മുഖ്യപ്രതികളെല്ലാം കാണാമറയത്ത് തുടരുന്നു; ആര്‍എസ്‌എസ് നേതാവ് സഞ്ജിത്തിനെ കൊലപ്പെടുത്തിയ കേസില്‍ സിബിഐ അന്വേഷണം ആവശ്യപ്പെട്ട് കുടുംബം ഹൈക്കോടതിയില്‍; സംസ്ഥാന പൊലീസ് നടത്തുന്ന അന്വേഷണം കാര്യക്ഷമമല്ലെന്ന് സഞ്ജിത്തിന്റെ ഭാര്യ അര്‍ഷിക
ആര്‍എസ്‌എസ് നേതാവ് സഞ്ജിത്തിനെ കൊലപ്പെടുത്തിയ കേസില്‍ സിബിഐ അന്വേഷണം ആവശ്യപ്പെട്ട് കുടുംബം ഹൈക്കോടതിയില്‍ ഹര്‍ജി നല്‍കി. സഞ്ജിത്തിന്റെ ഭാര്യ അര്‍ഷികയാണ് കേന്ദ്ര ഏജന്‍സികള്‍ക്ക് അന്വേഷണം കൈമാറണമെന്ന് അപേക്ഷിച്ച്‌ കോടതിയെ സമീപിച്ചത്. നിലവില്‍ സംസ്ഥാന പൊലീസ് നടത്തുന്ന അന്വേഷണം കാര്യക്ഷമമല്ലെന്നും മുഖ്യപ്രതികളെല്ലാം കാണാമറയത്ത് തുടരുകയാണെന്നും ഹര്‍ജിയില്‍ വ്യക്തമാക്കിയിട്ടുണ്ട്.
സംഭവം നടന്ന് ഒരുമാസം പിന്നിട്ടിട്ടും കേസിലെ മുഴുവന്‍ പ്രതികളെയും പിടിക്കാന്‍ പൊലീസിന് കഴിഞ്ഞിട്ടില്ലെന്ന് കുടുംബം കുറ്റപ്പെടുത്തി. സംസ്ഥാന പൊലീസ് അന്വേഷിച്ചാല്‍ നീതി കിട്ടില്ല. പിടിയിലാകാനുള്ള പ്രതികള്‍ക്ക് രക്ഷപെടാന്‍ പൊലീസ് തന്നെ പഴുതൊരുക്കിയെന്നും കുടുംബം ആരോപിച്ചിരുന്നു.
നവംബര്‍ 15-നാണ് ഭാര്യയ്‌ക്കൊപ്പം ബൈക്കില്‍ സഞ്ചരിക്കുകയായിരുന്ന സഞ്ജിത്തിനെ കാറിടിച്ച്‌ വീഴ്‌ത്തിയ ശേഷം അഞ്ചംഗ സംഘം വെട്ടിക്കൊലപ്പെടുത്തിയത്. രാഷ്ട്രീയ വൈരാഗ്യമാണ് കൊലയ്ക്ക് കാരണമെന്ന് പൊലീസിന്റെ പ്രാഥമിക അന്വേഷണത്തില്‍ കണ്ടെത്തിയെങ്കിലും പ്രതികള്‍ കാണാമറയത്ത് തുടരുകയാണ്.
https://www.facebook.com/Malayalivartha
