സംസ്ഥാനത്ത് മതപരമായ വിവിധ ചടങ്ങുകള്‍ക്കും ആഘോഷങ്ങള്‍ക്കും കോവിഡ് നിയന്ത്രണങ്ങളിലുള്ള ഇളവുകള്‍ പ്രഖ്യാപിച്ചു. ആലുവ ശിവരാത്രി, മാരാമണ്‍ കണ്‍വെന്‍ഷന്‍, ആറ്റുകാല്‍ പൊങ്കാല തുടങ്ങിയ ചടങ്ങുകള്‍ക്ക് ഇത് ബാധകമായിരിക്കും.

ആലുവാ ശിവരാത്രി, മാരാമണ്‍ കണ്‍വെന്‍ഷന്‍, ആറ്റുകാല്‍ പൊങ്കാല ഉള്‍പ്പെടെയുള്ള മതപരമായ ഉത്സവങ്ങള്‍ക്ക് 25 ചതുരശ്ര അടിയില്‍ ഒരാള്‍ എന്ന നിലയില്‍ പരമാവധി 1500 പേരെ പങ്കെടുപ്പിക്കാവുന്നതാണെന്ന് ഉത്തരവില്‍ പറഖയുന്നു. ഓരോ ഉത്സവത്തിനും പൊതുസ്ഥലത്തിന്റെ വിസ്തീര്‍ണ്ണമനുസരിച്ച്‌ 25 ചതുരശ്ര അടിയില്‍ ഒരാള്‍ എന്ന നിലയ്ക്ക് ജില്ലാകളക്ടര്‍മാര്‍ ആളുകളുടെ എണ്ണം നിശ്ചയിക്കേണ്ടതാണ്.

ആറ്റുകാല്‍ പൊങ്കാല മഹോത്സവം വര്‍ഷത്തെപ്പോലെ വീടുകളില്‍ മാത്രമായി പൊങ്കാല പരിമിതപ്പെടുത്തേണ്ടതാണ്. മുന്‍കാലത്തേത് പോലെ റോഡുകളില്‍ പൊങ്കാല അനുവദിക്കുന്നതല്ല.

72 മണിക്കൂറിനുളളില്‍ എടുത്ത ആര്‍ടിപിസിആര്‍ നെഗറ്റീവ് സര്‍ട്ടിഫിക്കറ്റ് അല്ലെങ്കില്‍ കഴിഞ്ഞ മൂന്ന് മാസത്തിനുളളില്‍ കോവിഡ് പോസിറ്റീവ് ആയതിന്റെ രേഖ കയ്യിലുള്ള 18 വയസ്സില്‍ മുകളിലുളളവര്‍ക്ക് മാത്രമേ ഈ ആഘോഷങ്ങളിലു് ചടങ്ങുകളിലും പ്രവേശനം അനുവദിക്കൂ. രോഗലക്ഷണങ്ങളില്ലാത്ത 18 വയസ്സിനു താഴെയുള്ള കുട്ടികള്‍ക്ക് കുടുംബാഗങ്ങളോടൊപ്പം പങ്കെടുക്കാവുന്നതാണ്.

ആഘോഷങ്ങളില്‍ പങ്കെടുക്കുന്ന എല്ലാവരും മാസ്ക് മുഴുവന്‍ സമയവും ഉപയോഗിക്കുന്നുണ്ടെന്ന് കൃത്യമായിഉറപ്പുവരുത്തേണ്ടതാണ്. ചടങ്ങുകളുടെ പന്തലില്‍ ആഹാരസാധനങ്ങള്‍ വിതരണം ചെയ്യാന്‍ പാടുള്ളതല്ല.

പൊതുപരിപാടികളുടെ സംഘാടകര്‍ കോവിഡ് പ്രോട്ടോക്കോള്‍ പാലിക്കുന്നുണ്ടെന്ന് ഉറപ്പുവരുത്തേണ്ടതാണെന്നും ഉത്തരവില്‍ പറയുന്നു.

അതിനിടെ, അങ്കണവാടികള്‍ തിങ്കളാഴ്ച മുതല്‍ പ്രവര്‍ത്തിക്കുമെന്ന് ആരോഗ്യ മന്ത്രി വീണാ ജോര്‍ജ് അറിയിച്ചു. അങ്കണവാടികള്‍ തുടര്‍ച്ചയായി അടച്ചിടുന്നത് കുട്ടികളുടെ മാനസികവും ശാരീരികവുമായ വളര്‍ച്ചയ്ക്കു ദോഷം ചെയ്യും. അങ്കണവാടികള്‍ തുറന്നാല്‍ കുട്ടികള്‍ക്കു പോഷകാഹാരങ്ങള്‍ കൃത്യമായി നല്‍കാനും സാധിക്കും. ചെറിയ കുട്ടികളായതിനാല്‍ രക്ഷിതാക്കളും അങ്കണവാടി ജീവനക്കാരും മാര്‍ഗനിര്‍ദേശങ്ങള്‍ കര്‍ശനമായ പാലിക്കണമെന്നും മന്ത്രി അഭ്യര്‍ത്ഥിച്ചു.