ശക്തി കുറഞ്ഞ മഴ സംസ്ഥാനത്ത് ഒരാഴ്ച കൂടി തുടരും. തെക്കന്‍ ജില്ലകളിലാകും മഴ കൂടുതലായി ലഭിക്കുക. തിരുവനന്തപുരം, കൊല്ലം ജില്ലകളിലാണ് വരും ദിവസങ്ങളില്‍ കൂടുതല്‍ മഴയ്ക്ക് സാദ്ധ്യതയുള്ളത്.

ബംഗാള്‍ ഉള്‍ക്കടലില്‍ നിന്നുള്ള കിഴക്കന്‍ തരംഗത്തിന്റെ സ്വാധീനത്തില്‍ കൂടുതല്‍ ഈര്‍പ്പം കലര്‍ന്ന മേഘങ്ങള്‍ കേരളത്തിന് അഭിമുഖമായി സഞ്ചരിക്കുന്നുണ്ട്. ഇതിന്റെ സ്വാധീനത്തിലാണ് മഴ ലഭിക്കുന്നത്.

ഇന്നലെ തിരുവനന്തപുരത്ത് ശക്തമായ മഴ ലഭിച്ചതും ഇതേത്തുടര്‍ന്നാണ്. ഇന്ന് തെക്കന്‍ ജില്ലകളില്‍ വൈകുന്നേരങ്ങളില്‍ നേരിയ മഴ ലഭിക്കും. ഇവിടങ്ങളിലെ മലയോര മേഖലകളിലായിരിക്കും കൂടുതല്‍ മഴ ലഭിക്കുക.

ചിലയിടങ്ങളില്‍ ഇടിമിന്നലിനും സാദ്ധ്യതയുണ്ട്. അടുത്തയാഴ്ച വടക്കന്‍ കേരളത്തിലും ഇടത്തരം മഴയ്ക്ക് സാദ്ധ്യതയുണ്ട്. എന്നാല്‍ സംസ്ഥാനത്തെ താപനിലയില്‍ കാര്യമായ മാറ്റമുണ്ടാകില്ലെന്നും വിദഗ്ദ്ധര്‍.