കേരള കോണ്‍ഗ്രസ് (മാണി) ഗ്രൂപ്പിന്റെ യുവജന വിഭാഗമായ യൂത്ത്ഫ്രണ്ട് (എം) നേതാവായ ബിനു കുരുവിളയെ ക്വട്ടേഷന്‍ സംഘം വധിക്കാന്‍ ശ്രമിച്ച കേസില്‍ 4 പേര്‍ക്കെതിരെ സിബിഐ പ്രാരംഭ കുറ്റപത്രം സമര്‍പ്പിച്ചു.

4 പ്രതികളെയും മാര്‍ച്ച് 10 ന് ഹാജരാക്കാന്‍ തിരുവനന്തപുരം ചീഫ് ജുഡീഷ്യല്‍ മജിസ്‌ട്രേട്ട് കോടതി ഉത്തരവിട്ടു. പ്രാഥമിക കുറ്റപത്രത്തിലെ ഒന്നു മുതല്‍ നാലുവരെ പ്രതികളായ കെ. സി.ബിബിന്‍ , സുബിന്‍ , സുധീഷ് കൃഷ്ണന്‍ , റ്റിജോ ചാക്കോസ്രാമ്പിയില്‍ എന്നിവരെ ഹാജരാക്കാനാണ് സി ജെ എം ആര്‍. രേഖ ഉത്തരവിട്ടത്.

വധശ്രമ കേസ് വിചാരണക്കായി സിബി ഐ കോടതിയിലേക്ക് കമ്മിറ്റ് ചെയ്തയക്കുന്നതിന്റെ നടപടി ക്രമങ്ങളുടെ ഭാഗമായാണ് പ്രതികളെ കോടതി വിളിച്ചു വരുത്തുന്നത്. തിരുവനന്തപുരം സിബിഐ യൂണിറ്റ് എസ് പിയാണ് പ്രതികളെ ഹാജരാക്കേണ്ടത്.


ആദ്യ 3 പ്രതികളും ക്വട്ടേഷന്‍ സംഘാംഗങ്ങളും കുറ്റകൃത്യത്തില്‍ നേരിട്ട് പങ്കെടുത്തവരുമാണ്. ഒന്നാം പ്രതി ബിബിന്‍ ഭാര്യയെ കൊലപ്പെടുത്തിയ കേസില്‍ വിയ്യൂര്‍ സെന്‍ട്രല്‍ ജയിലില്‍ കഴിയുകയാണ്. സുധീഷ് കൃഷ്ണനാണ് ക്വട്ടേഷന് നേതൃത്വം കൊടുത്തത്. നാലാം പ്രതി റ്റിജോ കുറ്റകൃത്യം ആസൂത്രണം ചെയ്തയാളാണ്. കേസില്‍ പ്രതിയാകുമെന്നറിഞ്ഞതോടെ റ്റിജോ കാനഡയിലേക്ക് കടന്നിരുന്നു. ഇയാളെ തിര്യെ കേരളത്തിലെത്തിക്കാന്‍ ഇന്റര്‍പോളിന്റെ സഹായം സിബിഐ തേടിയിട്ടുണ്ട്. ഇതിനായി ലുക്ക് ഔട്ട് നോട്ടീസ് പുറപ്പെടുവിക്കും.

ഇയാള്‍ നാട്ടിലെത്തി സിബിഐ കസ്റ്റഡിയില്‍ ലഭിച്ചാല്‍ മാത്രമേ ഗൂഢാലോചനയില്‍ പങ്കാളികളയാവരെ തിരിച്ചറിഞ്ഞ് കൂടുതല്‍ അന്വേഷണം നടത്തി അന്തിമ കുറ്റപത്രം സമര്‍പ്പിക്കാന്‍ സിബിഐക്ക് സാധിക്കുകയുള്ളു. ക്‌നാനായ യാക്കോബായ സഭയിലെ പുരോഹിതന്മാരും വന്‍ വ്യവസായികളും ഉന്നത പോലീസ് ഉദ്യോഗസ്ഥരുമടക്കം ഗൂഢാലോചനയില്‍ പങ്കാളികളായിട്ടുണ്ടെന്നാണ് സി ബി ഐ നിഗമനം.


തി രു വല്ലാ നിയോജകമണ്ഡലം പ്രസിഡന്റ് കൂടിയാണ് വധശ്രമത്തിനിരയായ ബിനു കുരുവിള. യാക്കോബൈറ്റ് ക്നാനായ സഭയുടെ സെന്‍ട്രല്‍ കോണ്‍ഗ്രസ് കമ്മിറ്റിയുടെ വൈസ് പ്രസിഡന്റ് സ്ഥാനത്തേയ്ക്ക് സ്ഥാനാര്‍ത്ഥിയായി ബിനു കുരുവിള മത്സരിച്ചതാണ് വിരോധ കാരണമായി സിബിഐ കുറ്റപത്രത്തില്‍ പറയുന്നത്.

2018 ഏപ്രില്‍ 7ന് രാത്രി 11 മണിക്കാണ് വധശ്രമം നടന്നത്. മാരകായുധങ്ങളുമായി ഭവനഭേദനം നടത്തിയ പ്രതികള്‍ ഗര്‍ഭിണിയായ ഭാര്യയുടെയും രണ്ട് പെണ്‍മക്കളുടെയും മുന്നിലിട്ടാണ് മൃഗീയമായും പൈശാചികമായും വെട്‌ക്കൊലപ്പെടുത്താന്‍ ശ്രമിച്ചത്. തലയില്‍ മാത്രം മാരകായുധമായ വാള്‍കൊണ്ട് 5 വെട്ടേറ്റിരുന്നു. തുടര്‍ന്ന് ദേഹമാസകലം വെട്ടേറ്റ ബിനു ഇപ്പോഴും ശയ്യാവലംബിയായി ചികിത്സയില്‍ കഴിയുകയാണ്.

തിരുവല്ല സ്വദേശികളായ ചെല്ലപ്പന്‍ , കുട്ടന്‍ എന്നിവരെ പ്രതി ചേര്‍ത്ത് ലോക്കല്‍ പോലീസ് നാമ മാത്രമായി എഫ് ഐ ആര്‍ രജിസ്റ്റര്‍ ചെയ്‌തെങ്കിലും അന്വേഷണം എങ്ങുമെത്തിയില്ല. തുടര്‍ന്ന് അന്വേഷണം ക്രൈംബ്രാഞ്ച് ഏറ്റെടുത്തെങ്കിലും രണ്ടാം പ്രതിയായ കുട്ടന് കൃത്യത്തില്‍ പങ്കില്ലെന്ന് അന്വേഷണത്തില്‍ വെളിവായെന്ന് ചൂണ്ടിക്കാട്ടി കുട്ടനെ പ്രതിസ്ഥാനത്ത് നിന്ന് കുറവ് ചെയ്ത് ക്രൈംബ്രാഞ്ച് അഡീ. റിപ്പോര്‍ട്ട് സമര്‍പ്പിച്ചു. തിരുവല്ല ജുഡിഷ്യല്‍ ഒന്നാം ക്ലാസ് മജിസ്‌ട്രേട്ട് കോടതിയിലാണ് രണ്ടാം പ്രതിയെ പ്രതിസ്ഥാനത്ത് നിന്ന് കുറവ് ചെയ്ത് ക്ലീന്‍ ചിറ്റ് നല്‍കി കൊണ്ട് അഡീ. റിപ്പോര്‍ട്ട് സമര്‍പ്പിച്ചത്.


ഈ സാഹചര്യത്തിലാണ് ബിനു ഹൈക്കോടതിയെ സമീപിച്ചത്. ലോക്കല്‍ പോലീസിന്റെയും ക്രൈംബ്രാഞ്ചിന്റെയും കേസന്വേഷണത്തിലെ വീഴ്ചകള്‍ ചൂണ്ടിക്കാട്ടിയാണ്‌ഹൈക്കോടതി കേസ് സിബിഐക്ക് കൈമാറിയത്.