തില്‍ ഇതിനു മുന്‍പ് രേഖപ്പെടുത്തിയ ഏറ്റവും ഉയര്‍ന്ന താപനില 41 ഡിഗ്രിയാണ്.

രാവിലെ പത്ത് മണി മുതല്‍ മൂന്ന് മണി വരെയുള്ള സമയങ്ങളിലാണ് ഉയര്‍ന്ന അള്‍ട്രാവയലറ്റ് സൂചിക രേഖപ്പെടുത്തുന്നത്. അതിനാല്‍ ആ സമയങ്ങളില്‍ ശരീരത്തില്‍ നേരിട്ട് സൂര്യപ്രകാശം ഏല്‍ക്കുന്നത് പരമാവധി ഒഴിവാക്കുക.തുടര്‍ച്ചയായി കൂടുതല്‍ സമയം അള്‍ട്രാവയലറ്റ് രശ്മികള്‍ ശരീരത്തില്‍ ഏല്‍ക്കുന്നത് സൂര്യാതപത്തിനും ത്വക്ക് രോഗങ്ങള്‍ക്കും നേത്രരോഗങ്ങള്‍ക്കും മറ്റ് ആരോഗ്യപ്രശ്നങ്ങള്‍ക്കും കാരണമായേക്കാം. പൊതുജനങ്ങള്‍ സുരക്ഷാമുന്‍കരുതലുകള്‍ സ്വീകരിക്കണം.

പുറം ജോലികളില്‍ ഏര്‍പ്പെടുന്നവര്‍, കടലിലും ഉള്‍നാടന്‍ മത്സ്യബന്ധനത്തിലും ഏര്‍പ്പെടുന്ന മത്സ്യത്തൊഴിലാളികള്‍, ജലഗതാഗതത്തിലേര്‍പ്പെടുന്നവര്‍, ബൈക്ക് യാത്രക്കാര്‍, വിനോദസഞ്ചാരികള്‍, ചര്‍മരോഗങ്ങളുള്ളവര്‍, നേത്രരോഗങ്ങളുള്ളവര്‍, ക്യാന്‍സര്‍ രോഗികള്‍, മറ്റ് രോഗപ്രതിരോധശേഷി കുറഞ്ഞ വിഭാഗങ്ങള്‍ തുടങ്ങിയവര്‍ പ്രത്യേകം ജാഗ്രത പാലിക്കണം. ഉയര്‍ന്ന ചൂട് സൂര്യാഘാതം, സൂര്യാതപം, നിര്‍ജലീകരണം തുടങ്ങി നിരവധി ഗുരുതരമായ ആരോഗ്യപ്രശ്നങ്ങള്‍ക്ക് കാരണമാകും. വനയോരമേഖലയില്‍ കാട്ടുതീ പടരാനുള്ള സാഹചര്യവും ഏറെയാണ്. കേന്ദ്ര കാലാവസ്ഥാ വകുപ്പും സംസ്ഥാന ദുരന്തനിവാരണ അതോറിറ്റിയും സ്ഥിതിഗതികള്‍ നിരീക്ഷിച്ചു വരികയാണ്.