മണ്ണിലിറങ്ങി മനുഷ്യർക്കൊപ്പം നടക്കുന്ന രാഷ്ട്രീയമാണ് വിജയിച്ചത്.അതിൽ വർഗ്ഗീയതയുണ്ട്, വികസന രാഷ്ട്രീയ മോഹങ്ങളുമുണ്ടെന്ന പ്രതികരണവുമായി ഡോ. അരുൺകുമാർ. അദ്ദേഹം ഫേസ്ബുക്കിൽ പങ്കു വച്ച കുറിപ്പിന്റെ പൂർണ്ണ രൂപം,ഇങ്ങനെ; മണ്ണിലിറങ്ങി മനുഷ്യർക്കൊപ്പം നടക്കുന്ന രാഷ്ട്രീയമാണ് വിജയിച്ചത്.അതിൽ വർഗ്ഗീയതയുണ്ട്, വികസന രാഷ്ട്രീയ മോഹങ്ങളുമുണ്ട്.

ഹൃദയഭൂമിയിൽ ഹിന്ദുത്വവും ചെറുതെങ്കിലും നിറവേറ്റിയ പദ്ധതികളും സമാസമം വീടുകൾ കയറി ആവർത്തിച്ചുറപ്പിച്ച് യോഗിയുടെ കാലാൾപട ഉത്തർപ്രദേശിനെ തനിക്കൊപ്പം നിർത്തി. പഞ്ചാബിൽ ഭരണവിരുദ്ധ വികാരത്തെ ക്ഷേമരാഷ്ട്രീയ മോഹങ്ങളാക്കി ആപ്പ് വീടുകൾ തോറും നടന്നു നട്ടു വളർത്തി. ഒന്നും ബി.ജെ.പിയിൽ നിന്ന് വേറിട്ട് പറയാനോ പ്രവർത്തിക്കാനോ ഇല്ലാത്ത കോൺഗ്രസ് കഥാവശേഷമായി.

ഇന്ത്യയിൽ കോൺഗ്രസ്സിൻ്റെ നിയോഗം അവസാനിക്കുകയാണ്. പാർട്ടി ദേശീയ തലത്തിൽ പിരിച്ചുവിട്ട് ലോക് സേവക് സംഘ് ആയി ഗ്രാമങ്ങളിലേക്കും മനുഷ്യരിലേക്കും മടങ്ങണം. ഒരിടവേളയ്ക്ക് ശേഷം കാലത്തിൻ്റെ ആശയങ്ങൾ പുതുക്കിയെടുത്ത് പുതിയ മനുഷ്യരാൽ, സ്വപ്നങ്ങളാൽ നയിക്കപ്പെടുന്ന രാഷ്ട്രീയ പാർട്ടിയായി ഉയിർത്തെഴുന്നേൽക്കണം. പ്രിയപ്പെട്ട ഹൈക്കമാൻഡ് നിങ്ങൾ ഈ പാർട്ടിയുടെ രാഷ്ട്രീയ ബാധ്യതയാണ്.

ഇന്ത്യയെ ഇമാജിൻ ചെയ്യാനുള്ള കഴിവുള്ളവർ നിങ്ങളിലുണ്ടോ എന്ന് സംശയമാണ്. ആ നിങ്ങളെ ഇന്ത്യ എങ്ങനെ ഇമാജിൻ ചെയ്യാനാണ്? പ്രച്ഛന്നവേഷത്തിരക്കിൽ സ്വന്തം വേഷം മറന്നു പോയവരെ എങ്ങനെയാണ് ഇമാജിൻ ചെയ്യേണ്ടത്? എന്താണ് നിങ്ങളുടെ വേഷം? ആശയം?റോൾ? വേഷങ്ങളെല്ലാം അഴിച്ചു വച്ച് മണ്ണിലേക്കും മനുഷ്യരിലേക്കും മടങ്ങു. മടങ്ങി വരും വരെ ഇന്ത്യയെ അതിൻ്റെ വൈവിധ്യം കാത്തോളും. സ്റ്റാലിനും, മമതയും, നവീനും, ഇടതുപാർട്ടികളും, കെജരിവാളും, അഖിലേഷും ഒപ്പം ഇന്ത്യയിലെ കർഷകരും.!