കൂനൂര് ഹെലികോപ്റ്റര് അപകടത്തില് മരണപ്പെട്ട സൈനികന് എ പ്രദീപിന്റെ ഭാര്യ ശ്രീലക്ഷ്മി സര്ക്കാര് ജോലിയില് പ്രവേശിച്ചു: മന്ത്രി കെ രാജന്റെയും കളക്ടര് ഹരിത വി കുമാറിന്റെയും സാന്നിധ്യത്തില് നിയമന ഉത്തരവ് ഏറ്റുവാങ്ങി
കൂനൂര് ഹെലികോപ്റ്റര് അപകടത്തില് മരണപ്പെട്ട വ്യോമസേന ജൂനിയര് വാറന്റ് ഓഫീസര് എ പ്രദീപിന്റെ ഭാര്യ ശ്രീലക്ഷ്മിക്ക് തൃശൂര് താലൂക്ക് ഓഫീസില് നിയമനം. എംകോം ബിരുദധാരിയായ ശ്രീലക്ഷ്മിക്ക് ക്ലറിക്കല് തസ്തികയിലാണ് ജോലിയില് പ്രവേശിച്ചത്.
മന്ത്രി കെ രാജന്റെയും കളക്ടര് ഹരിത വി കുമാറിന്റെയും സാന്നിധ്യത്തില് ശ്രീലക്ഷ്മി നിയമന ഉത്തരവ് ഏറ്റുവാങ്ങി. ഹെലികോപ്റ്റര് അപകടത്തില് മരിച്ച ജൂനിയര് വാറന്റ് ഓഫീസര് എ പ്രദീപിന്റെ ഭാര്യ ശ്രീലക്ഷ്മിക്ക് സര്ക്കാര് ജോലി നല്കണമെന്ന് സൈനിക ക്ഷേമ ബോര്ഡ് ഉത്തരവ് ഇറക്കിയിരുന്നു.
ജില്ലാ കലക്ടറുടെ നിയമന ഉത്തരവിന്റെ അടിസ്ഥാനത്തില് ശ്രീലക്ഷ്മി ഇന്ന് ജോലിയില് പ്രവേശിച്ചു. രണ്ടു മക്കള്ക്കൊപ്പമാണ് ശ്രീലക്ഷമി ഓഫീസില് എത്തിയത്. അതേസമയം, ജൂനിയര് വാറന്റ് ഓഫീസര് പ്രദീപിന്റെ ഭാര്യയ്ക്ക് ജോലി നല്കാന് അപകടം നടന്ന് ഒരാഴ്ചയ്ക്കകം തന്നെ മന്ത്രിസഭാ യോഗം തീരുമാനമെടുത്തിരുന്നു. രണ്ട് മാസത്തിനകം തന്നെ ജോലി നല്കാന് സാധിച്ചുവെന്നും മന്ത്രി കെ രാജന് പറഞ്ഞു. ജോലി നല്കിയതിനു പുറമെ കുടുംബത്തിന് ധനസഹായമായി അഞ്ച് ലക്ഷം രൂപ നല്കിയിരുന്നു. കുടുംബത്തിന് വേണ്ട എല്ലാ ആനൂകൂല്യങ്ങളും ലഭ്യമാക്കുമെന്നും മന്ത്രി വ്യക്തമാക്കി.
https://www.facebook.com/Malayalivartha
