പുതുവത്സര ആഘോഷത്തിനായി വ്യാജ കുറിപ്പടി ഉപയോഗിച്ച് നൈട്രാസെപ്പാം ഗുളികകള് ശേഖരിച്ച ബിരുദ വിദ്യാര്ത്ഥിയടക്കം 2 പേര് അറസ്റ്റിൽ: രോഗമില്ലാത്തവര് നൈട്രാസെപ്പാം കഴിച്ചാല് മയക്കുമരുന്ന് ഉപയോഗിക്കുന്നതിന്റെ അതേ ഫലം; കണ്ടെത്തിയത് പൊതികളായി സൂക്ഷിച്ച 82 ഗുളികകള്
പുതുവത്സര ആഘോഷത്തിനുവേണ്ടി നൈട്രാസെപ്പാം ഗുളികകള് ശേഖരിച്ചവർ അറസ്റ്റിൽ. പുനലൂരില് വ്യാജ കുറിപ്പടി ഉപയോഗിച്ചായിരുന്നു ബിരുദ വിദ്യാര്ത്ഥിയടക്കം 2 പേര് ഗുളിക ശേഖരിച്ചത്.
കല്ലുമല സ്വദേശികളായ അലന് ജോര്ജും, വിജയ് യും ആണ് പിടിയിലായിരിക്കുന്നത്. രോഗമില്ലാത്തവര് നൈട്രാസെപ്പാം കഴിച്ചാല് മയക്കുമരുന്ന് ഉപയോഗിക്കുന്നതിന്റെ അതേ ഫലമാണ് ലഭിക്കുന്നത്. ആകെ 82 നൈട്രാസെപ്പാം ഗുളികകളാണ് പൊതികളായി സൂക്ഷിച്ച നിലയില് കണ്ടെത്തിയത്.
ഡോക്ടറുടെ ശുപാര്ശയുണ്ടെങ്കില് മാത്രമേ ഈ ഗുളിക മരുന്നു കടകളില് പോലും വിൽക്കാൻ അനുമതിയുള്ളൂ. ആ സാഹചര്യത്തിലാണ് ഇത്രയും കൂടിയ അളവില് ഗുളികകള് കണ്ടെത്തിയിരിക്കുന്നത്. ലഹരി ഗുളിക എന്ന നിലയില് നൈട്രാസെപ്പാം ഉപയോഗിക്കാന് ശ്രമിച്ച രണ്ടു യുവാക്കളാണ് നിലവില് അറസ്റ്റിലായത്.
അലന് ജോര്ജ് മുന്പ് കഞ്ചാവ് കടത്തിയ കേസില് ജയില് ശിക്ഷ അനുഭവിച്ചിട്ടുണ്ടെന്ന് എക്സൈസ് പറയുന്നു. വിജയ് ബിരുദ വിദ്യാര്ഥിയാണ്. പുതുവല്സര ആഘോഷത്തിനായാണ് ഇരുവരും ഗുളികകള് സമാഹരിച്ചതെന്നും എക്സൈസ് വ്യക്തമാക്കി.
https://www.facebook.com/Malayalivartha
