ഒരിഞ്ച് പിന്നോട്ട് പോകാതെ... അന്വേഷണ ഉദ്യോഗസ്ഥരെ വകവരുത്താനും സാക്ഷികളെ സ്വാധീനിക്കാനും ദിലീപും കൂട്ടാളികളും ശ്രമിച്ചതിന്റെ നിര്ണായക തെളിവുകളുമായി സംവിധായകന് ബാലചന്ദ്രകുമാര്; കുറ്റകൃത്യത്തെപ്പറ്റി ദിലീപിന്റെ സഹോദരനും കാവ്യ മാധവനും അറിയാമായിരുന്നുവെന്ന് ബാലചന്ദ്ര കുമാര്
കൊച്ചിയില് നടിയെ പീഡിപ്പിച്ച കേസിന്റെ വിധി വരുന്നതിന് മുമ്പ് മറ്റൊരു കേസ് പൊങ്ങി വന്നത് ദിലീപിനേയും കൂട്ടരേയും വല്ലാത്ത ധര്മ്മ സങ്കടത്തിലാക്കിയിട്ടുണ്ട്. അന്വേഷണ ഉദ്യോഗസ്ഥരെ വകവരുത്താന് ദിലീപും മറ്റുള്ളവരും ശ്രമിച്ചു എന്ന ഗുരുതരമായ കേസാണ് ഉണ്ടായിരിക്കുന്നത്. ഈ കേസില് ജാമ്യം നേടാനുള്ള ശ്രമത്തിലാണ് ദിലീപ്.
ഈ കേസില് എറണാകുളം ക്രൈംബ്രാഞ്ച് ഓഫിസിലെത്തി സംവിധായകന് ബാലചന്ദ്രകുമാര് മൊഴി നല്കി. അന്വേഷണ ഉദ്യോഗസ്ഥരെ വകവരുത്താനും സാക്ഷികളെ സ്വാധീനിക്കാനും ദിലീപും കൂട്ടാളികളും ശ്രമിച്ചതിന്റെ തെളിവായി 20 ഡിജിറ്റല് തെളിവുകള് അന്വേഷണ സംഘത്തിനു കൈമാറിയതായി സംവിധായകന് ബാലചന്ദ്രകുമാര് പറഞ്ഞു.
4 മണിക്കൂറോളം മൊഴിയെടുത്തു. കുറ്റകൃത്യത്തിന്റെ വിവരങ്ങള് ദിലീപിന്റെ സഹോദരന് അനൂപിനും കാവ്യ മാധവനും കൂടി അറിയാമെന്നാണു മൊഴി. ശാസ്ത്രീയ പരിശോധനയിലൂടെ ഈ തെളിവുകളുടെ വിശ്വാസ്യത ബോധ്യപ്പെടും. ഓരോ ഡിജിറ്റല് തെളിവും സംഭവിച്ച തീയതിയും സമയവും അടക്കം ക്രോഡീകരിച്ചാണു കൈമാറിയത്. മുഖ്യമന്ത്രിക്കു നല്കിയ പരാതിയില് പറയുന്ന കാര്യങ്ങളുടെ വിശ്വാസ്യത ശാസ്ത്രീയമായി തെളിയിക്കപ്പെടേണ്ടത് എന്റെ കൂടി ആവശ്യമാണ്. കുറ്റകൃത്യത്തെ കുറിച്ചു നേരിട്ട് അറിയാവുന്ന കാര്യങ്ങള് തുറന്നുപറഞ്ഞപ്പോള് മാനസിക സമ്മര്ദം ഇല്ലാതായതായി അദ്ദേഹം പറഞ്ഞു.
അതേസമയം, കുറ്റകൃത്യത്തിനു ശേഷം ഒന്നാം പ്രതി പള്സര് സുനിയും സുഹൃത്തും കാവ്യയുടെ വസ്ത്രവ്യാപാര ശാലയില് എത്തിയെന്നു മൊഴി നല്കിയ ജീവനക്കാരന് കോടതിയില് മൊഴിമാറ്റിയ ദിവസം പ്രതികള് പാര്ട്ടി നടത്തിയെന്ന വിവരം അന്വേഷണ സംഘം സ്ഥിരീകരിച്ചിട്ടില്ല. ഈ ദിവസം ബാലചന്ദ്രകുമാര് ദിലീപിന്റെ വീട്ടിലുണ്ടായിരുന്നില്ല.
നടിയെ പീഡിപ്പിച്ച കേസിന്റെ അന്വേഷണത്തില് നിന്ന് ഡിജിപി ബി. സന്ധ്യയെ മാറ്റിനിര്ത്തണമെന്ന് നടന് ദിലീപിന്റെ വീട്ടിലെത്തിയ 'വിഐപി' ഒരു മന്ത്രിയെ നേരിട്ടു വിളിച്ച് ആവശ്യപ്പെട്ടതായി സംവിധായകന് ബാലചന്ദ്രകുമാര് മൊഴി നല്കി. കുറ്റപത്രം സമര്പ്പിച്ച കേസില് എന്തുചെയ്യണമെന്ന് നമ്മള് തീരുമാനിക്കുമെന്ന വിഐപിയുടെ വാക്കുകളും മൊഴികളില് ബാലചന്ദ്രകുമാര് ഉദ്ധരിച്ചിട്ടുണ്ട്.
ഇന്നു മജിസ്ട്രേട്ട് മുന്പാകെ നല്കുന്ന രഹസ്യമൊഴിയില് വിഐപിയാരാണെന്നു ബാലചന്ദ്രകുമാര് വെളിപ്പെടുത്തിയേക്കും. അന്വേഷണ ഉദ്യോഗസ്ഥരെ വകവരുത്താനുള്ള പ്രതികളുടെ ഗൂഢാലോചനയില് വിഐപിയും പങ്കാളിയായ സാഹചര്യത്തില് കണ്ടാലറിയാവുന്ന ആറാം പ്രതിയായി എഫ്ഐആറില് ചേര്ത്തിരിക്കുന്നത് ഇദ്ദേഹത്തേയാണ്.
അതേസമയം, ഈ വിഐപിയെ ചുറ്റിപ്പറ്റിയുള്ള സസ്പെന്സ് ഒഴിവാക്കാന് ഇന്നലെയും ബാലചന്ദ്രകുമാര് തയാറായില്ല. ബാലചന്ദ്രകുമാര് സിനിമാ ചര്ച്ചയ്ക്കു വേണ്ടി ദിലീപിന്റെ വീട്ടിലെത്തിയതായി പറയുന്ന ദിവസം ദിലീപിന്റെ ആലുവയിലെ വീട്ടിലെത്തിയവരുടെ ദൃശ്യങ്ങള് അന്വേഷണ സംഘം ബാലചന്ദ്രകുമാറിനെ കാണിച്ചിരുന്നു. വിഐപിയെ ബാലചന്ദ്രകുമാര് തിരിച്ചറിഞ്ഞതായാണ് സൂചന.
അന്വേഷണ ഉദ്യോഗസ്ഥരെ വകവരുത്താമെന്ന് പ്രതികളോട് പറഞ്ഞത് വിഐപിയാണെന്നാണ് അന്വേഷണ സംഘത്തിന്റെ നിഗമനം. അടിക്കടി വിദേശ രാജ്യങ്ങള് സന്ദര്ശിക്കാറുള്ള ഇദ്ദേഹത്തിന്റെ ബിസിനസ് ഇടപാടുകളും ദുരൂഹമാണ്. ഗൂഢാലോചനാക്കേസിലെ ആദ്യ അറസ്റ്റ് വിഐപിയുടെതാവാനാണു സാധ്യത.
അതേസമയം, ബാലചന്ദ്രകുമാറിന്റെ വെളിപ്പെടുത്തലിന്റെ പശ്ചാത്തലത്തില് കേസിലെ ഒന്നാം പ്രതി സുനില്കുമാറിനെ (പള്സര് സുനി) ജയിലില് അന്വേഷണ സംഘം ചോദ്യം ചെയ്യും.
"
https://www.facebook.com/Malayalivartha
