ഒടുവിൽ ആ വാക്കും പാലിച്ചു സുരേഷ് ഗോപി എം പി. ഇടമലക്കുടി പഞ്ചായത്ത് ഇഡലിപാറകുടിയിലെ നൂറോളം ആദിവാസി കുടുംബങ്ങൾക്ക് കുടിവെള്ളം എത്തിച്ചിരിക്കുകയാണ് അദ്ദേഹം. മകളുടെ പേരിലുള്ള ട്രസ്റ്റിൽ നിന്നും ഏഴ് ലക്ഷം രൂപ വില വരുന്ന എച്ച് ഡി പൈപ്പ് സ്‌പോൺസർ ചെയ്തുകൊണ്ടാണ് സ്ഥലത്തെ കുടിവെള്ള ക്ഷാമത്തെ അദ്ദേഹം പരിഹരിച്ചത്. . ബിജെപി സംസ്ഥാന അദ്ധ്യക്ഷൻ കെ സുരേന്ദ്രനാണ് ഇക്കാര്യം ഫേസ്ബുക്കിലൂടെ അറിയിച്ചത്. അദ്ദേഹത്തിന്റെ ഫേസ്ബുക്ക് കുറിപ്പിന്റെ പൂർണ്ണരൂപം...

ഇടമലക്കുടി ജനങ്ങളോട് വാക്ക് പാലിച്ച് സുരേഷ് ഗോപി എം.പി

ഇടമലക്കുടി പഞ്ചായത്ത് ഇഡലിപാറകുടിയിലെ നൂറോളം ആദിവാസി കുടുംബങ്ങൾ വർഷങ്ങളായി കുടിവെള്ളം കിട്ടാതെ വലയുകയായിരുന്നു.പല കുടിവെള്ള പദ്ധതികളും കൊണ്ടുവന്നെങ്കിലും വനംവകുപ്പ് അനുമതി ലഭ്യമാകാത്തതിനാൽപ്രഖ്യാപനങ്ങൾ എല്ലാംതന്നെ കടലാസിൽ ഒതുങ്ങുകയായിരുന്നു.

കുടിവെള്ളക്ഷാമം രൂക്ഷമായതിനാൽ കഴിഞ്ഞ വർഷം പഞ്ചായത്ത് തെരഞ്ഞെടുപ്പിൽ ഇവിടെ പ്രചാരണത്തിന് എത്തിയ 15 വർഷം ദേവികുളം MLA ആയിരുന്ന രാജേന്ദ്രനെ ഇവിടുത്തെ അമ്മമാർ മണിക്കൂറുകളോളം തടഞ്ഞു വയ്ക്കുന്നസാഹചര്യമുണ്ടായി ...

കഴിഞ്ഞ ഡിസംബറിൽ നടന്ന ഉപതെരഞ്ഞെടുപ്പുപ്രവർത്തനവുമായി ബന്ധപ്പെട്ട് ഇവിടെയെത്തിയ ബിജെപി ഇടുക്കി ജില്ലാ നേതാക്കൾക്ക് മുമ്പാകെ ഇഡലിപാറയിലെ നിവാസികൾ ഒരു ആവശ്യം മാത്രമാണ് മുന്നിൽ വച്ചത്.കാലങ്ങളായി ഞങ്ങൾ അനുഭവിക്കുന്ന കുടിവെള്ളക്ഷാമത്തിന് ഒരു അറുതി വരുത്തണം. അവരുടെ ന്യായമായ ആവശ്യം മനസ്സിലാക്കിയ ബിജെപി ഇടുക്കി ജില്ലാ നേതൃത്വം ബഹുമാന്യനായ ശ്രീ #സുരേഷ്_ഗോപി എംപിയെ ബന്ധപ്പെട്ടു. അദ്ദേഹം കാര്യങ്ങൾ ചോദിച്ച് മനസ്സിലാക്കി ഉടൻ തന്നെ എംപി ഫണ്ടിൽ നിന്നും 12 ലക്ഷം രൂപ അനുവദിക്കുകയും ചെയ്തു.

എന്നാൽ ഇടമലക്കുടി പഞ്ചായത്ത് ഭരണസമിതി സാങ്കേതിക തടസ്സങ്ങൾ പറഞ്ഞ് പദ്ധതി വൈകിപ്പിക്കാൻ ശ്രമിക്കുന്നു എന്നറിഞ്ഞ് കുടിവെള്ള പദ്ധതി നടപ്പാക്കാൻ കാലതാമസം വരുമെന്ന് മനസ്സിലാക്കിയ സുരേഷ് ഗോപി എംപി തന്റെ മകളുടെ പേരിലുള്ള ട്രസ്റ്റിൽ നിന്നും നിന്നും മൂന്നര കിലോമീറ്റർ നീളത്തിൽ ഇഡലിപാറയിലേക്ക് വേണ്ടിവരുന്ന ഏകദേശം ഏഴ് ലക്ഷം രൂപ വില വരുന്ന എച്ച് ഡി പൈപ്പ് സ്പോൺസർ ചെയ്തുകൊണ്ട് കുടിവെള്ള ക്ഷാമം പരിഹരിക്കാൻ നടപടി അടിയന്തരമായി സ്വീകരിച്ചു....

സുരേഷ് ഗോപി MP യുടെ നിർദ്ദേശപ്രകാരം പാർട്ടിനേതാക്കൾ ഇന്ന് പൈപ്പുകൾ സ്ഥലത്തെത്തിച്ചു. ഇടത് വലത് എം. പി മാരാരും ചെയ്യാത്ത ഒട്ടേറെ നല്ലകാര്യങ്ങളാണ് സുരേഷ്ഗോപി കേരളത്തിൽ ചെയ്യുന്നത് എന്നുപറഞ്ഞാണ് കെ സുരേന്ദ്രൻ കുറിപ്പ് അവസാനിപ്പിച്ചിരിക്കുന്നത്.

അതേസമയം നേരത്തെയും ഇത്തരത്തിൽ ഒരുപാട് വാക്കുകൾ അദ്ദേഹം പാലിക്കുക യുണ്ടായി.പറഞ്ഞ വാക്ക് പാലിച്ച സൂപ്പർസ്റ്റാർ സുരേഷ് ഗോപിക്ക് നന്ദി പറഞ്ഞ് മിമിക്രി ആർട്ടിസ്റ്റുകൾ ഒരു ഘട്ടത്തിൽ രംഗത്തുവന്നിരുന്നു . മിമിക്രി ആർട്ടിസ്റ്റ് അസോസിയേഷൻ സംഘടനയുടെ ഉന്നമനത്തിനായി താൻ ചെയ്യുന്ന ഓരോ സിനിമയുടെ പ്രതിഫലത്തിൽ നിന്നും രണ്ട് ലക്ഷം രൂപ സംഭവനയായി നൽകുമെന്ന് സുരേഷ് ഗോപി അറിയിച്ചിരുന്നു. ആ വാക്ക് നിറവേറ്റുകയും ചെയ്തു താരം. സംവിധായകൻ നാദിർഷയായിരുന്നു ഇക്കാര്യം സമൂഹമാധ്യമങ്ങളിലൂടെ അറിയിച്ചത്.