സംസ്ഥാനത്ത് സ്ത്രീധന പീഡനം തുടര്‍കഥയാകുകയാണ്. കുമാരപുരത്ത് സ്ത്രീധനത്തിന്റെ പേരില്‍ ഭര്‍തൃവീട്ടില്‍ ക്രൂരപീഡനത്തിന് ഇരയായെന്ന് യുവതി. ഭര്‍ത്താവ് സ്ത്രീധനം ആവശ്യപ്പെട്ട് മര്‍ദിച്ചെന്നാണ് 24 വയസ്സുകാരിയുടെ പരാതി. തിരുവനന്തപുരം ശ്രീകാര്യം സ്വദേശിനിയായ അശ്വതിയാണ് കുമാരപുരത്തെ ഭര്‍തൃവീട്ടില്‍ സ്ത്രീധന പീഡനത്തിനിരയായത്.

വിവാഹ സമ്മാനമായി 15 ലക്ഷം രൂപയും 4 ലക്ഷം രൂപയുടെ കാറും 45 പവനും നല്‍കി. പണവും സ്വര്‍ണവും തീരാറായപ്പോള്‍ കൂടുതല്‍ സ്ത്രീധനം ആവശ്യപ്പെട്ട് മര്‍ദനം തുടങ്ങി. പൊലീസിലും വീട്ടിലും വിവരങ്ങള്‍ അറിയിക്കാതിരിക്കാന്‍ ഭീഷണിപ്പെടുത്തി. ഫോണ്‍ തല്ലി തകര്‍ത്തു.പരുക്കേറ്റ യുവതി മെഡിക്കല്‍ കോളജില്‍ ചികിത്സയിലാണ്.

ഭര്‍ത്താവ് ജിബിന്‍ മദ്യപിച്ചെത്തി പണം ആവശ്യപ്പെട്ട് നിരന്തരം മര്‍ദിച്ചു. ജിബിന്റെ കുടുംബവും ഇതിന് കൂട്ടുനിന്നെന്ന് അശ്വതിയുടെ പരാതിയില്‍ പറയുന്നു. 2017 ഒക്ടോബറിലായിരുന്നു അശ്വതിയുടെയും ജിബിന്റെയും വിവാഹം. കഴിഞ്ഞ നവംബറില്‍ മെഡിക്കല്‍ കോളജ് പൊലീസിലും കമ്മിഷണര്‍ ഓഫിസിലും പരാതി നല്‍കിയിരുന്നു. പിന്നീട് ഒത്തുതീര്‍പ്പിന്റെ ഭാഗമായി ഭര്‍തൃവീട്ടിലേക്ക് മടങ്ങിയിരുന്നു.