നിയന്ത്രണം വിട്ട ഇലക്ട്രിക് ബസ് വഴിയാത്രക്കാര്‍ക്ക് ഇടയിലേക്കു പാഞ്ഞുകയറി ആറു പേര്‍ക്ക് ദാരുണാന്ത്യം.... പന്ത്രണ്ടോളം പേര്‍ക്ക് പരിക്ക്, സംഭവത്തില്‍ അന്വേഷണം ഊര്‍ജ്ജിതമാക്കി പോലീസ്.

കാണ്‍പൂരില്‍ ടാറ്റ് മില്‍ ക്രോസ്‌റോഡിനു സമീപമാണ് സംഭവം നടന്നത്. അമിത വേഗത്തിലെത്തിയ ബസ് നിയന്ത്രണം വിട്ടു നിരവധി വാഹനങ്ങളെയും വഴിയാത്രക്കാരെയും ഇടിക്കുകയായിരുന്നു.

അപകടത്തില്‍ മൂന്നു കാറുകളും നിരവധി ബൈക്കുകളും തകര്‍ന്നു. തുടര്‍ന്നു ട്രാഫിക് ബൂത്തിലൂടെ ഓടിയ ബസ് ഒരു ട്രക്കില്‍ ഇടിച്ചതിനെത്തുടര്‍ന്നാണ് നിന്നത്. ബസിന്റെ ഡ്രൈവര്‍ ഓടി രക്ഷപ്പെട്ടെന്ന് ഈസ്റ്റ് കാണ്‍പൂര്‍ പോലീസ് ഡെപ്യൂട്ടി കമ്മീഷണര്‍ പറഞ്ഞു.

പരിക്കേറ്റവര്‍ സമീപത്തെ ആശുപത്രിയില്‍ ചികിത്സയില്‍ കഴിയുന്നു. അപകടത്തില്‍ മരിച്ചവരുടെ കുടുംബങ്ങളെ രാഷ്ട്രപതി രാംനാഥ് കോവിന്ദ് അനുശോചനം അറിയിച്ചു.