കളമശ്ശേരി ഇലക്‌ട്രോണിക് സിറ്റിയിലുണ്ടായ മണ്ണിടിച്ചില്‍; മരിച്ചവരുടെ എണ്ണം നാലായി; ഒരാള്‍ക്കു വേണ്ടി തെരച്ചില്‍ തുടരുന്നു
എറണാകുളം കളമശ്ശേരി ഇലക്‌ട്രോണിക് സിറ്റിയിലുണ്ടായ മണ്ണിടിച്ചിലില്‍ മരിച്ചവരുടെ എണ്ണം നാലായി. ഒരാള്‍ക്കു വേണ്ടി തെരച്ചില്‍ തുടരുകയാണ്. ഫൈജുല്‍ മണ്ഡല്‍, കൂടൂസ് മണ്ഡല്‍, നൗജേഷ് മണ്ഡല്‍, നൂറാമിന്‍ മണ്ഡല്‍ എന്നീ ഇതര സംസ്ഥാന തൊഴിലാളികളാണ് മരിച്ചത്. ഇവര്‍ പശ്ചിമ ബംഗാള്‍ സ്വദേശികളാണെന്നാണ് വിവരം.
വെള്ളിയാഴ്ച ഉച്ചക്ക് രണ്ടരയോടെയായിരുന്നു ദുരന്തം. ആദ്യം രക്ഷപ്പെടുത്തി കളമശ്ശേരി മെഡിക്കല്‍ കോളേജിലെത്തിച്ച രണ്ടു പേരുടെ നില തൃപ്തികരമാണ്. പത്ത് അടിയോളം താഴ്ചയിലാണ് തൊഴിലാളികള്‍ കുടുങ്ങിയിരുന്നത്. പത്ത് അഗ്‌നിശമന സേനാ വാഹനങ്ങള്‍ സ്ഥലത്തെത്തി. അഗ്‌നിശമന സേനയും പൊലീസും ചേര്‍ന്നായിരുന്നു രക്ഷാപ്രവര്‍ത്തനം. ഡോഗ് സ്ക്വാഡും തെരച്ചിലില്‍ പങ്കെടുത്തു.
കളമശ്ശേരി മെഡിക്കല്‍ കോളജിന് സമീപത്തെ സ്വകാര്യ ഭൂമിയിലാണ് അപകടം. കെട്ടിട നിര്‍മാണത്തിനായി മണ്ണുമാന്തി യന്ത്രം കൊണ്ട് ആഴത്തില്‍ കുഴിയെടുക്കുന്നതിനിടെ മണ്ണിടിഞ്ഞ് വീഴുകയായിരുന്നു. ഇതര സംസ്ഥാന തൊഴിലാളികളാണ് അപകടത്തില്‍പെട്ട എല്ലാവരും.
https://www.facebook.com/Malayalivartha
