യാത്രയായത് പൊന്നുമക്കളെ ഒരുനോക്കു കാണാതെ.... വീട്ടുകാരുടെയും നാട്ടുകാരുടെയും പ്രാര്‍ത്ഥനകള്‍ വിഫലമായി.... ദിവസങ്ങള്‍ക്ക് മുമ്പ് ഇരട്ടക്കുഞ്ഞുങ്ങള്‍ക്ക് ജന്മം നല്‍കിയ കൃഷ്ണപ്രിയ പ്രസവത്തെ തുടര്‍ന്ന് അബോധാവസ്ഥയിലായതോടെ ചികിത്സയ്ക്കായി നാടൊന്നിച്ച് പണം സ്വരൂപിച്ചു, എന്നാല്‍ എല്ലാം ശ്രമങ്ങളും വിഫലമാക്കി കൊണ്ട് അവള്‍ കുഞ്ഞുമക്കളെ കാണാതെ ഈ ലോകത്തോട് വിട പറഞ്ഞു, വേര്‍പാട് താങ്ങാനാവാതെ ഉറ്റവരും ബന്ധുക്കളും നാട്ടുകാരും....

ദിവസങ്ങള്‍ക്ക് മുമ്പ് താന്‍ ജന്മം നല്‍കിയ ഇരട്ട കുഞ്ഞുങ്ങളെ ഒരു നോക്ക് കാണാന്‍ ഭാഗ്യം ലഭിക്കാതെയാണ് ആ അമ്മ വിടപറഞ്ഞത്. പ്രസവത്തിന് ശേഷം അബോധാവസ്ഥയിലായ തമ്പലക്കാട് പാറയില്‍ ഷാജി- അനിത ദമ്പതികളുടെ മകള്‍ കൃഷ്ണപ്രിയ (24) ചികിത്സയില്‍ കഴിയവേ ഇന്നലെയാണ് മരിച്ചത്. ജനുവരി 29ന് മൂവാറ്റുപുഴയിലെ സ്വകാര്യ ആശുപത്രിയില്‍ ഇരട്ടക്കുട്ടികള്‍ക്ക് ജന്മം നല്‍കിയ ശേഷം കൃഷ്ണപ്രിയ അബോധാവസ്ഥയിലായി.

തുടര്‍ന്ന് ആലുവയില്‍ സ്വകാര്യ ആശുപത്രിയില്‍ ചികിത്സയില്‍ കഴിയുന്ന കൃഷ്ണപ്രിയയുടെ ചികിത്സയ്ക്കായി നാടൊന്നിച്ചു പണം സ്വരൂപിച്ചു വരികയായിരുന്നു.

എന്നാല്‍ കൃഷ്ണപ്രിയയെ ജീവിതത്തിലേക്ക് തിരികെ കൊണ്ടുവരാനുള്ള വീട്ടുകാരുടെയും നാട്ടുകാരുടെയും ശ്രമങ്ങള്‍ വിഫലമാക്കിക്കൊണ്ട് അവള്‍ ഈ ലോകത്തോട് വിടപറയുകയായിരുന്നു. ഇരട്ടക്കുട്ടികള്‍ക്കു ജന്മം നല്‍കി, പിറ്റേന്ന് ശ്വാസം മുട്ടല്‍ അനുഭവപ്പെട്ട് കൃഷ്ണപ്രിയ അബോധാവസ്ഥയിലായി.

അണുബാധയെത്തുടര്‍ന്ന് രക്ത സമ്മര്‍ദം കുറഞ്ഞ് സെപ്റ്റിക് ഷോക്ക് ഉണ്ടായതായും വിവിധ അവയവങ്ങളുടെ പ്രവര്‍ത്തനങ്ങളെ ബാധിച്ചതായും ഡോക്ടര്‍മാര്‍ പറയുന്നു. കൃഷ്ണപ്രിയയുടെ ഭര്‍ത്താവ് മൂവാറ്റുപുഴ ആയവന പാലനില്‍ക്കുംപറമ്പില്‍ പ്രവീണ്‍ ഡ്രൈവിങ് ജോലി ചെയ്താണ് കുടുംബം കഴിഞ്ഞുവന്നത്.


ക്രഷറില്‍ ജോലി ചെയ്തുവന്ന പിതാവ് ഷാജിക്ക് ശ്വാസം മുട്ടല്‍ രൂക്ഷമായതിനെത്തുടര്‍ന്നു ജോലി ചെയ്യാന്‍ കഴിയാത്ത അവസ്ഥയിലാണ്. അമ്മ അനിത പശുവിനെ വളര്‍ത്തിയാണ് കുടുംബം പുലര്‍ത്തുന്നത്. സഹോദരന്‍ അനന്തു പ്ലസ്ടുവിനു ശേഷം പഠനം തുടരാനാവാതെ നില്‍ക്കുന്നു. കൃഷ്ണപ്രിയയുടെ സംസ്‌കാരം ഇന്നു മൂന്നിന് തമ്പലക്കാട്ടെ വീട്ടുവളപ്പില്‍.