ട്വിറ്ററിൽ ബ്ലോക്ക് ചെയ്തവരെയൊക്കെ ഹ്യൂണ്ടായ് ഇന്ത്യ അൺബ്ലോക്ക് ചെയ്തു തുടങ്ങിയിട്ടുണ്ടെന്ന കാര്യം ചൂണ്ടിക്കാട്ടി ശ്രീജിത്ത് പണിക്കർ രംഗത്ത്. അദ്ദേഹം ഫേസ്ബുക്കിൽ പങ്കു വച്ച കുറിപ്പിന്റെ പൂർണ്ണ രൂപം ഇങ്ങനെ; ട്വിറ്ററിൽ ബ്ലോക്ക് ചെയ്തവരെയൊക്കെ ഹ്യൂണ്ടായ് ഇന്ത്യ അൺബ്ലോക്ക് ചെയ്തു തുടങ്ങിയിട്ടുണ്ട് . എന്നെ അല്പം മുൻപ് അൺബ്ലോക്ക് ചെയ്തു. അവരുടെ പ്രസ്താവനയിൽ മാപ്പോ ഖേദമോ ഇല്ല. ഇന്ത്യയുടെ ദേശീയതയെ ബഹുമാനിക്കും എന്ന് പറയുമ്പോഴും കാശ്മീരിനെ കുറിച്ച് ഹ്യുണ്ടായ് ഗ്രൂപ്പിലെ ഒരംഗമായ ഹ്യുണ്ടായ് പാകിസ്ഥാൻ സ്വീകരിച്ച ഇന്ത്യാ വിരുദ്ധ നിലപാടിനെ കുറിച്ച് അവർക്ക് ഒന്നും പറയാനില്ല.

പാകിസ്ഥാൻകാരുടെ കാഴ്ചപ്പാട് തങ്ങൾക്കില്ല എന്നു പറയാൻ അവർക്ക് കഴിയുന്നില്ല. ചുരുക്കി പറഞ്ഞാൽ ഹ്യുണ്ടായ് ഗ്രൂപ്പിൽ നിന്നും കാശ്മീർ വിഷയത്തിൽ നമുക്കു മുന്നിലുള്ളത് ഒരേയൊരു നിലപാട് മാത്രമാണ്. കാശ്മീരിന്റെ സ്വാതന്ത്ര്യത്തിനായി പ്രവർത്തിക്കുന്ന സഹോദരങ്ങൾക്ക് ഐക്യദാർഢ്യം എന്നതാണ് ആ നിലപാട്. അത് പാകിസ്ഥാന്റെ നിലപാടാണ്, ഇന്ത്യവിരുദ്ധമാണ്, ഇന്ത്യയുടെ പരമാധികാരത്തിന് വെല്ലുവിളിയാണ്.

അതിൽ മാപ്പ് പറയാൻ ഹ്യുണ്ടായ് തയ്യാറായിട്ടില്ല. ഇന്ത്യാവിരുദ്ധ നിലപാട് ചോദ്യം ചെയ്തവരെ ബ്ലോക്ക് ചെയ്യാൻ ആണ് ഹ്യുണ്ടായ് ഇന്ത്യ ശ്രമിച്ചത്. പാകിസ്ഥാൻകാർ പോലും അതിനു തുനിഞ്ഞില്ല എന്നോർക്കണം. ബ്ലോക്കിങ് വാർത്തയായപ്പോൾ ആൾക്കാരെ അൺബ്ലോക്ക് ചെയ്യുകയാണ്. യാതൊരു അർത്ഥവുമില്ലാത്ത പ്രസ്താവനയും ഇറക്കുകയാണ്. അത് തീരെ അംഗീകരിക്കാൻ കഴിയാത്ത, ജനാധിപത്യ വിരുദ്ധമായ പ്രവണതയാണ്.